Read NQAARIIT NE ROOG A paɗax ale 13 Bible Online

A paɗax ale 13 - NQAARIIT NE ROOG bible

A paɗax ale 13

¹O Yaal oxe a laya a Moyiis fa Aaroon ee:

²«Boo o kiin a jegna took cer um ur mbaat o ɓuɗ mbaat daad ran laa na nandtaa uut a tik-a-maak took ƭool ne no cer um, fat a ɓisel maa no saasadax oxaa refna Aaroon mbaat maa no leng na xa ƥeem mbaat na xa taan um ndefna saasadax itam.

³Fat o saasadax oxe a horoox uut le refna took ƭool ne no cer ke. Boo saxin le no uut le a ranigna, too uut le a moƴ o xooɗ ƭool ne, yaaga uut a tik-a-maak a refu. A cinj yaa o saasadax oxe a horooxuuna, ndak fo ndak fat a yegnit ee o kiin oxaaga xoolee.

⁴Kaa koy, a jegangaa daad ran laa moƴeerna o xooɗ ƭool ne no cer ke, too saxin le ran-gee, o saasadax oxe a wara o weg oxe jegna uut le boo ñaal ɓetuu ƭik.

⁵No ñaal ɓetuu ƭikandeer ne, fat o saasadax oxe a ɗeetatinin. A ga’angaa yee daad le suptooxee too xayee took ƭool ne, fat a wegin jaf ɗikandeer boo ñaal ɓetuu ƭik.

⁶Fat o saasadax oxe a ɗeetatinin jaf ɗikandeer no ñaal ɓetuu ƭikandeer ne. Boo uut le a doonna o ñog too xayee took ƭool ne, fat o saasadax oxe a yegnit ee o kiin oxeene a xoola. O ɓuɗ a refu. Fat a dap tikoorik um, too xan a xool.

⁷Kaa koy, boo o ɓuɗ ole a xayna took ƭool ne a cinj yaa ta laltinooxna me no saasadax oxe, ndax ta yegnitel ee a xoola, fat a laltinook jaf ɗikandeer me no saasadax oxe.

⁸Fat o saasadax oxe a ɗeetatinin. Boo o ɓuɗ ole a xayna took ƭool ne, fat o saasadax oxe a yegnit ee o kiin oxeene xoolee. A tik-a-maak a saqu.

⁹A soƥangaa yee kaa jeg o kiin oxaa a tik-a-maak a feeñna no cer um, fat a ɓisel maa no saasadax oxaa.

¹⁰Fat o saasadax oxe a ɗeetin. A jegangaa ur ran took ƭool ne, boo ur leene a ran-ginna saxin le, soo ta jeg nex ñoow a ndeer ur le,

¹¹a tik-a-maak alaa miñna kam cer ke no kiin oxeene a refu. Fat o saasadax oxe a yegnit ee o kiin oxeene xoolee. Wegkiran, yaam kaa xoolaƭar.

¹²Boo a tik-a-maak ale a xayna took ƭool ne, soo a muur ƭool ne no xe jegna uut le, a xotit no xoox le boo na caf ake no ke o saasadax oxe a waagna o ga,

¹³fat a ɗeetin. A ga’angaa yee a tik-a-maak ale kaa muur cer ke fop, fat a yegnit ee oxe jegna uut le a xoola. Feek kaa ran-gat fop, a xoola.

¹⁴Kaa koy, no ñaal naa nex ñoow a feeñkaa took um, o kiin oxe xan a xoolaƭarat.

¹⁵O saasadax oxe a ga’angaa nex ñoow le, fat a yegnit ee o kiin oxeene xoolee. Nex ñoow le kaa xoolaƭar, na tik-a-maak a hatu.

¹⁶Boo nex ñoow le a suptooxna soo a ran-gat, fat o yaal um a ret maa no saasadax oxaa,

¹⁷ta ɗeetin, too boo uut le a ran-gatna, fat a yegnit ee o yaal uut le a xoola.

¹⁸O kiin a jegangaa ɗoy laa wodna,

¹⁹boo ur ran mbaat daad ran laa yaacna o yaxig a feeñna me ɗoy leene a reeƭna, fat oxeene a ret a ga’rik fo o saasadax oxe.

²⁰Fat o saasadax oxe a ɗeetin. Boo daad le a moƴna o xooɗ ƭool ne, soo saxin le a ran-gat, fat o saasadax oxe a yegnit ee o kiin oxeene xoolee. A tik-a-maak alaa sutoorna no ɗoy a refu.

