Read NQAARIIT NE ROOG A paɗax ale 1 Bible Online

A paɗax ale 1 - NQAARIIT NE ROOG bible

A paɗax ale 1

¹O Yaal oxe a xoyta a Moyiis no Ƭiif ne ta xetteel, a heblin kene:

²«Layi xeet fee Isra’el too yegin a den ee: O leng na nuun a bugangaa o ɓoxot o Yaal oxe sadax, fat a sadaxit njegel. A waaga o ref njegel naa hatna no siir mbaat no ged.

³Boo ci’it um a refna sadax fa ndoxel faa hatna no siir um, fat a ref ngoor naa jegeerna sik fa leng. Fat a ɓisin no ndokand ne no Ƭiif ne o Yaal oxe a xetteel, ndax ta fel o Yaal oxe.

⁴Fat a doon o ɓay um took xoox le no nqoox ne o Yaal oxe a jaɓkaa, ndax ta jofoorandel fo ten.

⁵Fat a xiris nqoox ne mbaambir no Yaal oxe, saasadax we ndefna xa ƥiy xa koor axe Aaroon a ƥoxot fo’oy le soo a mbiisin me widna o sadaxand ole refna no ndokand ne no Ƭiif ne.

⁶Fat nqoox ne a hutel soo a ɗegel teɓ-reɓ.

⁷Xa ƥiy axe Aaroon ndefna saasadax we, fat a ngef fiɗel, a ndoonin took o sadaxand ole soo a umb xa cuuƭ.

⁸Fat a ndoon xa ƭeg axe fo xoox le fo neeneer ke took xa cuuƭ axe umbeena no sadaxand ole.

⁹Fat o yaal sadax fee a laxadit laaw ke fo a caf ake foofi, soo o saasadax oxe a dox fop took o sadaxand ole. Keene xan a ref sadax fa ndoxel faa felna tuñ bo no Yaal oxe.

¹⁰Boo ci’it um a refna sadax fa ndoxel faa hatna no ged um, ta ref no paal ke mbaat no pambe ke, a wara o ref suk laa jegeerna sik fa leng.

¹¹Fat a xirsin mbaambir no Yaal oxe no ɓemb-roog o janoon ole no sadaxand ole, soo saasadax we ndefna xa ƥiy Aaroon a mbiis fo’oy le took o sadaxand ole fo me widuuna fop.

¹²Fat a ɗegin teɓ-reɓ, soo o saasadax oxe a doon xa ƭeg axe fo xoox le fo neeneer ke took xa cuuƭ axe umbeena no sadaxand ole.

¹³Fat a laxadit laaw ke fo a caf ake foofi, soo o saasadax oxe a ɓisloox fop, a doxin took o sadaxand ole. Keene xan a ref sadax fa ndoxel faa felna tuñ bo no Yaal oxe.

¹⁴Boo ci’it um a refna sadax fa ndoxel faa refna ndiiƭ, a wara o ref a qoɗoxoñ mbaat a nuukuur.

¹⁵Fat o saasadax oxe a sadaxit ndiiƭ ne took o sadaxand ole, a torol xoox le no ndiiƭ ne, a doxin took o sadaxand ole soo a siidin fo’oy le no saax o leng ole no sadaxand ole.

¹⁶Fat a watin gagar le fo ke refna teen, soo a deɓin paam o sadaxand ole farna fo batand, me ndaw ke a yipeel.

¹⁷Cinj kaaga, fat a ɗaañ ndiiƭ ne, a fañin o salit, a doxin took o sadaxand ole, no umb ne na xa cuuƭ axe. Keene xan a ref sadax fa ndoxel faa felna tuñ bo no Yaal oxe.»