Read NQAARIIT NE ROOG A paɗax ale 19 Bible Online

A paɗax ale 19 - NQAARIIT NE ROOG bible

A paɗax ale 19

¹O Yaal oxe a laya a Moyiis,

²ta daawin o fog ole no Ii-isra’el we xa ƭelem axeeke: «Fat nu ted, yaam kaam ted, mi o Yaal oxe Roog nuun!

³Oxuu refna na nuun fat a niw a faap um fa ya um soo a gay bes fee na ñootnax ale. Mi refu o Yaal oxe Roog nuun.

⁴Nu ngeleerooxkee farna fo pangool ke muk, too nu mbi’ankee a qoox nuun roog cawne. Mi refu o Yaal oxe Roog nuun.

⁵Boo nu ƥoxotaxam sadax fa njamsa’oor, mi o Yaal oxe, fat nu mbi’tin ne ta waritna, ndax sadax nuun a jaɓel.

⁶A tegeƴ ake no njegel ne a mbaage o ñaam na bes fee ta sadaxteena mbaat no feet olaa, ndaa ke na yoqkaa no ñaal ndadkandeer naa, fat a doxel.

⁷Boo andoona yee a ñaame no ñaal ndadkandeer ne, sadax feene jaɓkaand, yaam a tegeƴ ake kaa mboɓat.

⁸Oxe na ñaamkan, xan a gadoox tooñ um, yaam kaa niwaƭar ke kesaneema, mi o Yaal oxe. Oxeene kiin fat a sutel xeet fee Isra’el.

⁹Boo nu saxadaa no saax nuun, fat nu nqaƴ cat ke na xa qol axe nuun, mbañin o saxad, too nu ngisaatooxkee xa yaƥ axe yoqna no qol ole.

¹⁰Nu mboqkee itam xa sondatin axe no taxar biiñ ke nuun, too nu ngisaatooxkee xa tim axe samna a lanq. Fat nu nqaƴan keene rool we fo xa kataakoon axe. Mi refu o Yaal oxe Roog nuun.

¹¹Ba o leng na nuun a guuɗ mbaat ta maaɓaa mbaat ta ƴiƴtaa o kend um.

¹²Nu ndaaɓooritkee gon es na xa maaƥ, yaam yaaga xan nu niwaƭar gon es. Mi refu o Yaal oxe Roog nuun.

¹³Ba nu ñoowit onj no kiin o lakas, too ba nu njaɓ tig um. Ba nu mbe muk fo ndabid no saasaadnax nuun.

¹⁴Ba nu mben oxe ramna, too ba nu ndoon mbaambir o puul oxe kaa waaguuna o tolofnoor, ndaa saɗaraamoo. Mi refu o Yaal oxe Roog nuun.

¹⁵Ba nu ngate’it njofaƭar, mbarit o neewu doole xe mbaat o yaal doole xe, ndaa ngate’ityo o cofel.

¹⁶Ba nu ñu oxe nu mbogitna xeet. Ba nu njamb o kend nuun tefee ndigil kaa waaguuna o warnoor. Mi refu o Yaal oxe.

¹⁷Ba o leng a saqan o pog um o njaaku-kam, ndaa fat a asin. A fi’angiran, xan a gadoox tooñ um.

¹⁸Ba nu ndabdinoox, too ba nu mbuuxan o pog nuun. Fat oxuu refna a fex o kend um nen a xoox um. Mi refu o Yaal oxe.

¹⁹Fat nu ngay kebil es kene: Nu yoonandkee na xa siir nuun xa qos cegel ƭik pogreer. Nu nduufkee na xa qol nuun xa qos xa ƭaq ax, too nu ndokooxkee ñirax kaa ndiwteena xa ƥaak xa ƭaq xa pogreer.

²⁰Boo o koor a wondooxna fo o ceefeer oxaa refna o toog no koor o lakas, too oxeene ceefeer wataand boo a jeg a xoox um, fat a nqawel, ndaa mbarkaand, yaam o tew oxe o ceefeer a maadu o refaa.

²¹O koor oxe a wara o ɓis no ndokand ne no Ƭiif ne um xetteel suk mbaal laa ta ɓoxotkaxam nen sadax fa nqendandoor.

²²Fat o saasadax oxe a ɓoxot suk le na sadax fa nqendandoor fee, a jofoorandaam fo o koor oxe. Neene, xan a waasanel bakaad fee ta fi’na.

²³Yaa nu ndokkaa no saax le Kanaan soo nduuf teen xa qos taxar tiirim kuu ndefna, fat nu ƭeet xa tim axe nen qoolaƭaru boo xa kiid xa tadaq. Nu ñaamkee a den boog na xa kiid axeene.

²⁴Ke da ndimkaa no hiid o nahkandeer olaa fop, fat um kesanel o ten nen a simat, mi o Yaal oxe.

²⁵No ke xotitna no hiid o ɓetkandeer ole soom nu mbaagkaa o ñaam xa tim den. Nu mbi’tangaan neene, kaa moƴkaa o ndimaa. Mi refu o Yaal oxe Roog nuun.

²⁶Nu ñaamkee a tegeƴ akaa fo’oy le a siidnaandeena. Ba nu ñango’aa mbaat nu ƭeetaa.

²⁷Nu nqaƴkee dup no xoox nuun, too nu nduuskee itam xa lak axe no raatam nuun,

²⁸too nu ndibooxkee muk yaam o qon, nu ñaasooxkee itam. Mi refu o Yaal oxe.

²⁹Nu niwaƭarkee xa ƥiy xa tew axe nuun, yaa nu ndiñaa a den da njaga’ik, yaam ndik saax le a jaga’aa soo a may fo a pi a cednooxu.

³⁰Ngayyo bes fee na ñootnax ale hebluuma a nuun too niw Mbind tedu ne mi. Mi refu o Yaal oxe.

³¹Ba nu ƈufginoox xon we, too ba nu ndeer dara fo ɗeet we. Ba nu ƥaal a den, yaam ndik da nqoolaƭarand a nuun. Mi refu o Yaal oxe Roog nuun.

³²Naangyo o ngeenooxaa fo o yarax mbaambir nogoy we, niw a den too lalit na pesoorooƭ nuun ee nu niwaxam. Mi refu o Yaal oxe Roog nuun.

³³Boo o gataakoon a geniidna me nuun no saax nuun, ba nu ñoowit onj um.

³⁴Fat nu mbesoor fo o gataakoon ole refna fa nuun nen o kentand nuun. Fat nu mbexin nen a qoox nuun. Fat nu mbetandoox ee nu mosa o ndef xa kataakoon no saax laa Misira. Mi refu o Yaal oxe Roog nuun.

³⁵Nu mbi’kee njofaƭar leng, ta ref yaa nu ngate’aa mbaat nu liiƥaa o cigdel mbaat nu eedtaa a poox mbaat o landibaas.

³⁶Fat nu njeg liiƥir cagu fo a poox a cagu fo xa landibaas xa cagu. Mi refu o Yaal oxe Roog nuun sutitna a nuun no saax laa Misira.

³⁷Fat nu ngay kebil es fo bargal es fop, ndeef a den. Mi refu o Yaal oxe.»