Read NQAARIIT NE ROOG A paɗax ale 23 Bible Online

A paɗax ale 23 - NQAARIIT NE ROOG bible

A paɗax ale 23

¹O Yaal oxe a laya a Moyiis

²ta yegin Ii-isra’el we kene: «Qew ke mi, mi o Yaal oxe, nu mbugko lambnaa, xan a ndef xa qet xa tedu. Keeke ndefu qew ke mi:

³Pes ɓetuu fa leng mbare o njalaa, soo bes fa ɓetuu ƭikandeer fee a ref bes fee na ñootnax ale. Fat a jegaa teen o xet o tedu. Nu njalkee teen dara, yaam a ñootnax es oo, mi o Yaal oxe. Fat nu kesanaam o ten muu nu mbaagna o ngen.

⁴Keeke ndefu qew lakas ke mi, mi o Yaal oxe, xa qet xa tedu xe nu mbugko lambnaa no baxtu ke ngapeena.»

⁵«No ñaal xarɓaxay fo ñaal nahkandeer ne no nqool o eetaand onqe no hiid ole, na kid-a-caɓru kaa, fat nu ndoofandanaam Xew fee na colandax ale, mi o Yaal oxe.

⁶No ñaal xarɓaxay fo ñaal ƥetkandeer ne no nqool o leng kut onqe, fat nu ndoofandanaam Xew fee no puuru canja’e ke. Fat nu ñaamaa puuru canja’e boo ñaal ɓetuu ƭik.

⁷No ñaal eetaand ne, fat nu njeg o xet o tedu. Nu njalkee dara no ñaal neene.

⁸No ñaal nuu refna no ñaal ɓetuu ƭik keene, fat nu ƥoxotaxam sadax fa ndoxel, mi o Yaal oxe. No ñaal ɓetuu ƭikandeer ne, fat nu njeg o xet o tedu. Nu njalkee teen dara.»

⁹O Yaal oxe a laya a Moyiis

¹⁰ta yegin Ii-isra’el we kene: «Yaa nu ndokkaa no saax le um ci’kaa a nuun boo a saxad ale a fad, fat nu ƥisiid o saasadax oxe xa yaƥ axe nu eetkaa o saxad.

¹¹Fat o saasadax oxe a yaand a den mbaambir es, mi o Yaal oxe, ndax da njaɓel. Fat a yaandin no ñaal ne na reefankaa bes fee na ñootnax ale.

¹²No ñaal leng kut neene fat nu ƥoxotaam, mi o Yaal oxe, o njuk o mbaal onqaa jegna o hiid, a ñak sik nen sadax fa ndoxel.

¹³Fat nu yoonandtin ngap kilo ɓetuu fa leng mbiɗel kaa mbosolteena diwliin nen sadax fa ndoxel, a fel tuñ bo na mi, mi o Yaal oxe, yoonandtin itam o liitar fa genwal biiñ.

¹⁴Nu ñaamkee saaƈ qas mbaat o yaƥ o juɗe mbaat o fonq boo no ñaal naa nu ƥisiidkaxam sadax feene, mi fee Roog nuun. Muu nu mbaagna o ngen, fat nu ngay kebil neene no suk nuu refna.»

¹⁵«Fat nu lim pes ɓetuu ƭik takooxiidu, nqotit no ñaal naa reefanna bes fee na ñootnax ale refna ref bes fee nu ƥisiid’ina xa yaƥ axe nu eetna o saxad.

¹⁶Fat nu lim ñaal qarɓeen ƥetik boo no feet olaa na bes a ñootnax fa ɓetuu ƭikandeer faa, soo nu ndakoox o ƥoxotaam sadax tuufe-duufe qas.

¹⁷Fat nu nqotit no mbind nuun xa kaf xa ƭaq axaa mbi’teena mbiɗel, ƥisiid a den, ƥoxotaam a den. Fat o gaf oluu refna a fi’tel ngap kilo tadik soo a juɗtel poɗaxnir. Fat da ngat no ke um eetkeel o ɓoxot no tuufe-duufe ke nuun.

¹⁸Kaa jolna xa kaf axeene, fat nu ƥoxot fo njuk fo mbaal ɓetuu ƭik naa njegeerna sik fa leng too a njeg o hiid fo nqoox ndeɓ fo a suk paal a ƭak. Fat nu ƥoxotaam a den nen sadax fa ndoxel, da yoonandtel mbiɗel ke fa biiñ fee. Sadax fa mbelu tuñ a refkaa na mi, mi o Yaal oxe.

¹⁹Fat nu ndoon teen sadaxit suk fambe, ndax nu njeg a baasan pakaad, sadaxit itam fo njuk mbaal fo ƭik naa njegna o hiid nen sadax fa njamsa’oor.

²⁰Fat o saasadax oxe a ɓoxot a den mbaambir es, a yaand a den fo xa kaf axe ngatna no ke eeteena o saxad fo fo njuk fo mbaal fo ƭik ne. Fat a kesanel a mi, mi o Yaal oxe, too o saasadax oxe na jegkan.