²¹Boo o saasadax oxe a ga’na yee jegee saxin ran kam daad le, too moƴee o xooɗ ƭool ne, soo a doon o ñog, fat a weg o kiin oxeene boo ñaal ɓetuu ƭik.

²²Boo daad le a xayna took ƭool ne, fat o saasadax oxe a yegnit ee o kiin oxeene xoolee. A tik-a-maak a saqu.

²³Kaa koy, daad le a maadangaa ne ta reeƭna, too xayee, o and ee aak no ɗoy le soom oo. Fat o saasadax oxe a yegnit ee o kiin oxeene a xoola.

²⁴O kiin a doxangaa no cer um, soo daad ran a feeñ me ndox ne a refna mbaat ta yaac o yaxig,

²⁵fat o saasadax oxe a ɗeetin. Boo saxin le a ran-gatna kam daad le too a moƴ o xooɗ ƭool ne, o and ee a tik-a-maak oo, alaa sutooxna kam ndox ne. Fat o saasadax oxe a yegnit ee o kiin oxeene xoolee. Ɗoy a tik-a-maak a saqu.

²⁶O saasadax oxe a ga’angaa yee jegatee saxin ran kam daad le, too moƴee o xooɗ ƭool ne soo a doonat o ñog, fat a weg o kiin oxeene boo ñaal ɓetuu ƭik.

²⁷Fat o saasadax oxe a ɗeetin no ñaal ɓetuu ƭikandeer ne. Boo daad le a xayna took ƭool ne, fat a yegnit ee o kiin oxeene xoolee: A tik-a-maak a saqu.

²⁸Kaa koy, boo daad le a maadna ne ta reeƭna, xayee took ƭool ne, soo a doon o ñog, o and ee uut le no ndox ne yoo. Fat o saasadax oxe a yegnit ee o kiin oxeene a xoola, yaam aak le no ndox ne rek a refu.

²⁹Boo o koor mbaat o tew a jegna uut no xoox le mbaat no raatam ole,

³⁰fat o saasadax oxe a ɗeet uut le. A moƴangaa o xooɗ ƭool ne, too a jeg saxin laa yaayna soo a xoƈ, fat o saasadax oxe a yegnit ee o kiin oxeene xoolee: Kaa ƴaar. A tik-a-maak sutooxun no xoox le mbaat no raatam ole.

³¹Boo o saasadax oxe a ga’na yee ƴaar le moƴee o xooɗ ƭool ne, too jegee saxin ɓaal, fat a weg oxe ƴaarna boo ñaal ɓetuu ƭik.

³²No ñaal ɓetuu ƭikandeer ne, fat o saasadax oxe a ɗeet uut le. Boo ƴaar le a xayeerna, jegee saxin laa yaayna too moƴee o xooɗ ƭool ne,

³³oxe ƴaarna fat a ruus xoox le fo o raatam ole, ndaa ruuskee o mbiñ onqe ƴaarna. Cinj kaaga, fat o saasadax oxe a dakooxin o weg jaf ɗikandeer boo ñaal ɓetuu ƭik.

³⁴No ñaal ɓetuu ƭikandeer ne, fat o saasadax oxe a ɗeet ƴaar le. A xayangee took ƭool ne, too moƴiran o xooɗ, fat o saasadax oxe a yegnit ee o kiin oxeene a xoola. Fat a dap tikoorik um, too xan a xool.

³⁵Kaa koy, boo ƴaar le a xayna took ƭool ne a cinj yaa ta yegneena yee a xoola,

³⁶fat o saasadax oxe a ɗeetatinin. Boo ƴaar le a xayna took ƭool ne, o saasadax oxe moofkee a ɗeetaa, ndax a jega saxin laa yaayna. O kiin oxeene kaa xoolaƭar.

³⁷Boo ƴaar le a nanduuna fo kaa ɓaatooxeerna, soo a jeg saxin ɓaal, o and ee a woda, too o kiin oxe a xoola. Maaga, fat o saasadax oxe a yegnit ee a xoola.

³⁸Boo o koor mbaat o tew a jegna a taad a tan took ƭool cer um,

³⁹fat o saasadax oxe a ɗeetin. A jegangaa took ƭool ne a taad akaa yaacna o ndanig, o and ee a taad akaa sutooxna took ƭool ne soom a ndefu. A xoola.

