Read NQAARIIT NE ROOG A paɗax ale 26 Bible Online

A paɗax ale 26 - NQAARIIT NE ROOG bible

A paɗax ale 26

¹Ba nu njalan a qoox nuun roog tefee ndigil. Ba nu sip pangool mbaat nitaal sexe, too ba nu ndoon kam saax nuun a ƥil akaa mbi’eena samandaal, ndax nu mbaɗoox a den. Mi refu o Yaal oxe Roog nuun.

²Ngayyo bes fee na ñootnax ale hebluuma a nuun, too niw Mbind tedu ne mi. Mi refu o Yaal oxe.»

³«Nu ndeefangaa bargal es, ngay kebil es soo mbadin a den,

⁴xam ci a nuun a teƥ na waxtu um, ndax lanq ke a njeg saxadel soo taxar ke a ndim.

⁵Xan nu mbacaa, sugaa ke nu saxadna boo na nir alaa, too a nir ale xan a ret boo na tuup alaa. Xan nu njeg ñaamel bo ta dey sik, too xan nu ngen no saax nuun fo o yaadax.

⁶Xam fi jam a maadoox no saax leene, too dara yaqankee a nuun o ƭaan. Xam sut teen ƥaaɓaan ke, too xire nankaand teen.

⁷Xan nu ndax fañ nuun, maafit a den laƥ nuun.

⁸Ɓetuk na nuun xan a ndaxaa teemeed no fañ we, soo teemeed na nuun a ndaxaa cuni xarɓaxay, too xan nu maafit a den laƥ.

⁹Xam geleeroox farna fa nuun, ci a nuun ƥasil, dam ngiɓoor es fa nuun.

¹⁰Xan nu ñaam saxade hiid, too xan nu mbaltin, ndax nu ngeer saxade xas le.

¹¹Xam sip Ngenand es a ndeer nuun, too nu mbaskiraam.

¹²Xam ñaaƴaa a ndeer nuun, ref Roog nuun, soo nu ndef xeet es.

¹³Mi refu o Yaal oxe Roog nuun, sutitna a nuun no saax laa no Miimisira we, ndax nu ndefkatee faɗ den. Ɓolaam kadoor ke nuun, fi boo nu njegat a qoox nuun, ñaaƴaa xa cok nuun took.»

¹⁴«Boo andoona yee nu nananiraam, too nu ndeefee kebil keene fop,

¹⁵nu mbasnooxangaa bargal es ke cooxtuuma, xan nu ƭeg ngiɓoor es fa nuun.

¹⁶Mi o mat oo, keeke refu ke um fi’kaa a nuun: Xam fudin took nuun taamaala: A cir akaa na ŋeesaa a nuun fo a sumaan alaa na niifaarinkaa a kid nuun soo a ɓuus xa laaw nuun. Xan nu nduuf ax nuun no kasaara, yaam fañ we nuun na muudnoorkan.

¹⁷Xam fes a nuun a cinj, too xan fañ nuun a maaf a nuun. We sibna a nuun xan a maadoox took nuun, nu ƈufaa, too o leng raxkee a nuun.

¹⁸Nu nananangiraam boo ndiik, xam xawrand boo a caf ɓetaa ƭaq a qaw ale no pakaad nuun.

¹⁹Xam supit asamaan fee yoorooxna a nuun, ta nandat nen njelem boo deɓkatee, soo lanq ke a naagat koŋ, a saƭik nen xanjar, yaam a nga’aƭar o toq. Neene, xam ñuf doole fa nga’atinoor nuun.

²⁰Xan doole nuun a fag no kaa o leng a andeerna, yaam lanq ke mbatkee dara, too taxar ke ndimkee.

²¹Nu mbesahinangaam a cinj, too mbañaam o nanan, xam xawrandahin boo a caf ɓetaa ƭaq a qaw ale no pakaad ke nuun.

²²Xam ɓakandiid kam saax nuun ƥaaɓaan ke na koƥ ale, da mbar xa ƥiy axe nuun, a saŋik cegel ke nuun soo a nqaƴ na nuun yoqatin dutuuñ, too xan a ƭat ake nuun a mbootat.

²³Boo a qaw akeene a yareerna a nuun, too nu maad o siiknooraa fa mi,

²⁴xam siiknoor fa nuun itam, ɓaat o xawrand boo a caf ɓetaa ƭaq a qaw ale no pakaad ke nuun.

