Read NQAARIIT NE ROOG A paɗax ale 24 Bible Online

A paɗax ale 24 - NQAARIIT NE ROOG bible

A paɗax ale 24

¹O Yaal oxe a laya a Moyiis ee:

²«Hebli Ii-isra’el we da ƥisiidong diwliin oliiw fa nole fee moƴna o faax, ta yipeel na xa lampa xe na pagal ale, ndax kirand nuu refna da ngeƥandeel.

³Fat Aaroon a topatooxaa a den kam Ƭiif ne um bugko xetteel, mbaambir mbaƴ ne na fegkaa arka ne no ngiɓoor ne, ndax da mbe’aa no kaƥ mbaambir es, mi o Yaal oxe. Fat nu ngay kebil neene no suk boo no suk.

⁴Fat Aaroon a topatooxaa xa lampa xe na pagal ale fi’teena wurus fa nqoolu, ndax no yeng oluu refna da kaƥaa mbaambir es, mi o Yaal oxe.»

⁵«Fat o xot mbiɗel, juɗ teen xa kaf xarɓaxay fo xa kaf xa ƭaq, o gaf oluu refna a fi’tel ngap kilo ɓetuu fa leng.

⁶Fat o fi a den tondrand ƭik took a taabul wurus fa nqoolu le refna mbaambir es, mi o Yaal oxe, ndondrand nuu refna a saq xa kaf ɓetaa fo leng.

⁷Fat o doon cuuraay no ndondrand nuu refna, softin xa kaf axe, doxanaam o ten nen betandoor.

⁸Na bes a ñootnax aluu refna, fat xa kaf xa nand neene a ndondrandel mbaambir es, mi o Yaal oxe. Keene xan a ref kebil ñufkeer muk no ngiɓoor ne mi fa nuun, nuun Ii-isra’el we.

⁹Aaroon fo xa ƥeem na njegkaa a den. Fat a ñaamtaa a den no mbiñ o tedu, yaam kaa ted bo. Keene xan a refaa kili a las den, den fo xa taan den no sadax ke um bugko ɓoxoteel.»

¹⁰Bes, ndaawir a jega kam saŋe naa a ndeer o Ii-isra’el fo o ƥiy no tew o Ii-isra’el oxaa dolooxanoogna o Miimisira.

¹¹O tew oxeene Selomit a ne’’e, a ref o ƥiy Dibiri na carind ale Dan. O ƥeem kaa wen’u a Roog, a salooxin no ndaawir neene, too ndak fo ndak a ɓise maa Moyiis.

¹²A yetooxooge, a cungaa Roog a heblit ke helna no ten.

¹³Maaga, o Yaal oxe a laya a Moyiis ee:

¹⁴«Sutiidi o saasalax oxeene saŋe ne. Fat fop we nanuuna ta wenaa gon es, a ndoon xa ƥay den took xoox um, soo o fog ole no Ii-isra’el we fop a mbartin a kac.»

¹⁵Yegni Ii-isra’el we kene itam: «O kiin oxuu salooxna a Roog um, xan a gadoox bakaad feene.

¹⁶Oxuu wenna gon le no Yaal oxe, fat a warel. O fog ole no Ii-isra’el we fop fat a mbartin a kac. Ta ref o gataakoon mbaat oxe fogna na xeet fee, fat a xon, yaam ne ta wenna gon le Roog.

¹⁷Oxuu warna o kiin, fat a warel.

¹⁸Oxuu warna njegel no kiin o lakas, fat a rabditin naa na ñoowaa.

¹⁹Boo o kiin a gaañna o kend um, fat a fi’el leng kut ke ta fi’na oxeene.

²⁰Ƥolax na bugko rabdaa ƥolax, a ngid a rabdaa a ngid, ñiiñ a rabdaa ñiiñ. Fat a doonel a ƭomaand a leng kut ale ta fi’na o kend um.

²¹Oxuu warna njegel, fat a rabdin, ndaa oxuu warna o kiin, fat a warel.

²²Nuun fop na mbogkaa kebil leng kut ke, ta ref o gataakoon mbaat oxaa fogna na xeet fee, yaam mi refu o Yaal oxe Roog nuun.»

²³A cinj ye Moyiis a daawinna Ii-isra’el we kebil keene, weene a suta o kiin oxe wen’ina a Roog, a ƥisin tafil saŋe naa soo a mbartin a kac. Neene a mbi’tu ke o Yaal oxe a hebil’ina a Moyiis.