Read NQAARIIT NE ROOG A paɗax ale 4 Bible Online

A paɗax ale 4 - NQAARIIT NE ROOG bible

A paɗax ale 4

¹O Yaal oxe a laya a Moyiis,

²ta daawin Ii-isra’el we kebil keeke: «A jegangaa oxaa ɗapna kebil ke no Yaal oxe too diyiran, yaa ta fi’na kaa waraandeena o fi, keeke a waru o fi:

³A soƥangaa yee o saasadax o maak bakaadu soo a qic hate took xeet fee yaam bakaad fee ten, fat a ɓoxot o Yaal oxe nqoox njegee sik, ndax ta waasanel pakaad um.

⁴Fat a ɓisiid nqoox ne no ndokand ne no Ƭiif ne o Yaal oxe a xetteel, a doon o ɓay um took xoox le no nqoox ne, a xirsin mbaambir no Yaal oxe.

⁵Fat o saasadax oxe ɗuumeena a xaf no fo’oy le no nqoox ne, a ɓisin kam Ƭiif ne.

⁶Fat a suup nqol um kam fo’oy le soo a wiisin boo a caf ɓetaa ƭaq mbaambir no Yaal oxe, took mbaƴ ne fegteena o mbiñ onqe moƴna o ted.

⁷Fat o saasadax oxe a ɗuum no fo’oy leene took xa can axe no sadaxand ole me cuuraay fee a doxteel no Ƭiif ne. Cinj kaaga, fat a ɓax ke yoqna no fo’oy le na caf ale no sadaxand ole no sadax toxel ke, refna no ndokand ne no Ƭiif ne.

⁸Fat a watin neeneer ke no nqoox ne fop, ɓoxoteena nen sadax fa mbaasnoor pakaad: Neebam fee muurna laaw ke

⁹fo a qisiil ake fa neebam fee widna a den, a muur xa saax axe, ke moƴna o faax no xeeñ le, ta watnandoorkaa fo a qisiil ake.

¹⁰Fat o saasadax oxe a watin a qaaj akeene ne da mbatniteel no nqoox ne na sadax fa njamsa’oor fee, a dox a den took o sadaxand ole no sadax toxel ke.

¹¹Cinj kaaga, fat a jang ke yoqna no nqoox ne: Ƭool ne, a tegeƴ ake, xoox le, a caf ake, laaw ke fo ke refna teen fop,

¹²a ɓisin tafil saŋe ne, no mbiñ o nqoolu, me ndaw ke a ƥaxeel, a doxin. Took uum le no ndaw ke a doxitkeel.»

¹³«A soƥangaa yee mbokatax ne Isra’el fop mbakaadu too andee yee a ƭapa leng no kebil ke no Yaal oxe, a qica hate took den, a ndiyangiran sax oo.

¹⁴Bakaad fee fi’eena a sogange o and, fat mbokatax ne a sadaxit nqoox, ndax da njegit teen a baasan na Roog, ta ɓisel mbaambir Ƭiif ne.

¹⁵Fat maak we Isra’el a ndoon xa ƥay den took xoox le no nqoox ne, soo o leng na den a xirsin mbaambir no Yaal oxe.

¹⁶Fat o saasadax o maak oxe ɗuumeena a ɓis no fo’oy le no nqoox ne kam Ƭiif ne.

¹⁷Fat a suup nqol um kam fo’oy le soo a wiisin boo a caf ɓetaa ƭaq mbaambir no Yaal oxe, took mbaƴ ne.

¹⁸Fat a ɗuum no fo’oy leene took xa can axe no sadaxand ole refna mbaambir no Yaal oxe, kam Ƭiif ne. Cinj kaaga, fat a ɓax ke yoqna no fo’oy le fop na caf ale no sadaxand ole no sadax toxel ke, refna no ndokand ne no Ƭiif ne.

¹⁹Fat a watin neeneer ke no nqoox ne fop soo a doxin took o sadaxand ole.

