Read NQAARIIT NE ROOG A paɗax ale 20 Bible Online

A paɗax ale 20 - NQAARIIT NE ROOG bible

A paɗax ale 20

¹O Yaal oxe a laya a Moyiis,

²ta daawin Ii-isra’el we xa ƭelem axene: «Boo o leng no Ii-isra’el we mbaat o gataakoon olaa genna Isra’el, a ɓoxotna a Molok o leng na xa ƥeem, fat a warel. We ngenna no saax le fat a mbartin a kac.

³Mi fa xoox es xam fes a cinj o kiin oxeene, sutin xeet um, yaam ne ta ɓoxotna a Molok o leng na xa ƥeem, a xoolaƭarand Mbind tedu ne mi soo a niwaƭar gon tedu es.

⁴Boo we ngenna no saax le a uupna a pi ale no xeene kiin ɓoxotna o leng na xa ƥeem a Molok, yaam a mbañan o mbar,

⁵mi fa xoox es xam fes a cinj oxeene kiin fo ƥasil um, sut a den xeet den. Neene um fi’kaa itam fop we na yoonkaa fo ten na paɗax ale da ƥoxotna a Molok.

⁶Boo o leng na nuun a gore’aƭarna took o ƴufginooxaa xon we mbaat ta reer tig fo ɗeet we, xam fes a cinj oxeene kiin, sutin xeet um.

⁷Fat nu ted boog, yaam mi refu o Yaal oxe Roog nuun.»

⁸«Fat nu ngay kebil es too ndeef a den. Mi refu o Yaal oxe jilna a nuun, ndax nu ndef xeet fa tedu es.

⁹Boo o kiin na nuun a salooxna a faap um mbaat a ya um, fat a warel. Ten warnooru a xoox um, yaam ne ta salooxna a faap um mbaat a ya um.

¹⁰Boo o koor a seeqna fo o tew no kend um, den ɗik fop fat a mbarel.

¹¹Boo o koor a wondooxna fo o tew faap um, a niwaƭara a faap um. Den ɗik fop fat a mbarel, yaam a jaga fa den.

¹²Boo o koor a wondooxna fo o tew no ƥeem, den ɗik fop fat a mbarel. A mbi’a cednooxu. Fa nqon den a jaga fa den.

¹³Boo o koor a wondooxna fo o koor o kend um ne o tew a wondoorteel, den ɗik fop a mbi’a o njombe. Fat a mbarel, yaam a jaga fa den.

¹⁴Boo o koor a dolinna a yaay fo o ƥeem, a fi’a cednooxu. O koor oxe fo rew ɗik we fat a ndoxel, ndax aleene pi jegkatee a ndeer nuun.

¹⁵Boo o koor a wondooxna fo njegel, fat a warel, too fat nu mbar njegel ne itam.

¹⁶Boo o tew a yoonna fo njegel, fat o tew oxe fo njegel ne a mbarel. A mbare o mbar, yaam a jaga fa den.

¹⁷Boo o koor a dolnirna fo o cigeen um, ta ref o ƥiy o ndew faap um mbaat o ƥiy o ndew ya um, a mbondooxangaa, a mbi’a cednooxu. Fat a saŋkel na kid no gentand den. O koor oxe a wondooxa fo o cigeen um, ten taxu a qaw um a jaga fo ten.

¹⁸Boo o koor a wondooxna fo o tew oxaa saqna tap, den ɗik fop fat a sutel xeet fee Isra’el, yaam ne da ngultirna.

¹⁹Nu mbaree o mbondoox fa yaa ndeɓ mbaat yaa maak nuun mbaat fa faap-o-tew nuun, yaam yaaga ta ref o hulit o pog of tigi. We mbi’na keene koy, xan a ngadoox tooñ den.

²⁰Boo o koor a wondooxna fo o tew faap ndeɓ um mbaat fo o tew faap maak um, a niwaƭara a faap um feene. Xan a ngadoox tooñ den, a nqon too njegkee xa ƥiy.

²¹Boo o koor a jangna o tew no ndeɓ um mbaat o tew no maag um, kaaga qoolaƭaru yoo. Den ɗik fop xan a nqon too njegkee xa ƥiy, yaam o koor oxe kaa niwaƭar o ndeɓ um mbaat o maag um.

²²Fat nu ngay kebil es fo bargal es fop too ndeef a den, ndax saax le um ɓiskaa a nuun, dalin a nuun maaga, xuqkee a nuun.

²³Ba nu ndeef muk fo mbaax ne no qeet ke um raxkaa mbaambir nuun, yaam a mbi’a paaxeer keene fop boo ten taxu da maasataam.

²⁴Lay’aam a nuun koy ee: ‹Nuun na lamkaa lanq ke den. Xam ci’in a nuun, nu njegkin. Saax laa fo sis fo suum a ndaxritaa yoo!› Mi refu o Yaal oxe Roog nuun, jektirandna a nuun fo qeet lakas ke.

²⁵Fat nu ngay njektir ne refna a ndeer muumeen qoolu ke fo qoolaƭaru ke, a ndeer tiiƭ qoolu ke fo qoolaƭaru ke. Ba nu nqoolaƭarand a qoox nuun, yaa nu nduqaa muumeen ke mbaat tiiƭ ke mbaat ƥood ke layuuma a nuun ee kaa nqoolaƭar.

²⁶Fat nu ted, kesanel a mi, yaam mi o Yaal oxe, kaam ted. Kaam jektirand a nuun fo qeet lakas ke, ndax nu ndefanaam.

²⁷Boo o koor mbaat o tew a merna o ɗeetanaa lakas we xon we mbaat cini ke, fat a warel. Fat a wartel a kac, yaam a jaga fo ten.»