Read NQAARIIT NE ROOG A paɗax ale 16 Bible Online

A paɗax ale 16 - NQAARIIT NE ROOG bible

A paɗax ale 16

¹A cinj ye xa ƥiy xa ƭaq axe Aaroon a ngarna mbaambir no Yaal oxe boo a nqonit maaga,[4] o Yaal oxe a laya a Moyiis ee:

²«Maƭooxi a Aaroon fee o maag of ee ba ta rokaa kam o Mbiñ onqe moƴna o ted a mbanuu feluuna, a xaañ mbaƴ ne fegteena o ten, a gar mbaambir o afnir-o-fortand ole refna took arka ne. A fi’angaan, xan a xon, yaa um feeñooxkaa kam eel le yoorooxna o afnir-o-fortand ole.

³Neeke Aaroon a waru o rokit no Mbiñ o tedu nqe: Fat a ɓisloox o nqoox, ta ref sadax fa mbaasnoor pakaad fo suk mbaal nen sadax fa ndoxel.

⁴Fat a rokoox sabadoor naa fi’teena gaare fo o njata nqaa fi’teena gaare, a singoorin cer um, a humnoox o qap o fi’te gaare soo a tañaloox kaa fi’teena gaare. Fat a ɓogoox soo a sogkaa o rokoox a den, yaam tikoorik keene kaa ted.

⁵Fat o fog ole no Ii-isra’el we a cooxin a suk pambe ƭak nen sadax fa mbaasnoor pakaad fo suk mbaal leng nen sadax fa ndoxel.

⁶Fat Aaroon a ɓoxot o nqoox onqe, ta sadaxitkaa yaam pakaad um, ndax ta jofoorand a xoox um fa mi, a jofoorand itam wiin mbind um fa mi.

⁷Fat a ɓisiid a suk pambe ƭak ake mbaambir es, mi o Yaal oxe, no ndokand ne no Ƭiif ne um xetteel.

⁸Fat a banjang a suk a ƭak akeene, ndax ta and le o Yaal oxe a jegna fo le Asasel[5] a jegna.

⁹Fat Aaroon a matandiid le o Yaal oxe a jegna soo a ɓoxotin nen sadax fa mbaasnoor pakaad.

¹⁰Suk le mbanjang ne sutanna a Asasel, fat a fi’tel njofoorand ne. Boo ta helko fo ɓisaneel a Asasel, fat a geennel ñoow mbaambir no Yaal oxe.

¹¹Fat Aaroon a ɓoxot o nqoox onqe, ta sadaxitkaa yaam pakaad um, a jofoorand a xoox um fa mi, a fi’anin itam wiin mbind um, a xiris o nqoox onqeene.

¹²Fat a jang o njaq onqaa mayna muut fo a kaagaañ fiɗel akaa naqteena took o sadaxand ole refna mbaambir es, mi o Yaal oxe, a naq itam xa ƥay xa ƭaq cuuraay fa mbelu tuñ faa fi’na mbiɗel. Fat a ɓis keene fop kaltaa mbaƴ ne fegna o mbiñ onqe moƴna o ted.

¹³Fat a yip cuuraay fee no fiɗel le, mbaambir es, mi o Yaal oxe, ndax fo suun ole na cuuraay fee a muur o afnir-o-fortand ole no arka ne no ngiɓoor ne. A fi’angaan, yaaga xonkee.

¹⁴Fat a suup nqol um no fo’oy le no nqoox onqe, a wiisin took mbaambrand ne no afnir-o-fortand ole no arka ne, no saax ole farna fo batand. Fat a wiistin nqol um itam mbaambir arka ne boo a caf ɓetaa ƭaq.

¹⁵Cinj kaaga, fat a xiris suk fambe le na ɓoxotkeel yaam pakaad ke na xeet fee soo a ɓisloox fo’oy le no mbiñ onqe moƴna o ted. Fat a fi fo fo’oy leene ne ta fi’na fo fo’oy le no nqoox onqe, a wiisin took o afnir-o-fortand ole fo mbaambir o afnir-o-fortand ole.

¹⁶Neene mat a ɓogditkaa o Mbiñ o tedu nqe no nqoolaƭar ne no Ii-isra’el we fo nanaƭar den fo tooñ den fop. Fat a fi’an ƭiif ne refna a ndeer no weene nqoolaƭarna leng kut ke.

