Read NQAARIIT NE ROOG A paɗax ale 22 Bible Online

A paɗax ale 22 - NQAARIIT NE ROOG bible

A paɗax ale 22

¹O Yaal oxe a laya a Moyiis ee:

²«Maƭooxi a Aaroon fo xa ƥeem, ndax da and a mbane da mbarna o mbootoox tig tedu ke Ii-isra’el we a kesanaxama, ndax niwaƭarkee gon tedu le mi. Mi refu o Yaal oxe.

³Layi a den ee: Boo o kiin no kurcala nuun, no suk nuu ta refna ref a xoolaƭarna soo a matiid sadax tedu ke Ii-isra’el we a kesanaxama, fat oxeene kiin a sutel mbaambir es. Mi refu o Yaal oxe.

⁴O leng no kurcala le Aaroon oxaa saqna a tik-a-maak mbaat mbaambir um a yuuraa, waree o ñaam sadax tedu ke, a refangeerna kaa ɓogdinoox. Neene a refitkaa itam no xaa duqna o kiin oxaa o dal a xoolaƭarandna mbaat no xe tig a yuuritna no mbaambir um

⁵mbaat no xuu duqna tiimbel kaa na xoolaƭarnaa mbaat o kiin oxaa xoolaƭarna fo kuu na xoolaƭarnaa.

⁶Oxuu duqna tig no keene, xan a xoolaƭar boo no yaar olaa too waree o ñaam no sadax tedu ke, ndaa fat a ɓogoox.

⁷Xan a xoolat a cinj yaa njeeƈ ne a mudna. Maaga, a waaga o ñaam no sadax tedu ke, yaam ñaamel um oo.

⁸O saasadax waree o ñaam med mbaat muumeen faa ƥaaɓaan a warna. A fi’angaan, xan a xoolaƭar. Mi refu o Yaal oxe.

⁹Saasadax we a mbara o ngay bargal es, ndax ñaamel taxkee den o bakaad. A niwaƭarangaa sadax tedu ke, xan a nqon. Mi refu o Yaal oxe tedlandna a den.

¹⁰Oxuu fogeerna no saasadax we, waree o ñaam no sadax tedu ke, a refangaa o kenar mbaat o saadlaand um sax oo.

¹¹Kaa koy, o paɗ oxaa o saasadax oxe a jikitna xaaliis fo we ndimteena no mbind um itam, a mbaaga o ñaam no ñaamel ke ten.

¹²Boo o ƥiy o ndew no saasadax a dolnirna fo xaa fogeerna na den, waagkatee o ñaam no sadax tedu ke.

¹³Kaa koy, o ƥiy o ndew no saasadax a refangaa o ñaaw mbaat ta waasel too jegee xa ƥiy soo a genatinik no mbind faap um, nen ye ta dolooxafuleerna, a waaga o ñaam no ñaamel ke faap um. Kaa jolna keene koy, oxaa fogeerna na den, ñaamkee teen muk.

¹⁴Boo o kiin a ñaamna sadax tedu ke took o ñak-o-and, a wara o dakin o saasadax oxe kaa fodirna fo ke ta jangna, a ɓaat teen a qaaj a ƥetkandeer ale.

¹⁵Saasadax we mbaree o niwaƭar sadax tedu ke Ii-isra’el we a kesanaxama, mi o Yaal oxe.

¹⁶Mbaree o ngadin Ii-isra’el we tooñ, yaa da nqaƴna a den da ñaam no sadax tedu ke da ƥoxotaxama, mi o Yaal oxe tedlandna sadax keene.»

¹⁷O Yaal oxe a laya a Moyiis

¹⁸ta yegin a Aaroon fo xa ƥeem fo Ii-isra’el we fop kene: «Boo o Ii-isra’el mbaat o gataakoon olaa genna fa nuun a bugaxama o ɓoxot sadax fa ndoxel, mi o Yaal oxe, ndax ta fadnitin a tegit mbaat ta fi’an no fud o letu,

¹⁹fat a xot njegel ngoor naa jegeerna sik fa leng, ta ref nqoox mbaat suk mbaal mbaat suk fambe, ndax sadax um a jaɓel.

²⁰Nu sadaxitkee njegel leng naa jegna sik, yaam yaaga jaɓankinum a nuun.

²¹Boo o kiin a bugaxama o ɓoxot njegel maak mbaat njegel ndeɓ nen sadax fa njamsa’oor, ndax ta fadnitin a tegit mbaat ta fi’an no fud o letu, fat njegel ne a ñak sik, ndax um jaɓin. Jegkee sik fa leng no ten.

²²Nu sadaxitkee muk njegel mbuulu mbaat naa na laƴaa mbaat naa tig a watna no njer um mbaat naa dilaƥaalna mbaat naa saqna jir lakas no cer um. Nu ƥoxotkiraam o ten nen sadax fa ndoxel took o sadaxand ole mi.

²³Nqoox mbaat mbaal mbaat fambe laa xarna mbaat laa jegna sik a waage o sadaxit no fud o letu, ndaa jaɓkaand, yaa ta refna sadax fa mbadnir a tegit.

²⁴Nu ƥoxotkiraam njegel naa ɓujeena fo nuu ta saxitna yoo. Nu mbi’kee keene cegel ke muk, yaa nu ndokkaa kam saax nuun.

²⁵Nu njaɓankee o kenar oxe sax njegel nandu neene, ndax nu ƥoxotaam o ten nen ñaamel es, mi fee Roog nuun, yaam kaa da ngaañel, a njeg sik. Nu mbi’angaan, jaɓankinum a nuun.»

²⁶O Yaal oxe a layahina a Moyiis ee:

²⁷«O xeel mbaat o mbote a rimange, fat a xaƴel fa ya um boo ñaal ɓetuu ƭik. No ke xotitna no ñaal ɓetuu ndadkandeer ne a doonoox, a waage o ɓoxot a mi o Yaal oxe, nen sadax fa ndoxel.

²⁸Kaa koy, nu nqiriskee naak mbaat mbaal mbaat fambe fo o ƥeem ñaal leng kut ne.

²⁹Boo nu ƥoxotaxam sadax fa ngidmir, fat nu mbi’tin ne heblitanuuma a nuun, ndax um jaɓin.

³⁰Fat njegel ne a ñaamel a koom-fa-koom. Baa dara teen a fe. Mi refu o Yaal oxe.

³¹Fat nu ngay kebil es too ndeef a den. Mi refu o Yaal oxe.

³²Nu niwaƭarkee gon tedu le mi, ndax um tedlandel a ndeer nuun, nuun Ii-isra’el we. Mi refu o Yaal oxe tedlandna a nuun, ndax nu ndef xeet es.

³³Mi o mat suttu a nuun no saax laa Misira, ndax um ref Roog nuun. Mi refu o Yaal oxe.»