²⁰Fat a fi leng kut ke no nqoox neene nen nqoox ne ta sadaxitna yaam a baasnax pakaad um. Neene o saasadax oxe a jofooranditkaa a den fa Roog, too xan a mbaasanel pakaad den.

²¹Fat a ɓis ke yoqna no nqoox ne tafil saŋe ne soo a doxin nen nqoox eetaand ne. Keene xan a ref sadax fee na waasnoorteel pakaad no mbokatax ne.»

²²«A soƥangaa yee o aa-adax bakaadu, yaa ta ɗapna leng no kebil ke no Yaal oxe Roog um too diyiran, a fi kaa waraandeena o fi, oxe qicaa hate took um.

²³A andangaa bakaad fee ta fi’na rek, a wara o sadaxit suk fambe laa jegeerna sik fa leng, ndax Roog a waasanin.

²⁴Fat a doon o ɓay um took xoox le no suk le, a xirsitin no mbiñ onqe sadax toxel ke a nqirsiteel mbaambir no Yaal oxe. Keene xan a ref sadax fa mbaasnoor pakaad.

²⁵Fat o saasadax oxe a suup nqol um no fo’oy le no njegel ne sadaxteena, a ɗuumin took xa can axe no sadaxand ole no sadax toxel ke. Cinj kaaga, fat a ɓax ke yoqna no fo’oy le na caf ale no sadaxand ole.

²⁶Fat a dox neeneer ke fop took o sadaxand ole, nen neeneer ke na sadax fa njamsa’oor fee. Neene o saasadax oxe a jofooranditkaa o aa-adax oxeene fa Roog, too xan a waasanel bakaad um.»

²⁷«A soƥangaa yee o lakas oxaa fogna na xeet fee bakaadu, yaa ta ɗapna leng no kebil ke no Yaal oxe too diyiran, a fi kaa waraandeena o fi, oxe qicaa hate took um.

²⁸A andangaa bakaad fee ta fi’na rek, a wara o sadaxit fambe rew laa jegeerna sik fa leng yaam bakaad fee ta fi’na.

²⁹Fat a doon o ɓay um took xoox le no njegel ne sadaxteena yaam a baasan pakaad, a xirsitin no mbiñ onqe sadax toxel ke a nqirsiteel.

³⁰Fat o saasadax oxe a suup nqol um no fo’oy le no njegel ne, a ɗuumin took xa can axe no sadaxand ole no sadax toxel ke, soo ke yoqna no fo’oy le fop, ta ɓaxin na caf ale no sadaxand ole.

³¹Fat o saasadax oxe a watin neeneer ke fop ne ta watniteel na sadax fa njamsa’oor fee soo a doxin took o sadaxand ole, too xan a fel tuñ bo no Yaal oxe. Neene mat o saasadax oxe a jofooranditkaa o kiin oxeene fa Roog, too xan a waasanel bakaad um.

³²A soƥangaa yee mbaal a bugu o sadaxit, ndax ta waasanel bakaad um, a wara o sadaxit ndew naa jegeerna sik fa leng.

³³Fat a doon o ɓay um took xoox le no njegel ne sadaxteena yaam a baasnax pakaad, a xirsitin no mbiñ onqe sadax toxel ke a nqirsiteel.

³⁴Fat o saasadax oxe a suup nqol um no fo’oy le no njegel ne, a ɗuumin took xa can axe no sadaxand ole no sadax toxel ke, soo ke yoqna no fo’oy le fop, ta ɓaxin na caf ale no sadaxand ole.

³⁵Fat o saasadax oxe a watin neeneer ke fop, ne ta watniteel no mbaal ne na sadax fa njamsa’oor fee soo a doxin took o sadaxand ole nen sadax fa ndoxel mbaambir no Yaal oxe. Neene mat o saasadax oxe a jofooranditkaa o kiin oxeene fa Roog, too xan a waasanel bakaad fee ta fi’na.»