Read NQAARIIT NE ROOG A paɗax ale 14 Bible Online

A paɗax ale 14 - NQAARIIT NE ROOG bible

A paɗax ale 14

²«Neeke ƥogdinax no xaa saqna a tik-a-maak a waru o fi’tel: Yaa ta ɓisiidkeel mbaambir o saasadax oxe,

³fat oxeene a sutooxiid saŋe ne, ndax ta ɗeet oxe saqna a tik-a-maak ale. Boo a tik-a-maak ale no xeene kiin a wodna,

⁴fat o saasadax oxe a heblit, ndax oxeene bugeena o ɓogid a ɓisaniidel tiiƭ ñoow ƭik kaa nqoolna fo xa cuuƭ ndaxar seedar fo xa ƥaak xa taalde’u fo a naaq isoop.

⁵Fat o saasadax oxe a heblit, ndax leng no tiiƭ ke a yoornel no mbokin naa yipna foofi fo xoolu, a xirsel.

⁶Cinj kaaga, fat a xot ndiiƭ ñoow ne fo xa cuuƭ ndaxar seedar axe fo xa ƥaak xa taalde’u xe fo a naaq isoop ale, a suup a den kam foofi fo xoolu le fokatoorna fo fo’oy le no ndiiƭ ne xirseena.

⁷Fat a wiisin boo a caf ɓetaa ƭaq took no xe wareena o ɓogid na tik-a-maak ale ta saq’ina, cinj kaaga, ta yegnit ee o kiin oxeene a xoola, soo a xaƴ ndiiƭ ñoow ne ta yet kam a koƥ ale.

⁸Fat oxe na ɓogdinooxaa a dap ñirax um, a ruus wiil um fop, soo a ɓogoox, too xan a xool. Cinj kaaga, xan a waag o rok kam saŋe ne, ndaa rokkee no ƭiif um boo ñaal ɓetuu ƭik.

⁹No ñaal ɓetuu ƭikandeer ne, fat a ruusatin wiil um fop: Xoox um fo o raatam um fo xa ƭiiɗiik um fo wiil lakas um fop. Fat a dap ñirax um itam soo a ɓogoox. Maaga, xan a xoolat.

¹⁰No ñaal ɓetuu ndadkandeer ne, fat a xot fo njuk fo mbaal fo ƭik naa ñakna sik fo mbaal ndew ñaku sik naa jegna o hiid fo ngap kilo ɓetuu nahik mbiɗel kaa mbosolteena diwliin fa genwal o liitar diwliin, ta ref sadax tuufe-duufe.

¹¹Fat o saasadax oxe na fi’aa ƥogdinax ne a ɓisiid o kiin oxe na ɓogdinooxaa fo tikoorik keene fop mbaambir es, mi o Yaal oxe, no ndokand ne no Ƭiif ne um xetteel.

¹²Fat o saasadax oxe a xot leng no fo mbaal ne soo a ɓoxotin nen sadax fa nqendandoor, a yoonandtin genwal o liitar diwliin ole. Fat a yaand a den mbaambir es, mi o Yaal oxe.

¹³Fat a xirsit o mbaal onqe no Mbiñ o tedu nqe me cegel ke sadaxteena yaam pakaad fo ke na ndoxeel a nqirsiteel, yaam o saasadax oxe jegu njegel ne na sadax fa nqendandoor fee, ne ta jegtuuna na sadax fa mbaasnoor pakaad fee. Tig tedu tigi a refu.

¹⁴Fat o saasadax oxe a xot no fo’oy le no njegel ne na sadax fa nqendandoor fee, a ɗuumin no yuuf ole no nof ñamaak ne no xe na ɓogdinooxaa fo no nqol ngoogoor ne no ɓay o ñamaak um fo ne na caf a ñamaak um.

¹⁵Cinj kaaga, fat o saasadax oxe a xot na diwliin fee, soo a yipin no dang o ɓay o janoon um.

¹⁶Fat o saasadax oxe a suup nqol njooxir ne no ɓay o ñamaak um kam diwliin fee refna no ɓay o janoon um, soo a wiistin nqol um boo a caf ɓetaa ƭaq mbaambir es, mi o Yaal oxe.

