Read NQAARIIT NE ROOG A paɗax ale 25 Bible Online

A paɗax ale 25 - NQAARIIT NE ROOG bible

A paɗax ale 25

¹Took o joong olaa Sinayi, o Yaal oxe a laya a Moyiis

²ta yegin Ii-isra’el we kene: «Yaa nu ndokkaa no saax le um ci’kaa a nuun, fat nu niwaam, nqaƴaa lanq ke da ñar.

³Fat nu nqooxaa xa qol nuun boo xa kiid ɓetaa fo leng xa tuqrandu, calasaa taxar biiñ ke nuun soo ngisaa ke da ndimna,

⁴ndaa fat nu kesanaam o hiid o ɓetuu ɗikandeer ole. Fat a ref o hiid o muum olaa lanq ke a ñarkaa. Nu mbaree o nduuf xa qol axe nuun mbaat nu calas taxar biiñ ke nuun.

⁵Nu mbaree o saxad sax ke na malkaa na xa qol axe nuun, too nu ƭatkee xa tim xa pooru xe no taxar biiñ ke nuun calasaandeena. Fat a ref o hiid o muum olaa lanq ke a ñarkaa.

⁶Lanq ke a naagangaa o ñaraa, xan nu njegaa ñaamel teyu, nuun fo dag nuun fo jeefeer nuun fo saadlaand nuun fo genar we ndalna me nuun.

⁷Ke lanq ke a mbatkaa no hiid oleene fop, xan a ref ñoowir cegel ke nuun fo muumeen-a-koƥ ke ndefna no saax nuun.»

⁸«Fat nu nqaƴ boo xa kiid ɓetaa ƭaq a ñootnax a mbaaf, ta ref xa kiid ɓetaa ƭaq boo a caf ɓetaa ƭaq, ta fi xa kiid qarɓeen nahik fo xa kiid ɓetaa nahaq.

⁹No ñaal xarɓaxayandeer ne no nqool ɓetuu ƭikandeer onqe, fat nu njibin a luuƥ kam saax le fop, ta ref Bes fa maak fee na baasan ale no pakaad ke.

¹⁰Fat nu tedland o hiid qarɓeen ƥetkandeer ole, yegnit a bat ale no we ngenna kam saax le fop. O hiid oleene xan a xoyeel o Hiid o mbelakinax. Oxuu refna na nuun a waaga o xaad na pec um, a nomtoox no fog um.

¹¹O hiid qarɓeen ƥetkandeer ole fat a ref na nuun o Hiid o mbelakinax. Nu nduufkee teen, nu saxadkee ke malna na xa qol axe nuun, too nu ƭatkee xa tim axe no taxar biiñ ke nuun calasaandeena,

¹²yaam o Hiid o mbelakinax oo. Fat nu ƭeetin nen tedu, ñaamaa no ke lanq ke a mbatna.

¹³No hiid oleene, oxuu refna na nuun a waaga o nomtoox na pec um.

¹⁴A soƥangaa yee kaa nu njikraa o saawit, ba o leng na nuun a nax o pog um,

¹⁵ndaa fat nu ndeefandin na xa kiid axe na saxad ale yoqna ndeer meene fo o Hiid o mbelakinax ole.

¹⁶Nuu xa kiid axe a moƴna o mayit, naaga njigand ne a moƴkaa o magnit. Nuu da moƴna o neewit koy, neene a wañooritkaa, yaam ne a saxad ale a fodna nu njikritaa.

¹⁷Ba o leng na nuun a nax o kend um, ndaa saɗaryo a Roog nuun. Mi refu o Yaal oxe Roog nuun.

¹⁸Ndeefyo kebil es, ngay bargal es, too yaaga xan nu ngen fo o yaadax no saax le.

¹⁹Xan saax le a neq, nu njeg ñoowir teyu, too xan nu mbaag o ngen teen fo o yaadax.

²⁰Xeƈa xan nu laamtoox ee: ‹Ndax xan i njeg kaa i ñaamna bo ta dey no hiid o ɓetuu ɗikandeer ole, yaa andoona yee i nduufkee, too i saxadkee?›

²¹Andyo yee xam barke o hiid o ɓetuu fa lengandeer ole, too ke nu saxadkaa teen, xan a ñoow a nuun na xa kiid xa tadaq axe na ndoonooxkaa took um.

²²Nu nduufangaa no hiid o ɓetuu dadkandeer ole, xan nu ñaamaa saxade hiid boo na saxad ale na doonooxkaa took um.»

²³«Lanq mbaagkaand o njikoox boo xoo, yaam mi jegu lanq ke, mi o Yaal oxe, too kaa nu ndef nen genar fo xa kataakoon me mi.

²⁴Kam saax le nu njegkaa fop, fat nu ndalin bargal kaa simitna lanq no kiin a mbaagel o mbat.

²⁵A soƥangaa yee oxaa fogna na xeet of kaa roolat boo kaaga a tax, ta jikoox o ɗeg no lanq um, fat oxe moƴna o fog fo ten too a jeg sañ-sañ o watin a gar, a wat ke oxeene a jikooxna.

²⁶O koor oxe a jegangee o pog oxaa waaguuna o watan o ten, too ten fa xoox um, ta guut a jeg kaa ta wattuuna,

²⁷fat a rabid oxe ta jikoox’uuna, a reefandin na xa kiid axe yoqna ndeer meene fo o Hiid o mbelakinax ole soo a jangatin lanq um.

