Read NQAARIIT NE ROOG A paɗax ale 15 Bible Online

A paɗax ale 15 - NQAARIIT NE ROOG bible

A paɗax ale 15

¹O Yaal oxe a laya a Moyiis fa Aaroon,

²da ndaawin Ii-isra’el we xa ƭelem axene: «Boo o koor a xaɓeena jir no mbaambir um, ke na yuurtaa teen, kaa xoolaƭar,

³ta ref ee kaa siidtaa no mbaambir um mbaat ta geeroox kam um, ke woorna refu yee o koor oxeene itam kaa xoolaƭar.

⁴No njong nuu ta wondooxna, xan a xoolaƭar, too no kuu ta moofna, xan kaaga a xoolaƭar.

⁵Oxuu duqna njong neene, fat a dap tikoorik um, a ɓogoox. Yaqankee koy, xan a xoolaƭar boo no yaar olaa.

⁶Oxuu moofna no kaa ta moof’ina, fat a dap tikoorik um, a ɓogoox. Yaqankee koy, xan a xoolaƭar boo no yaar olaa.

⁷Oxuu duqna cer um, fat a dap tikoorik um, a ɓogoox. Yaqankee koy, xan a xoolaƭar boo no yaar olaa.

⁸A duxdangaa took no kiin o qoolu, oxeene kiin fat a dap tikoorik um, a ɓogoox. Yaqankee koy, xan a xoolaƭar boo no yaar olaa.

⁹Qerxa nuu ta moofna xan a xoolaƭar.

¹⁰Oxuu duqna kaa refna yoora um mbaat ta meeɓin, fat a dap tikoorik um, a ɓogoox. Yaqankee koy, xan a xoolaƭar boo no yaar olaa.

¹¹Oxuu ta duqna, too laxadooxee, fat a dap tikoorik um, a ɓogoox. Yaqankee koy, xan a xoolaƭar boo no yaar olaa.

¹²O ƥaxañ o maxte lanq oluu ta duqna, fat a gefel, ta ref o sexe, fat a laxadel.

¹³Boo o kiin oxeene a wodna, fat a cung boo ñaal ɓetuu ƭik. Cinj kaaga, fat a dap tikoorik um, a ɓogit cer um foofi fo xoolu soo a sogkaa o xoolatin.

¹⁴No ñaal ɓetuu ndadkandeer ne, fat a xot a qoɗoxoñ a ƭak mbaat a nuukuur a ƭak, a ret mbaambir no Yaal oxe, no ndokand ne no Ƭiif ne ta xetteel, soo a coox a den o saasadax oxe.

¹⁵Fat o saasadax oxe a sadaxit a den, a leng ale nen sadax fa mbaasnoor pakaad, a lakas ale nen sadax fa ndoxel, ndax ta jofoorandin fo o Yaal oxe, yaam ke yuurna no ten.

¹⁶Boo o koor a jegna kaa yuuritna no mbaambir um, fat a ɓogoox. Yaqankee koy, xan a xoolaƭar boo no yaar olaa.

¹⁷Ndikoorik mbaat ƭool nuu keene a duqna fat a dapel. Yaqankee koy, xan a xoolaƭar boo no yaar olaa.

¹⁸Boo o koor fo o tew a mbondooxna, den ɗik fop fat a ƥogdoox. Yaqankee koy, xan a nqoolaƭar boo no yaar olaa.»

¹⁹«Boo o tew a saqna tap, ta ref ee kaa fo’oy a yuurtaa no ten, xan a dapaa boo ñaal ɓetuu ƭik. Oxuu duquuna, xan a xoolaƭar boo no yaar olaa.

²⁰No njong nuu ta wondooxna na pe ake ta saqna tap, xan naaga njong a xoolaƭar, too no kuu ta moofna, xan a xoolaƭar.

²¹Oxuu duqna njong neene, a wara o dap tikoorik um, a ɓogoox. Yaqankee koy, xan a xoolaƭar boo no yaar olaa.

²²Oxuu duqna moofir kaa ta moof’ina, a wara o dap tikoorik um, a ɓogoox. Yaqankee koy, xan a xoolaƭar boo no yaar olaa.

²³A jegangaa kaa refna took njong ne mbaat took ke ta moofna, oxuu duquuna, xan a xoolaƭar boo no yaar olaa.

²⁴O koor a wondooxangaa fo o tew oxeene saqna tap, boo fo’oy le a taƥin, xan a xoolaƭar boo ñaal ɓetuu ƭik, too no njong nuu o koor oxeene a wondooxna, xan a xoolaƭar.

²⁵Boo fo’oy no tew a yuuraa boo ñaal mayu kaa fogreerna fo tap um mbaat ta ref ee tap um kaa jol me ta war’ina o day, xan a xoolaƭar fo nuu ta miñitna fo ten, nen yaa ta saqna tap rek.

²⁶No njong nuu ta wondooxna mbaat no kuu ta moofna, xan a xoolaƭar, nen yaa ta saqna tap.

²⁷Oxuu duqna njong neene mbaat moofir keene, xan a xoolaƭar. A wara o dap tikoorik um, a ɓogoox. Yaqankee koy, xan a xoolaƭar boo no yaar olaa.

²⁸Boo fo’oy le a yuurateerna, o tew oxe a wara o cung boo ñaal ɓetuu ƭik soo a sogkaa o xoolatin.

²⁹No ñaal ɓetuu ndadkandeer ne, fat a xot a qoɗoxoñ a ƭak mbaat a nuukuur a ƭak, soo a ɓis a den maa no saasadax oxaa, no don-maax ole no Ƭiif ne o Yaal oxe a xetteel.

³⁰Fat o saasadax oxe a ɓoxot leng no tiiƭ ke nen sadax fa mbaasnoor pakaad, soo lakas ne nen sadax fa ndoxel. Neene a jofooranditkan fo o Yaal oxe yaam ke yuurna no ten too a xoolaƭar.

³¹Neene, fat nu maƭoox Ii-isra’el we da ngoƭatir fo ke waagna o xoolaƭarand a den, yaam ndik da nqon, yaa da nqoolaƭarandna Ngenand es ne refna a ndeer den.»

³²Keene refu ke hebleena no koor oxe xaɓeena jir no mbaambir um mbaat ta jeg kaa yuuritna no mbaambir um, soo a xoolaƭarnin

³³fo no tew oxe saqna tap mbaat fo’oy um a yuuraa too fogree fo tap fo o koor oxe wondooxna fo o tew oxaa xoolaƭarna.