¹⁷Fat o saasadax oxe a ɗuum na diwliin fee yoqna no ɓay um no yuuf ole no nof ñamaak ne no xe na ɓogdinooxaa fo no nqol ngoogoor ne no ɓay o ñamaak um fo ne na caf a ñamaak um, me fo’oy le no njegel ne na sadax fa nqendandoor fee a ɗuum’eena.

¹⁸Fat o saasadax oxe a juur diwliin fee yoqatna no ɓay um took xoox le no xe na ɓogdinooxaa. Neene a jofooranditkaa o kiin oxeene fa mi o Yaal oxe.

¹⁹Cinj kaaga, fat o saasadax oxe a ɓoxot sadax fa mbaasnoor pakaad fee soo a jofoorand oxe na ɓogdinooxaa ndoƭ um fa mi. A inoorangaa no keene, fat a xiris njegel ne na sadax fa ndoxel fee.

²⁰Fat a ɓoxotin took o sadaxand ole, a yoonandtin sadax tuufe-duufe ke. Neene, xan a jofoorand o kiin oxeene fa mi, soo ta sog o xool.»

²¹«Boo o kiin oxeene a refna o ndool, too doole um ci’iran ta waag o sadaxit ke warna, fat a waaƭ o njuk mbaal o leng soom, ta yaandel, a ɓoxotel nen sadax fa nqendandoor, ndax ta jofoorandtel o ten fa mi. Fat a waaƭ ngap kilo tadik mbiɗel kaa mbosolteena diwliin nen sadax tuufe-duufe fa genwal o liitar diwliin.

²²Fat a waaƭ itam a qoɗoxoñ a ƭak mbaat a nuukuur a ƭak, kuu ta jegna teen rek, a leng ale a ref sadax fa mbaasnoor pakaad, a lakas ale a ref sadax fa ndoxel.

²³No ñaal ɓetuu ndadkandeer ne, fat a ɓisiid keene fop me no saasadax oxe, no ndokand ne no Ƭiif ne mbaambir es, mi o Yaal oxe, ndax ta ɓogditel o ten.

²⁴Fat o saasadax oxe a xot o mbaal onqe fa diwliin fee, a yaand a den mbaambir es, mi o Yaal oxe.

²⁵Fat a xiris o mbaal onqe, a xot no fo’oy le, a ɗuumin no yuuf ole no nof ñamaak ne no xe na ɓogdinooxaa fo no nqol ngoogoor ne no ɓay o ñamaak um fo ne na caf a ñamaak um.

²⁶Fat o saasadax oxe a yip diwliin no ɓay o janoon um,

²⁷a wiistin nqol njooxir ne no ɓay o ñamaak um boo a caf ɓetaa ƭaq mbaambir es, mi o Yaal oxe.

²⁸Fat a ɗuum na diwliin fee yoqna no ɓay um no yuuf ole no nof ñamaak ne no xe na ɓogdinooxaa fo no nqol ngoogoor ne no ɓay o ñamaak um fo ne na caf a ñamaak um, me fo’oy le no njegel ne na sadax fa nqendandoor fee a ɗuum’eena.

²⁹Fat o saasadax oxe a juur diwliin fee yoqatna no ɓay um took xoox le no xe na ɓogdinooxaa. Neene a jofooranditkaa o kiin oxeene fa mi o Yaal oxe.

³⁰Cinj kaaga, fat a ɓoxot a leng na qoɗoxoñ ake mbaat a leng na nuukuur a ƭak ake ta jegna,

³¹a leng ale nen sadax fa mbaasnoor pakaad, a lakas ale nen sadax fa ndoxel, a yoonandtin sadax tuufe-duufe ke. Neene a jofooranditkaa oxe na ɓogdinooxaa fa mi o Yaal oxe.»

³²Keene refu ke hebleena no ƥogdinax no xaa saqna a tik a maak, too pexey um ci’iran ta waag o fi fop ke warna.

³³O Yaal oxe a laya a Moyiis fa Aaroon ee:

³⁴«Yaa nu ndokkaa no saax laa Kanaan cooxuuma a nuun, ndax nu njegkin, boo feeñluuma naawoos na ndok aluu ta waagna waag o ref no saax le nu njegkaa,

³⁵oxe jegna a ndok aleene, fat a ret, a yegin o saasadax oxe yee: ‹Ga’aam kaa nandna nen naawoos kam a ndok es.›

³⁶Boo o saasadax oxe a helko fo rokaa teen, ndax ta horoox naawoos le, fat a heblit, ndax ke refna kam a ndok ale fop a sutel tafil, yaam ndik ke refna teen fop a xoolaƭar. Cinj kaaga, fat o saasadax oxe a rok, ndax ta ɗeet a ndok ale.

