Read NQAARIIT NE ROOG A paɗax ale 27 Bible Online

A paɗax ale 27 - NQAARIIT NE ROOG bible

A paɗax ale 27

¹O Yaal oxe a laya a Moyiis

²ta daawin Ii-isra’el we kene: «A soƥangaa yee kaa jeg oxaa regitna o ɓoxot o Yaal oxe o kiin, fat a rabid xaaliis, a sogkaa ƴutoor fo ten na tegit um.

³Neeke a rabditkan: A bateer no koor oxaa jegna ndeer xa kiid qarɓeen ƭik boo na xa kiid qarɓeen ɓetuu fa leng xan a ref xa monjong qarɓeen ƥetik xaaliis fa nqoolu na xaaliis fee na eedteel no Mbind tedu ne.

⁴A refangaa o tew koy, xan a ref xa monjong qarɓeen tadik xaaliis fa nqoolu.

⁵No ke xotitna na xa kiid xa ƥetaq boo na xa kiid qarɓeen ƭik, xa monjong qarɓeen ƭik oo, yaa ta refna o koor, soo a refangaa o tew, xa monjong xarɓaxay.

⁶No ke xotitna no nqool o leng boo na xa kiid xa ƥetaq, xa monjong xa ƥetaq oo, yaa ta refna o koor, soo a refangaa o tew, xa monjong xa tadaq.

⁷No ke xotitna na xa kiid qarɓeen ɓetuu fa leng, a jof took, xa monjong xarɓaxay fo xa ƥetaq oo no koor oxe, soo no tew oxe, xa monjong xarɓaxay.

⁸Boo oxe fi’na a tegit ale a waageerna o rabid ke layeena, yaam a rool, fat a ɓis oxe ta regit’ina maa no saasadax oxaa na laykan ke ta warna o rabid. Fat o saasadax oxe a ɗeet ne o jeg no xeene a fodna soo a lay ke ta warna o rabid.

⁹A soƥangaa yee a tegit ale kaa ref njegel naa waageena o ɓoxot o Yaal oxe nen sadax, xan a tedat.

¹⁰Njegel neene waraand o sofit naa moƴuuna ŋak mbaat naa moƴuuna o giñ. Boo njegel a softeena ngend um, den ɗik fop fat a kesanel o Yaal oxe.

¹¹A refangaa njegel nqoolaƭaru naa waagaandeena o ɓoxot o Yaal oxe nen sadax, fat a ɓisel maa no saasadax oxaa.

¹²Fat o saasadax oxe a lay ke ta warna o jar, a reefandin no ne ta nandna, too ke ta laykaa rek na reefkeel.

¹³O yaal njegel ne a bugangaan o wat, fat a ɓaat a qaaj a ƥetkandeer ale no ke o saasadax oxe a layna.

¹⁴Boo o kiin a kesanna o Yaal oxe mbind um, fat o saasadax oxe a lay ke ta warna o jar, a reefandin no ne ta nandna, too ke ta laykaa rek na reefkeel.

¹⁵O yaal mbind ne a bugangaan o wat, fat a ɓaat a qaaj a ƥetkandeer ale no ke o saasadax oxe a layna soo a daawatinkaa mbind um.

¹⁶Boo o kiin a kesanna o Yaal oxe o leng na xa qol axe ta lamna, fat a bateer ale a reefandel no ne ax ke mbaagna o may o qol ole a mbodna, ngap kilo teemeed tadik lorso kuu ndefna, xa monjong qarɓeen ƥetik xaaliis a waru o jar.

¹⁷A soƥangaa yee o qol ole kaa kesel ndak fo ndak a cinj o Hiid o mbelakinax ole, fat a bateer um a ref fop ke o saasadax oxe a layna.

¹⁸A soƥangaa yee xa kiid xa leng-leng a cinj o hiid oleene o qol ole a kese, fat o saasadax oxe a lay ke ta warna o jar, a reefandin na xa kiid xa podne yoqna ndeer meene fo o Hiid o mbelakinax ole na garaa.

¹⁹O yaal o qol ole a bugangaan o wat, fat a ɓaat a qaaj a ƥetkandeer ale no ke o saasadax oxe a layna, soo a daawatinkan.

²⁰A soƥangaa koy ee watee o qol ole, ndax a jikooxin o lakas, o leng waagkatiran o wat.

²¹No Hiid o mbelakinax ole, o Yaal oxe na jegkataa o qol oleene, soo saasadax we a ndefat o yaal um, ta ref o qol olaa kesaneena o Yaal oxe boo faw.

²²Boo o kiin a kesanna o Yaal oxe o qol olaa ta lameerna, ndax a jikin,

²³fat o saasadax oxe a lay ke ta warna o jar, a reefandin na xa kiid xa podne yoqna ndeer meene fo o Hiid o mbelakinax ole na garaa, too fat o yaal um a rabdin no ñaal leng kut ne. Fat xaaliis feene a kesanel o Yaal oxe.

²⁴No Hiid o mbelakinax ole fat o qol ole a nomtel oxe ta jikit’eena, refna oxe lam’uuna.

²⁵A bateer aluu ta refna fat a reefandel na xa monjong xaaliis axe na eedteel no Mbiñ o tedu nqe. Xa monjong qarɓeen ƭik fo xa ƥetaq na xa monjong axeene ndefu ngap genwal liibar xaaliis fa nqoolu.»

²⁶«O leng jegee sañ-sañ o kesan o Yaal oxe taaw njegel, yaam o Yaal oxe jegun yaaga, ta ref o xeel mbaat o mbote, o Yaal oxe jegun.

²⁷A soƥangaa yee taaw njegel nqoolaƭaru yoo, o yaal um a waagaan o wat, yaa ta rabidna ke o saasadax oxe a layna, a ɓaat teen a qaaj a ƥetkandeer ale. A watangiran, o saasadax oxe a waagaan o jikoox o lakas no kuu ta layna yee ten a waru o jar.

²⁸Kuu o kiin a kesanna o Yaal oxe boo faw no jeg um, waagkataand o jikoox mbaat ta watel, ta ref o kiin mbaat njegel mbaat o qol o lame. Kuu ɓoxotteena o Yaal oxe neene, tig tedu tigi a refkaa, too o Yaal oxe na jegkan boo faw.[8]

²⁹A soƥangaa yee o kiin oo sax, waagkaand o wat, kaa warel o war.

³⁰O Yaal oxe jegu a seek xarɓaxayandeer ale no ke lanq ke a mbatna fo na xa tim axe no taxar ke. Keene kaa ref kaa kesaneena o Yaal oxe.

³¹A soƥangaa yee o kiin kaa bug o wat tig na seek xarɓaxayandeer um, fat a ɓaat teen a qaaj a ƥetkandeer ale no ke keene a war’ina o jar.

³²Boo o kaynaak oxe a limaa naak ke mbaat paal ke mbaat pambe ke, fat njegel xarɓaxayandeer nuu refna a ñaasel, ndax ta kesanel o Yaal oxe.

³³Njegel ne ɗeetkaand, ndax a faaxa fa faaxee too sofkaand. Boo njegel neene a softeena lakas, den ɗik fop xan a ted too mbaagkataand o mbat.»

³⁴Keene ndefu kebil ke o Yaal oxe a cooxna a Moyiis took o joong olaa Sinayi, ndax ta daawin a den Ii-isra’el we.