Read NQAARIIT NE ROOG A paɗax ale 17 Bible Online

A paɗax ale 17 - NQAARIIT NE ROOG bible

A paɗax ale 17

¹O Yaal oxe a laya a Moyiis,

²ta daawin a Aaroon fo xa ƥeem fo Ii-isra’el we fop kebil kene:

³«Boo o Ii-isra’el a xirsitna kam saŋe ne mbaat tafil saŋe ne nqoox mbaat mbaal mbaat fambe

⁴too ɓisiran boo no ndokand naa no Ƭiif ne, ndax ta ɓoxotin o Yaal oxe nen sadax mbaambir Ngenand tedu ne ten, xan fo’oy le a gadnel o kiin oxeene. Fat oxeene kiin a sutel xeet um yaam fo’oy le ta ɓaxna na pet.

⁵Keene kaa heblel, ndax Ii-isra’el we nqirsitkatee cegel ke na xa qol axe, ndaa ndax da ƥisiidaa a den me no saasadax oxe, mbaambir no Yaal oxe no ndokand ne no Ƭiif ne soo a ƥoxot a den o Yaal oxe nen sadax fa njamsa’oor.

⁶Fat o saasadax oxe a wiis fo’oy le took o sadaxand ole no Yaal oxe refna no ndokand ne no Ƭiif ne soo a dox teen neeneer ke na felkaa tuñ bo no Yaal oxe.

⁷Neene, Ii-isra’el we ƥoxotkatee sadax roog tefee ndigil ke da sipna mbaambir den, da nandtaa a suk, ndaa xan a ndamooxat na mi ne o tew o kore’u a damoortaa no kor um. Keene xan a ref na den fo na xa taan den kebil ñufkeer muk.

⁸Fat o lay a den boog ee: ‹Boo o Ii-isra’el mbaat o gataakoon olaa genna fa nuun a ɓoxotaa sadax fa ndoxel mbaat sadax fa lakas

⁹too ɓisiran no ndokand naa no Ƭiif ne, ndax ta ɓoxotaam o ten nen sadax, oxeene kiin fat a sutel xeet fee.

¹⁰Boo o Ii-isra’el mbaat o gataakoon olaa genna fa nuun a yerna fo’oy kuu ta waagna waag o ref, mi o Yaal oxe, xam fesin a cinj, sutin a ndeer xeet fee.

¹¹Fo’oy na ñoownaa njer. Kaa um ci’in a nuun nu njiriiñooran took o sadaxand ole, ndax nu njofoorandel fa mi. Fo’oy le soom waagu o waasanit pakaad, yaam ten saqu o ñoow ole.

¹²Ten taxu um lay a nuun, nuun Ii-isra’el we yee o leng na nuun waree o yer fo’oy, too o gataakoon ole genna fa nuun itam yerkiran.

¹³Boo o leng na nuun, nuun Ii-isra’el we mbaat na xa kataakoon axe ngenna fa nuun a xaƴlookna soo a war mbuufuɗag mbaat ndiiƭ naa na ñaameel, fat a ɓax fo’oy le a lanq soo a uupin.

¹⁴Fo’oy na ñoownaa njer nuu refna. Ten taxu um lay a nuun, nuun Ii-isra’el we yee nu yerkee fo’oy mbindel nuu ta waagna waag o ref, yaam fo’oy saqu o ñoow mbindel nuu refna. Oxuu yeruuna, fat a sutel xeet fee.

¹⁵O kiin oxuu ñaamna med mbaat muumeen faa ƥaaɓaan a mbarna, ta ref o Ii-isra’el mbaat o gataakoon, fat a dap tikoorik um, a ɓogoox. Yaqanee koy, xan a xoolaƭar boo no yaar olaa. Cinj kaaga, xan a xoolat.

¹⁶Kaa koy, a dapangee tikoorik um too ɓogooxee, xan a gadoox tooñ um.› »