⁴⁰Boo o kiin a jegateerna wiil no log, meel oo. A xoola.

⁴¹Boo xoox le a jegateerna wiil no ƭuf ne, meel mbaambir oo. A xoola.

⁴²Kaa koy, boo ta jegna no meel le, ta ref no log ole mbaat no ƭuf ne, uut laa ranigna, a yaac o yaxig, a tik-a-maak alaa sutooxna no meel le a jegu.

⁴³Fat o saasadax oxe a ɗeetin. A jegangaa ur ran laa yaacna o yaxig no meel le, ta ref mbaambir mbaat a cinj, a nand fo a tik-a-maak alaa refna took ƭool ne no cer ke,

⁴⁴o and ee o yaal um a tik-a-maak feelun, ta xoolaƭar. Fat o saasadax oxe a yegnit ee kaa xoolaƭar yaam uut le refna no xoox le ten.

⁴⁵O kiin oxe jegna a tik-a-maak fat a rokoox tikoorik um quuyooxu soo a xaƴ wiil um simbiñ. Fat a muur o don ole soo a falalooxaa yee: ‹Kaam xoolaƭar! Kaam xoolaƭar!›

⁴⁶Nuu ta miñtaa fo uut le, xan a xoolaƭar. Ne ta xoolaƭarna, fat a gen ten soom, ngenand um a ref tafil saŋe ne.»

⁴⁷«Boo ta jegna ndikoorik naa xuurna, ta ref ndikoorik mbi’te a ƥiñ mbaat gaare,

⁴⁸ta ref ñirax mbaat a naf a tiwe mbaat ƭool mbaat o ƥaxañ o jalte ƭool,

⁴⁹too a quur ale a yaac o hoƥ mbaat ta yaac o yaxig took ndikoorik nuu ta waagna waag o ref mbaat took ƭool ne mbaat took o ƥaxañ o jalte ƭool, o and ee a quur ale yoo. Fat a lalel o saasadax oxe.

⁵⁰Fat o saasadax oxe a ɗeet a quur ale soo a weg ke xuurna boo ñaal ɓetuu ƭik.

⁵¹No ñaal ɓetuu ƭikandeer ne, fat a ɗeetatin a quur ale. Boo a quur ale a xayna no ñirax ne mbaat no ƭool ne mbaat no ƥaxañ o jalte ƭool ole, o and ee a quur a ƭomu yoo. Tig keene kaa xoolaƭar.

⁵²Fat a dox ñirax ne mbaat o ƥaxañ ole xuurna, yaam a quur a ƭomu a refu.

⁵³Kaa koy, boo o saasadax oxe a ga’na yee a quur ale xayee no ñirax ne mbaat no ƥaxañ o jalte ƭool oluu ta waagna waag o ref,

⁵⁴fat a heblit, ndax ke xuurna a laxadel, soo ta wegahinin jaf ɗikandeer boo ñaal ɓetuu ƭik.

⁵⁵Fat o saasadax oxe a ɗeet a quur ale a cinj yaa ta ɓogdeena. Boo a quur ale a suptooxeerna too ɓaatooxee, yaaga ndikoorik ne a xoolaƭara. Ta ref ee a quur ale kam a gartu mbaat tafil, fat a doxel.

⁵⁶Boo o saasadax oxe a ga’na yee a quur ale oxe watiidaa a cinj yaa ta ɓogdeena, fat a watin ke xuurna no ñirax ne mbaat no ƭool ne.

⁵⁷A ɓaatangaa o feeñ no ñirax ne mbaat no ƥaxañ ole fi’teena ƭool, a quur alaa na sutooxatiniidaa a refu. Fat a doxel.

⁵⁸Boo ndikoorik naa xuurna a laxadeena, ta ref ñirax mbaat a naf a ño’te o ɓay mbaat o ƥaxañ o jalte ƭool, soo a quur ale a wat, a ware o laxad jaf ɗikandeer, ndax ta xool.»

⁵⁹Keene refu kebil ne jaginna na quur ale, yaa ta refna no ñirax ke mbi’teena a ƥiñ mbaat gaare mbaat a naf a ño’te o ɓay mbaat ndikoorik ƭool nuu ta refna. Kebil neene na bugko yegnititeel ee tikoorik keene a nqoola mbaat nqoolee.