¹⁷Ba o leng a ref kam ƭiif ne, yaa ta rokna teen, ndax ta fi njofoorand ne boo yaa ta sutooxkan, a soƥ ta jofoorand a xoox um fa mi boo a ƴut, a fi’anin itam wiin mbind um fo o fog ole no Ii-isra’el we fop.

¹⁸Bo ta sutooxaa, fat a ret farna fo o sadaxand ole refna mbaambir es, mi o Yaal oxe, soo a ɓogdin. Fat a xot no fo’oy le no nqoox onqe fo le no suk fambe le soo a ɗuumin na xa can axe no sadaxand ole fo me widuuna fop.

¹⁹Fat a wiisit fo’oy le nqol um took o sadaxand ole boo a caf ɓetaa ƭaq, a ɓogdin soo a tedlandin no nqoolaƭar ne no Ii-isra’el we.

²⁰Aaroon a ɓogdangaa o Mbiñ o tedu nqe fo Ƭiif ne fo o sadaxand ole boo a ƴut, fat a matandiid suk fambe le na ñoowaa.

²¹Fat a doon xa ƥay xa ƭaq um took xoox le no suk fambe leene soo a weejil took um njofaƭar ne no Ii-isra’el we fop fo nanaƭar den fop fo tooñ den fop, a gadin a den took xoox le no suk le. Cinj kaaga, fat o kiin oxe jileena a ɗoxin boo na koƥ-a-ƥor alaa, a raxin ta ret.

²²Neene, xan suk le a ɓisloox njofaƭar den fop kam a koƥ o njende. Suk le a raxange kam a koƥ-a-ƥor alaa,

²³fat Aaroon a rok kam ƭiif ne, a wol tikoorik ke mbi’teena gaare too ta rokoox’u a den, ye ta rokna no Mbiñ o tedu nqe, soo a doon a den maaga.

²⁴Fat a ɓogdinoor no Mbiñ o tedu soo a rokooxatin tikoorik um lakas. Cinj kaaga, fat a sutoox, a ɓoxot sadax fa ndoxel um fa fee na xeet fee. Neene, xan a jofoorand a xoox um fa mi o Yaal oxe, a fi’anin itam xeet fee.

²⁵A inoorangaa no keene, fat a dox took o sadaxand ole neeneer ke no cegel ke sadaxteena yaam a baasan pakaad.

²⁶Oxe ɓis’ina suk fambe le Asasel, fat a dap tikoorik um, a ɓogoox soo a sogkaa o rok kam saŋe ne.

²⁷O nqoox onqe fo suk fambe le sadaxteena yaam a baasan pakaad, too fo’oy le a ɓogdinoorit’el kam o Mbiñ o tedu nqe, fat a ƥisel tafil saŋe ne, soo ƭool den fo a tegeƴ den fo ke refna kam laaw ke a ndoxel maaga.

²⁸Oxe na doxkaa a den, fat a dap tikoorik um, a ɓogoox soo a sogkaa o rok kam saŋe ne.

²⁹Keeke koy, kebil kaa nu mbarna o ngay boo faw a ndefu: No ñaal xarɓaxayandeer ne no nqool ɓetuu ƭikandeer onqe fat nu ngoor, too nu njalkee dara, ta ref nuun Ii-isra’el we fo xa kataakoon axe ngenna fa nuun.

³⁰No ñaal neene xan nu njofoorandel fa mi o Yaal oxe, ƥogdel. Neene, xan nu nqoolandel no pakaad nuun fop mbaambir es.

³¹Fat a ref na nuun bes a ñootnax, too fat nu ngooraa teen. Kebil neene boo faw a refkaa.

³²O saasadax oxe dodteena diwliin fa ƭuumir, ndax ta rondand a faap um no calel no saasadax o maak, na fi’kaa njofoor ne fo ƥogdinax ne. Fat a rokoox tikoorik tedu ke mbi’teena gaare,

³³ndax ta adooxan ƥogdinax ne no mbiñ onqe moƴna o ted fo Ƭiif ne fo o sadaxand ole, a jofoorand fa mi itam saasadax we fa xeet fee fop.

³⁴Fat keene a ref na nuun kebil ñufkeer boo faw, ndax Ii-isra’el we a njofoorandel fa mi, a njeg a baasan ale no pakaad den fop jaf leng o hiid oluu refna.» Keene fop, o Yaal oxe a hebil’ina a Moyiis, a fi’’e.