²⁸A jegangee kaa ta wattuuna, ke ta jikooxna xan a yoq na xa ƥay no xe jikuuna boo no Hiid o mbelakinax olaa. Maaga a fadange, xan a jangatin lanq um, soo oxe jik’uuna a sutoox.

²⁹O kiin a jikooxangaa mbind um naa refna kam teeru faa jegna saŋe, a waagaan o wat bo ta helko fo jegaa o hiid na cikax ale. O hiid soom a ci’e, ndax ta waagin o wat.

³⁰Boo mbind neene a wataandeena no hiid oleene koy, xan oxe jikuuna a jegatin boo faw, ten fo xa taan um. Sutooxkiran sax, yaa o Hiid o mbelakinax ole a fadna.

³¹Pind ke no caate ke njegeerna saŋe koy, fat a ƭeetel nen xa saawit axe. Xan a mbaagel o mbat, too oxuu jikna teen mbind, fat a sutooxin no Hiid o mbelakinax ole.

³²Leelewi we o mat, xan a njeg sañ-sañ faa da mbattaa pind ke den kili kam teeru ke da njegkaa.

³³Oxuu jikitna no Leelewi we mbind no teeru ke da njegna, fat a sutooxin, yaa o Hiid o mbelakinax ole a fadna, yaam kam saax le Isra’el Leelewi we njegu pind ke ndefna no teeru ke den.

³⁴Xa saawit axe mbidna teeru ke no Leelewi we mbaagkaand o njikoox, yaam den na njegkaa a den boo faw.»

³⁵«A soƥangaa yee oxaa fogna na xeet of kaa roolat boo waagatee o fi ke ta lay’ina fa wo, waraano dimle, ndax ta waag o ñoowaa paam of. Fat nu mbi leng kut keene no gataakoon ole mbaat no xe geniidna me nuun.

³⁶Xotitkiro no ten ndimand ngupu, ndaa fat o saɗar a Roog of too fi boo oxeene a waag o ñoowaa paam of.

³⁷Boo o ɓandan xaaliis, ba o laacin ndimand ngupu, too bo o cooxan ñaamel itam, ba o laamtin ta daknong kaa hupna.

³⁸Mi refu o Yaal oxe Roog nuun, sutitna a nuun no saax laa Misira, ndax um ci a nuun saax le Kanaan soo ref Roog nuun.»

³⁹«A soƥangaa yee oxaa fogna na xeet of kaa roolat boo a jikooxong a xoox um, ba o serin calel no paɗ,

⁴⁰ndaa fat o fi’in nen o saadlaand mbaat o kenar oxaa genna me wo. Fat a jalanang boo no Hiid o mbelakinax olaa.

⁴¹Maaga, fat a woktoox, a sutoox mbind of, ten fo xa ƥeem soo a nomtoox no fog um, a xaad na pec um.

⁴²Mee ndax Ii-isra’el we ndefu dag es we suttuuma no saax le Misira. Ten taxu njikoorkaand ne faɗ a njikoorteel.

⁴³Ba nu toroxand a den, ndaa fat nu saɗaraam, mi fee Roog nuun.

⁴⁴A soƥangaa yee nu soxla’a faɗ mbaat jeefeer, no qeet ke mbidna a nuun nu njiktikkaa a den.

⁴⁵Nu mbaaga o njikit a den itam na xa kataakoon axe na ngenkaa no saax nuun mbaat na xa ƥiy den axe na ndimitkeel teen. Nuun na njegkaa a den.

⁴⁶Fat nu nqaƴan a den xa ƥiy nuun, ndax da lam a den a cinj nuun, a njegik a den. Fat nu ngeek a den nen faɗ boo faw. Fog we nuun koy, ndefna Ii-isra’el we, ba o leng na nuun a toroxand teen o pog um.

⁴⁷A soƥangaa yee o kenar mbaat o gataakoon olaa dalna no saax nuun kaa refat o yaal halal, soo o leng no fog we nuun a roolat boo a jikoox a xoox um o leng na den mbaat o lakas oxaa fogna no ƥasil ngenar,

⁴⁸o pog nuun oxeene xan a waagel o wat. O maag um mbaat o ndeɓ um a waagaan o wat.

⁴⁹Weene a mbaagangiran, faap maak um mbaat faap ndeɓ um mbaat o pog faap um mbaat o leng no kurcala um a waagaan o fi. A waaganangaan a xoox um, fat a watoox.

⁵⁰Fat a lim fo xe jikuuna, a xotit no hiid olaa ta jikooxna a xoox um boo no Hiid o mbelakinax olaa, soo ndabid ne a reefandel no ne xa kiid axe yoqna a mbodna, a limtel no ke refna ndabid no saadlaand na xa kiid axeene.

⁵¹Xa kiid axe yoqna a maya mayeer, fat a rabid a bateer um, a reefandin no ne da mbodna.

⁵²

⁵³Fat a ɗeetel nen o saadlaand oxaa jangeena o hiid o muum, too fat nu ngayaa oxe ta refna no mbind um, ndax toroxandkiran.

⁵⁴A soƥangaa yee watee a xoox um, too o leng no fog um watiran, no Hiid o mbelakinax olaa fat a jeg a xoox um, ten fo xa ƥeem.»

⁵⁵O Yaal oxe a layahina yee: «Neene a refitkaa na nuun, nuun Ii-isra’el we, yaam nuun ndefu faɗ es. Mi jegu a nuun, mi fee sutitna a nuun Misira. Mi refu o Yaal oxe Roog nuun.