Read NQAARIIT NE ROOG A paɗax ale 18 Bible Online

A paɗax ale 18 - NQAARIIT NE ROOG bible

A paɗax ale 18

¹O Yaal oxe a laya a Moyiis,

²ta daawin Ii-isra’el we xa ƭelem axeeke: «Mi refu o Yaal oxe Roog nuun.

³Nu laalkee muk ke na fi’eel no saax laa Misira nu ngen’ina mbaat ke na fi’eel no saax le Kanaan um rokinkaa a nuun. Ba nu ndeef o mbaax den.

⁴Fat nu mbi ke simtuuma, ngay kebil es. Fat nu ndeef a den. Mi refu o Yaal oxe Roog nuun.

⁵Fat nu ngay kebil es fo bargal es, yaam oxuu na fadnaa a den, xan a ñoowtaa a den. Mi refu o Yaal oxe.

⁶O leng na nuun waree o wondoox fo o tew oxaa ta fogitna tigi. Mi refu o Yaal oxe.

⁷Wariro o wondoox fa ya of, yaam yaaga ta ref o niwaƭar a faap of. Xan a ref itam o niwaƭar a ya of.

⁸Wariro o wondoox fo o leng oxaa refna o tew faap of, yaam yaaga ta ref o niwaƭar a faap of.

⁹Wariro o wondoox fo o cigeen of, ta ref o ƥiy faap of mbaat o ƥiy ya of, a yarooxangee fa wo no mbind leng kut ne sax oo.

¹⁰Wariro o wondoox fo o ndaan of o ndew, ta ref o ƥiy no ƥeef o ngoor mbaat o ƥeef o ndew, yaaga ta ref o niwaƭar a xoox of.

¹¹Wariro o wondoox fo o ƥiy o ndew no tew faap of. O ƥiy faap of a refu, yaaga boog o cigeen of oo.

¹²Wariro o wondoox fa faap-o-tew of, yaam oxaa fogna fa faap of tigi a refu.

¹³Wariro o wondoox fa yaa ndeɓ mbaat yaa maak of, yaam oxaa fogna fa ya of tigi a refu.

¹⁴Wariro o wondoox fo o tew faap ndeɓ of, yaam yaa ndeɓ of oo. Wariro o wondoox itam fo o tew faap maak of, yaam yaa maak of oo. O fi’angaan, xan a ref o niwaƭar a faap of feene.

¹⁵Wariro o wondoox fo o tew no ƥeef, yaam o seemir of oo.

¹⁶Wariro o wondoox fo o tew no ndeɓ of mbaat o tew no maag of, yaam yaaga ta ref o niwaƭar o ndeɓ of mbaat o maag of.

¹⁷Wariro o wondoox fa yaay fo o ƥeem mbaat o ndaan um o ndew, ta ref o ƥiy no ƥeem o ngoor mbaat o ƥiy no ƥeem o ndew, yaam fog tigi a ndefu, too kaaga a sednooxa.

¹⁸Wariro o dolnir fo o ndeɓ mbaat o maag no teef, yaa oxeene a maadna o ñoowaa, yaam kaaga xan a ɓisiid mbañir.

¹⁹Wariro o wondoox fo o tew, yaa ta saqna tap, yaam kaa xoolaƭar.

²⁰Wariro o wondoox fo o tew no kend of, yaam kaaga xan a tax o xoolaƭar.

²¹Wariro o doxan a Molok fee Kaakanaan we a mbi’na roog den o leng na xa ƥeef nen sadax, yaam o fi’angaan, xan o niwaƭar gon es. Mi refu o Yaal oxe Roog of.

²²Wariro o wondoox fo o koor ne o tew a wondoorteel. Kaaga a pi a cednooxu yoo.

²³Wariro o wondoox fo njegel, yaam yaaga xan o xoolaƭar. Neene itam, o tew o leng waree o wondoox fo njegel. Kaaga njaxasrand a refu.

²⁴Ba a leng na pi akeene a tax nu nqoolaƭar, yaam a pi akeene fop nqoolaƭarandu qeet ke um raxkaa mbaambir nuun.

²⁵Saax le fa xoox um a xoolaƭara yaam den. Xam xaw we ngenna teen yaam njofaƭar den soo sut a den.

²⁶Nuun Ii-isra’el we boog mbaat xa kataakoon axe ngenna fa nuun, ngayyo kebil es fo bargal es too mbañ o mbi cednooxu keene fop.

²⁷Keene ndefu a pi a cednooxu ke we adooxna a nuun no saax le a mbi’na, too saax le a xoolaƭara yaam keene.

²⁸Mbootooxyo, yaam ndik um sut a nuun saax le, yaa andoona yee kaa nu nqoolaƭarandin, ne sutit’uuma qeet ke ndef’ina teen yaaga nu ngenafuliran.

²⁹Fop we na mbi’kaa a leng na pi a cednooxu keene, fat da sutel a ndeer xeet fee.

³⁰Neene boog, fat nu ngay bargal es, too nu mbi’kee a leng na pi a cednooxu ke mbi’oogeena yaaga nu ngarafulee, yaam ndik nu nqoolaƭar, yaa nu njimbooxna teen. Mi refu o Yaal oxe Roog nuun.»