Read NQAARIIT NE ROOG A paɗax ale 10 Bible Online

A paɗax ale 10 - NQAARIIT NE ROOG bible

A paɗax ale 10

¹Nadab fa Abiihu, ɗik na xa ƥiy axe Aaroon a nqota oxuu refna o njaq, a yip teen fiɗel soo a ndoon teen cuuraay. Neene, a ƥisiida mbaambir no Yaal oxe fiɗel laa ta simit’eerna.

²Maaga, fiɗel a sutoora mbaambir no Yaal oxe, a dox a den bo dee riw, too a nqona ndak fo ndak mbaambir no Yaal oxe.

³Moyiis a laya a Aaroon ee: «Keene o Yaal oxe a ne’oogu, ye ta layna yee: ‹Xam lalit o tedel es no we na matiidaxam, lalit o ndam es mbaambir xeet fee fop.› » Aaroon a naaga tek, a xor.

⁴Moyiis a xoya a Misa’el fa Elsafan we xa ƥiy Usi’el fee faap o ndeɓ Aaroon too a lay a den ee: «Matiidyo, nqot xa tal axe no fog faap nuun weeke na luuñaa mbaambir o Mbiñ o tedu nqe, sut a den saŋe ne.»

⁵A matiida soo a sut a den saŋe ne fo sabadoor den, ne Moyiis a layit’uuna.

⁶Cinj kaaga, Moyiis a laya a Aaroon fo xa ƥeem xa ƭaq axe ndefna Eleyasaar fa Itamaar ee: «Nu mbaree o nqaƴ a biil nuun dee simbiñ, too nu mbaarkee tikoorik nuun, tee kaa nu ñaawooxaa, yaam ndik nu nqon, soo fuux le no Yaal oxe a yen took mbokatax ne fop. Fog we nuun koy, ndefna mbind Isra’el fop, na loolkaa we o Yaal oxe a waritna fiɗel.

⁷Nu sutooxkee ndokand ne no Ƭiif ne, yaam ndik nu nqon, yaam diwliin fa ndodir fee no Yaal oxe oxey na nuun.» Aaroon fo xa ƥeem a mbi’a ke Moyiis a lay’ina.

⁸O Yaal oxe a laya a Aaroon ee:

⁹«Wo fo xa ƥeef, ba nu yer biiñ mbaat a yer a lakas alaa waagna o way o kiin, yaa nu mbugna o ndok no Ƭiif ne um xetteel, yaam ndik nu nqon. Keene xan a ref na nuun fo xa taan nuun kebil naa na refkaa boo kili.

¹⁰Neene, xan nu mbaag o njektirand ke tedna fo ke tedaƭarna, njektirand itam ke xoolaƭarna fo ke xoolna,

¹¹soo njangin Ii-isra’el we kebil ke o Yaal oxe a cooxna a den fop na pexey Moyiis.»

¹²Moyiis a laya a Aaroon fo xa ƥeem xa ƭaq axe maad’ina o ñoowaa, ndefna Eleyasaar fa Itamaar ee: «Nqotyo ke yoqna na sadax fee no tuufe-duufe ke ɓoxoteena mbaambir no Yaal oxe, ñaamtin paam o sadaxand ole too baa jeg poɗaxnir, yaam tig tedu tigi a refu.

¹³Fat nu ñaamtin o mbiñ o tedu. A las of a refu fo a las na xa ƥeef no sadax ke ƥoxoteena o Yaal oxe, yaam keene refu ke Roog a heblaxama.

¹⁴Fat nu ñaamit itam no mbiñ o nqoolu, wo fo xa ƥeef xa koor fo xa ƥeef xa tew, ngang ne yaandeena fo a ñaal ale watneena, yaam nuun a cooxe, ta ref a las nuun, wo fo xa ƥeef, no sadax camsa’oor ke no Ii-isra’el we.

¹⁵Fat a ƥisiid ngang ne fo a ñaal ale, a yoonandtin neeneer ke mbareena o ndox. Ngang ne fo a ñaal ale fat a yaandel mbaambir no Yaal oxe. Wo fo xa ƥeef na njegkaa a den. Keene xan a refaa a las nuun kili, ne o Yaal oxe a heblituuna.»

¹⁶Moyiis a laamta kaa farna no suk fambe le sadaxteena yaam pakaad ke na xeet fee, too a laye yee a doxe. Maaga, Moyiis a fuuxana xa ƥiy xa ƭaq axe Aaroon a yoqiɗ’ina, ndefna Eleyasaar fa Itamaar, a xasan a den ee:

¹⁷«Xar taxu nu ñaamtee a tegeƴ ake na sadax feene kam o Mbiñ o tedu nqe? Tig tedu tigi a refu, too o Yaal oxe kaa cooxin a nuun, ndax nu mborit tooñ ke na xeet fee, njofoorand a den fo o Yaal oxe.

¹⁸Feek fo’oy le no njegel neene ɓek’aand kam o Mbiñ o tedu nqe, kam fee nu mbar’un o ñaamit, ne heblit’anuuma a nuun.»

¹⁹Aaroon a laya a Moyiis ee: «Nan-gilooxi! Xaye ye Ii-isra’el we a ƥoxotna o Yaal oxe sadax den, ndax da njeg a baasan fa sadax fa ndoxel fee den, andaa xil ke dalaxama. Ndax waag’aam o ñaam a tegeƴ ake no suk fambe le sadaxteena yaam a baasan pakaad no ñaal nandu neeke? A woora yee kaaga felkoogee o Yaal oxe.»

²⁰Moyiis a nana too a jaɓa a ƭelem akeene.