Read NQAARIIT NE ROOG A paɗax ale 12 Bible Online

A paɗax ale 12 - NQAARIIT NE ROOG bible

A paɗax ale 12

¹O Yaal oxe a laya a Moyiis ee:

²«Yegni Ii-isra’el we yee: Boo o tew o laaɓeer a ñootna o ƥiy o ngoor, xan a xoolaƭar boo ñaal ɓetuu ƭik, nen yaa ta saqna tap.

³O njaaƈ onqe fat a xucel, yaa bes um a dakooxiidna.

⁴O tew oxe a wara o moofahin ñaal qarɓeen tadik fo ñaal tadik kaa ta ɓogdinooxaa fo’oy um. Duqkee dara kaa tedna too retkee no Mbind tedu ne boo yaa pes ke no ƥogdinax um a mbaafkaa.

⁵A ñootangaa o ƥiy o ndew, xan a xoolaƭar boo pes ƭik takooxiidu, nen yaa ta saqna tap, too xan a jeg ñaal qarɓeen ɓetuu fa leng fo ñaal ɓetuu fa leng kaa ta ɓogdinooxaa fo’oy um.

⁶Boo pes ke no ƥogdinax um a mbaafna, ta ref no ƥiy o ngoor onqe mbaat no ndew onqe, fat a ɓisiid me no saasadax oxe, no ndokand ne no Ƭiif ne um xetteel, o njuk mbaal onqaa jegna o hiid, ta ref sadax fa ndoxel fo a nuukuur mbaat a qoɗoxoñ, ta ref sadax fa mbaasnoor pakaad.

⁷Fat o saasadax oxe a sadaxit a den mbaambir es, mi o Yaal oxe, soo a jofoorand o tew oxeene fa mi. No kaa xotitna maaga xan a xool no fo’oy le yuuritna no ten. Keene refu kebil ne jaginna no tew oxaa ñootna o ƥiy o ngoor mbaat o ndew.

⁸A soƥangaa yee o tew oxeene jegee kaa ta waaƭitna o mbaal, fat a ɓisiid a qoɗoxoñ a ƭak mbaat a nuukuur a ƭak, a leng ale a ref sadax fa ndoxel, a lakas ale a ref sadax fa mbaasnoor pakaad. Fat o saasadax oxe a jofoorandin fa mi, too xan a xool.»