²⁵Xam ɓisiid xire kam saax nuun, ndax um xaw a nuun, yaam ne nu ƭegna ngiɓoor es. Xan nu laqooxaa kam teeru ke, ndaa yaaga yoo um fudniid piste a ndeer nuun boo nu ƥoxotoox no fañ nuun.

²⁶Xam xañ a nuun ñaamel boo rew xarɓaxay a mbaag o njawanit ƥasil den no nquɗoox o leng. Xan a ndoxir o njaw onqeene, ndax ƥasil den a ñaamin, ndaa ɗaxkee a den tig.

²⁷Boo keene fop a taxeerna nu nananaam, too maad o siiknooraa fa mi,

²⁸mi itam oo, xam siiknoor fa nuun kam fuux es, too xam xawrandahin boo a caf ɓetaa ƭaq a qaw ale no pakaad ke nuun.

²⁹Xan nu ñaamaa cer na xa ƥiy nuun.

³⁰Xam yaq a ñaang a sadaxand ake nuun, maaf toxir qeeñe-xeeñe ke nuun, fokat xa tal nuun took ƭaaq ke no pangool ke nuun, too xan nu mbasaam.

³¹Xam tas teeru ke nuun, luƈit xa paɗoorand axe nuun. Haaƭkatiim a qeeñaan ale no sadax ke nuun.

³²Xam gef saax le nuun boo fañ we nuun na njaɓkan sax, a njaaxiɗ.

³³Xam picit a nuun a ndeer qeet lakas ke, ɗiir a nuun fo laƥ. Xan saax le nuun a gefel boo teeru ke nuun a mbes a pec.

³⁴Maaga, na xa kiid axe nu laqooxkaa me no fañ we nuun fop, lanq ke nuun nu mbaasna xan a ñar, a rondandtin xa ñar axe mbar’ina o njeg teen, too nu ngayee a den.

³⁵Kaam ee lanq ke xan a ñar, ndax ta rondand xa ñar axe nu mbar’uuna o ci, ye nu ngenaa teen.

³⁶Na nuun we na yoqkaa no saax le no fañ nuun, xam soɗ na nuun o laaw o dalaƭaru. Xan a naf ndaxar alaa nqeñ ne a yo’naa soom a raxaa a nuun. Xan nu ƈufaa nen oxaa o pañ oxaa saqna ƥonax a raxaa, too xan nu yen, nu ndaxangaand sax oo.

³⁷Xan nu mbaɓraa a ndeer nuun nen waa o pañ den a raxaa, too yaaga fop oo, o leng raxee a nuun. Nu mbaagkee o nqox fañ nuun.

³⁸Xan nu nqonit a ndeer qeet ke, too lanq ke na saax ake no fañ we nuun xan a ñaam a nuun.

³⁹Boo leng-leng na nuun a mucna kam saax le no fañ nuun, xan da ŋeesooxaa teen yaam pakaad den fo ke no daan den.»

⁴⁰«Weene mucna xan a mbeejil ee a tooñaxam, den fo daan den, ye da ngore’aƭarna soo a siiknoor fa mi.

⁴¹Pakaad keene o mat tax’u mi itam, um siiknoor fa den soo ɗox a den no saax le no fañ den. Yaa da neewandooxkaa, a njaɓ a qaw ale no tooñ ke den,

⁴²xam wetandoox ngiɓoor ne mi dalnuuma fa Yakoob fa Isaak fa Abraham, we daan den, wetandoox itam a tegit ale mi no kaa farna no saax den.

⁴³Kaa koy, xan saax le a eet o fes a pec, a woot, ndax lanq ke a ndondand a ñootnax ake den. Xan da ndabid njofaƭar den, yaam kaa da mbañ bargal es soo a mbasnoox kebil es.

⁴⁴Yaag oo toox de, deɓkiim a den, yaa da laqooxkaa no saax le no fañ den. Feskiim a den a cinj, mbaskiraam, warkiim a den too ɗegkiim ngiɓoor es fa den, yaam mi refu o Yaal oxe Roog den.

⁴⁵Xam wetandoox a den, wetandoox itam ngiɓoor ne dalnuuma fo daan den yaaga, ye suttuuma a den no saax laa Misira mbaambir qeet lakas ke, ndax um ref Roog den. Mi refu o Yaal oxe.»

⁴⁶Keene ndefu kebil ke fo bargal ke fo a cangin ake o Yaal oxe a dalinna a ndeer um fo Ii-isra’el we took o joong olaa Sinayi a reefandin na Moyiis.