Read NQAARIIT NE ROOG A paɗax ale 3 Bible Online

A paɗax ale 3 - NQAARIIT NE ROOG bible

A paɗax ale 3

¹«Boo o kiin a ɓoxotaa o Yaal oxe njegel naa hatna no siir nen sadax fa njamsa’oor, ta ref ngoor mbaat ndew, fat a sadaxit mbaambir no Yaal oxe naa jegeerna sik fa leng.

²Fat a doon o ɓay um took xoox le no nqoox ne, a xirsitin no ndokand ne no Ƭiif ne o Yaal oxe a xetteel, soo saasadax we ndefna xa ƥiy Aaroon a mbiis fo’oy le took o sadaxand ole fo me widuuna fop.

³Na sadax fa njamsa’oor feene, fat o yaal sadax fee a ɓoxot nen sadax fa ndoxel mbaambir no Yaal oxe: neebam fee muurna laaw ke fop,

⁴fo a qisiil ake fa neebam fee widna a den, a muur xa saax axe, fo ke moƴna o faax no xeeñ le, ta watnandoorkaa fo a qisiil ake.

⁵Saasadax we ndefna xa ƥiy axe Aaroon fat a ndox keene took o sadaxand ole, a yoonandtin sadax fee na doxkeel took umb ne na xa cuuƭ axe. Keene xan a ref sadax fa ndoxel faa felna tuñ bo no Yaal oxe.

⁶Boo o kiin a sadaxtaa njegel naa hatna no ged, ta ref ngoor mbaat ndew, nen sadax fa njamsa’oor no Yaal oxe, fat a ref naa jegeerna sik fa leng.

⁷A refangaa o mbaal, fat a ɓoxotin mbaambir no Yaal oxe.

⁸Fat a doon o ɓay um took xoox le no njegel ne, a xirsitin mbaambir Ƭiif ne. Xa ƥiy axe Aaroon fat a mbiis fo’oy le took o sadaxand ole fo me widuuna fop.

⁹Na sadax fa njamsa’oor feene, fat o yaal sadax fee a ɓoxot nen sadax fa ndoxel mbaambir no Yaal oxe neeneer ke ndefna: falaari fee fop, ta xaajkaa fo a coonjoor ale, fa neebam fee muurna laaw ke fop,

¹⁰fo a qisiil ake fa neebam fee widna a den, a muur xa saax axe, fo ke moƴna o faax no xeeñ le, ta watnandoorkaa fo a qisiil ake.

¹¹Fat o saasadax oxe a dox keene took o sadaxand ole. Ñaamel sadaxte kaa ndoxeena a ndefkaa mbaambir no Yaal oxe.

¹²A jegangaa oxaa na sadaxtaa fambe, fat a ɓoxotin mbaambir no Yaal oxe.

¹³Fat a doon o ɓay um took xoox le no njegel ne, a xirsitin mbaambir Ƭiif ne, soo xa ƥiy axe Aaroon a mbiis fo’oy le took o sadaxand ole fo me widuuna fop.

¹⁴Fat o yaal sadax fee a ɓoxot nen sadax fa ndoxel mbaambir no Yaal oxe: neebam fee muurna laaw ke fa fee taƥna teen fop

¹⁵fo a qisiil ake fa neebam fee widna a den, a muur xa saax axe, ke moƴna o faax no xeeñ le, ta watnandoorkaa fo a qisiil ake.

¹⁶Fat o saasadax oxe a dox keene took o sadaxand ole. Neeneer ke fop ñaamel sadaxte kaa ndoxeena a ndefkaa, a mbel tuñ bo no Yaal oxe. Neeneer keene fop o Yaal oxe na jegkaa a den.

¹⁷Keeke refu kebil ne na refkaa boo kili na xa taan nuun: Muu nu mbaagna o ngen, ba nu ñaam neeneer mbaat nu yer fo’oy.»