³⁷Fat o saasadax oxe a ɗeet naawoos le. A ga’angaa yee a fi’a took tabax ne na ndok ale xa baaƥ axaa yaacna o ngoƥ mbaat da yaac o yaxig, a moƴ o nqooɗ tabax ne,

³⁸fat a sutooxiid boo no don-maax ole na ndok ale, a simit ta wegel boo ñaal ɓetuu ƭik.

³⁹Fat o saasadax oxe a nomtoox taaga no ñaal ɓetuu ƭikandeer ne. Bo ta ga’na yee naawoos le a moƴa o xay took tabax ne na ndok ale,

⁴⁰fat a heblit, ndax a kac ake ndaawna no naawoos le a mbatnel, soo a ndeɓel tafil teeru fee no mbiñ o nqoolaƭaru.

⁴¹Fat a simit tabax ne na ndok ale fop a xoosel, ndoƭ ke a ƥaxel no mbiñ o nqoolaƭaru tafil teeru fee.

⁴²Fat a kac a lakas a njangel, a mbi’el me a eetaand ake a ndeeƭna, soo a ndok ale a laaratinel.

⁴³Boo andoona yee naawoos le a dakooxa o feeñ na ndok ale a cinj yaa a kac ake a mbatneena, a ndok ale a xoosel soo a laaratinel,

⁴⁴fat o saasadax oxe a nomtoox taaga. A ga’angaa yee naawoos le a dakooxa o feeñ kam a ndok ale, o and ee naawoos laa waageerna o wat oo. A ndok aleene kaa xoolaƭar.

⁴⁵Fat a ndok ale a baytel: A kac oo, a qanq oo, laaratin oo, soo fop a ɓisel tafil teeru fee, no mbiñ o nqoolaƭaru.

⁴⁶Oxuu rokna na ndok ale na pe ake ta weg’eena, xan a xoolaƭar boo no yaar olaa.

⁴⁷Oxuu wondooxna na ndok aleene mbaat ta ñaamit teen, a wara o dap ñirax um.

⁴⁸O saasadax oxe a nomtooxangaa na ndok ale boo a ga ee naawoos le feeñatinee a cinj ye a ndok ale a laaratineena, fat a yegnit ee a ndok ale a xoola, yaam naawoos le a wata.

⁴⁹Fat a waaƭ tiiƭ ƭik fo xa cuuƭ ndaxar seedar fo xa ƥaak xa taalde’u fo a naaq isoop, a ɓogditin a ndok ale.

⁵⁰Fat a yoorin leng no tiiƭ ke no mbokin naa yipna foofi fo xoolu, a xirsin.

⁵¹Fat a xot xa cuuƭ ndaxar seedar axe fo a naaq isoop ale fo xa ƥaak xa taalde’u xe fo ndiiƭ ñoow ne, a suup a den kam foofi fo xoolu le fokatoorna fo fo’oy le no ndiiƭ ne xirseena, soo a wiisin na ndok ale boo a caf ɓetaa ƭaq.

⁵²Neene, xan a ɓogdit a ndok ale fo’oy le no ndiiƭ ne fo foofi fo xoolu le fo ndiiƭ ñoow ne fo xa cuuƭ ndaxar seedar axe fo a naaq isoop ale fo xa ƥaak xa taalde’u xe.

⁵³Cinj kaaga, fat a xaƴ ndiiƭ ñoow ne ta yet, a sutoox teeru fee, a sag kam a koƥ ale. Neene mat a ndok ale a ɓogditkeel, too xan a xool.»

⁵⁴Keene ndefu kebil ke na tik-a-maak aluu refna fo ƴaar luu refna

⁵⁵fo ñirax quuru ke fo naawoos a ndok

⁵⁶fo a ur ake fo xa ƥuɗ axe fo a taad a tan ake.

⁵⁷Kaa njangnaa a mbane tig oo tig a xoolaƭarna fo a mbane ta xoolna. Keene refu ke hebleena na tik-a-maak.