²¹No ñaal leng kut ne, fat nu lambin o xet o tedu. Nu njalkee dara no ñaal neene. Muu nu mbaagna o ngen, fat nu ngay kebil neene no suk nuu refna.

²²Boo nu saxadaa no saax nuun, fat nu nqaƴ cat ke na xa qol axe nuun, mbañin o saxad, too nu ngisaatooxkee xa yaƥ axe yoqna no qol ole. Fat nu nqaƴan keene rool we fo xa kataakoon axe. Mi refu o Yaal oxe Roog nuun.»

²³O Yaal oxe a laya a Moyiis

²⁴ta yegin Ii-isra’el we kene: «No ñaal eetaand ne no nqool o ɓetuu ƭikandeer onqe, fat nu njeg bes faa nu ñootnooxkaa, bes fa mbetandoor faa nu mbugko luuƥaa fo o xet o tedu.

²⁵Nu njalkee dara a koom, too fat nu ƥoxotaam sadax fa ndoxel.»

²⁶O Yaal oxe a laya a Moyiis ee:

²⁷«Ñaal xarɓaxayandeer ne no nqool o ɓetuu ƭikandeer onqeene na refkaa Bes fa maak fee na baasan ale no pakaad ke. Fat nu njeg teen o xet o tedu, ngoor too ƥoxotaam sadax fa ndoxel.

²⁸Nu njalkee dara no ñaal neene, yaam bes a baasan a refu, faa nu njofoorandkeel fa mi, mi o Yaal oxe Roog nuun.

²⁹O kiin oxuu hooreerna no ñaal neene, fat a sutel a ndeer no fog um.

³⁰O kiin oxuu jalna tig no ñaal neene, xam palin a ndeer xeet fee Isra’el.

³¹Nu njalkee teen dara. Muu nu mbaagna o ngen, fat nu ngay kebil neene no suk nuu refna.

³²Fat a ref na nuun bes faa nu ñootnooxkaa, too fat nu ngooraa teen, no kaa xotitna no kirand naa no ñaal ɓetuu nahkandeer naa no nqool onqe boo no feet kirand olaa. Fat nu ngay bes a ñootnax aleene.»

³³O Yaal oxe a laya a Moyiis

³⁴ta yegin Ii-isra’el we kene: «No ke xotitna no ñaal xarɓaxay fo ñaal ƥetkandeer ne no nqool o ɓetuu ƭikandeer onqeene, fat nu ndoofandanaxam, mi o Yaal oxe, Xew fee no ƭiif ke boo ñaal ɓetuu ƭik.

³⁵No ñaal eetaand ne, fat nu njeg o xet o tedu. Nu njalkee dara a koom.

³⁶Ñaal nuu refna, fat nu ƥoxotaxam sadax kaa ndoxeena boo ñaal ɓetuu ƭik. No ñaal ɓetuu ndadkandeer ne, fat nu njeg o xet o tedu, too fat nu ƥoxotaam sadax toxel. Keene na refkaa a beg ale na xew fee, too nu njalkee teen dara.

³⁷Keene ndefu qew ke fo xa qet xa tedu xe nu mbugko ndoofandanaxam, mi o Yaal oxe, ndax nu ƥoxotaxam sadax kaa ndoxeena mbaat sadax no tuufe-duufe ke mbaat sadax fa njamsa’oor mbaat sadax biiñ, fuu refna teen a fi’el na bes fee ta hapeena.

³⁸Kaa jolna sadax keene, fat nu ƥoxotaxam sadax ke no pes a ñootnax ke fo ci’it nuun fo sadax ke nuun fop, nu mbadnitaa a tegit mbaat nu mbi’an no fud o letu.

³⁹No ñaal xarɓaxay fo ñaal ƥetkandeer ne no nqool o ɓetuu ƭikandeer onqe, a cinj yaa nu saxadna duufe nuun boo ƈut, fat nu ndoofandanaam xew, mi o Yaal oxe boo ñaal ɓetuu ƭik. Ñaal eetaand ne fo ñaal ɓetuu ndadkandeer ne xan a ndef pes kaa nu ñootnooxkaa.

⁴⁰No ñaal eetaand ne, fat nu mbaaƭ xa tim xa paax fo a naaq keec fo xa yar taxar niɓu fo qawul soo mbelakinooxaa mbaambir es, mi o Yaal oxe Roog nuun, boo ñaal ɓetuu ƭik.

⁴¹O hiid oluu refna, fat nu ndoofandanaxam ndoofeen neene boo ñaal ɓetuu ƭik no nqool o ɓetuu ƭikandeer onqe. Fat nu ngay kebil neene no suk nuu refna.

⁴²No pes keene, fat nu ngen kam ƭiif, nuun Ii-isra’el we fop,

⁴³ndax xa taan nuun a and ee gennooraam a nuun kam ƭiif, nuun Ii-isra’el we, a cinj ye sutuuma a nuun no saax laa Misira. Mi refu o Yaal oxe Roog nuun.»

⁴⁴Neene mat Moyiis a yegnit’u Ii-isra’el we qew ke da mbarna o ndoofandan o Yaal oxe.