Read NQAARIIT NE ROOG A paɗax ale 5 Bible Online

A paɗax ale 5 - NQAARIIT NE ROOG bible

A paɗax ale 5

¹«Boo andoona yee, kaa jeg oxaa daaɓooxna nen o seede soo a bakaad, yaa ta layeerna ke ta ga’na mbaat ke ta andna, xan a gadoox tooñ um.

²Boo ta jegna oxaa duqna tig qoolaƭaru too andee teen tig nen o dal muumeen faa xooleerna, ta ref mbaafal mbaat njegel mbaat ƥood, xan a xoolaƭar ten fa xoox um, too oxe qicaa hate took um.

³Boo o kiin a duqna soɓe fuu hatna no kiin too andee teen tig, a andangaan taa mbaambir naa, oxe qicaa hate took um.

⁴Boo o kiin a gaañna yee xan a fi paaxeer mbaat paax, yaa ta jeetaayaa soom too andee teen tig, a andangaan taa mbaambir naa, oxe qicaa hate took um.

⁵Oxuu fi’na leng no keene boog, a wara o weejil bakaad um.

⁶Cinj kaaga, fat a ɓoxot o Yaal oxe yaam bakaad fee ta fi’na mbaal ndew mbaat fambe rew nen sadax fa mbaasnoor pakaad. Neene mat o saasadax oxe a jofooranditkaa o kiin oxeene fa Roog.»

⁷«O kiin oxe a jegangee mbaal ndew mbaat fambe rew laa ta sadaxitna yaam bakaad fee ta fi’na, a waaga o ɓisiid o Yaal oxe a qoɗoxoñ a ƭak mbaat a nuukuur a ƭak. Leng no tiiƭ ke xan a ref sadax fa mbaasnoor bakaad, soo lakas ne a ref sadax fa ndoxel.

⁸Fat a ɓisiid a den o saasadax oxe na eetkaa o ɓoxot o Yaal oxe ndiiƭ ne sadaxteena yaam a baasnax. Fat oxeene a dam no ɗuk ole no ndiiƭ ne, a torolin, a fañin o salit.

⁹Fat a wiis fo’oy le no saax ole no sadaxand ole, soo ke yoqna no fo’oy le, ta ɓaxin na caf ale no sadaxand ole. Keene xan a ref sadax fa mbaasnoor bakaad.

¹⁰Cinj kaaga, fat o saasadax oxe a sadaxit ndiiƭ ƭikandeer ne nen sadax fa ndoxel, ne bargal ke a simtituuna. Neene o saasadax oxe a jofooranditkaa o kiin oxeene fa Roog, too xan a waasanel bakaad fee ta fi’na.

¹¹O kiin oxe a jegangee a qoɗoxoñ a ƭak mbaat a nuukuur a ƭak, a waaga o ɓisiid ngap kilo tadik mbiɗel nen sadax, ndax ta daaw a baasan na bakaad um, ndaa waree o ɓax teen diwliin mbaat ta doon teen cuuraay, yaam ne ta refna sadax fa mbaasnoor pakaad.

¹²Fat a ɓisiid mbiɗel ke me no saasadax oxe. Fat oxeene a naq teen o ɓay nen betandoor soo a doxin took o sadaxand ole no sadax toxel ke mbaambir no Yaal oxe. Keene xan a ref sadax fa mbaasnoor bakaad.

¹³Neene o saasadax oxe a jofooranditkaa o kiin oxeene fa Roog, too xan a waasanel bakaad fee ta fi’na no leng no keene layeena. Ke na yoqkaa na sadax fee koy, o saasadax oxe na jegkan, ne ta fi’teel no sadax tuufe-duufe.»

¹⁴O Yaal oxe a laya a Moyiis ee:

¹⁵«A jegangaa oxaa fi’na cageer maak mbaat ta bakaad no ke kesaneena o Yaal oxe, too diyiran, fat a ɓoxot o Yaal oxe nen sadax fa nqendandoor yaam bakaad um suk mbaal laa jegeerna sik fa leng, a xottel na ged fee too a war o jar ke o laykaa na xaaliis fee no Mbiñ o tedu nqe.

¹⁶Fat a cooxit kaa fodirna fo ke ta war’ina o ɓoxot no Mbiñ o tedu nqe soo a ɓaat teen a qaaj a ƥetkandeer ale, a ɓoxotin o saasadax oxe. Cinj kaaga, fat o saasadax oxe a jofoorandin fa Roog, a ɓoxotanin suk mbaal le nen sadax fa nqendandoor, too xan a waasanel o ten.

¹⁷A jegangaa oxaa bakaadna, yaam a ɗap leng no kebil ke no Yaal oxe, yaa ta fi’na tig kaa waraandeena o fi too andiran, a ware o xaw, too a gadoox tooñ um.

¹⁸Fat a ɓisiid o saasadax oxe suk mbaal laa jegeerna sik fa leng nen sadax fa nqendandoor, a xottin na ged, too a war o jar ke o laykaa. Fat o saasadax oxe a jofoorandin fa Roog, too xan a waasanel tooñ ne ta fi’na too andiran.

¹⁹Keene sadax fa nqendandoor oo, yaam oxeene kiin, o Yaal oxe a war’aan o xaw.»

²⁰O Yaal oxe a laya a Moyiis ee:

²¹«O leng na nuun a bakaadangaa too a fi’aam kaa ɗomaxama, yaa ta maaɓna o kend um no kaa ta geekneena mbaat kaa ta doxneena, ndax ta yetooxan mbaat kaa ta guuɗna mbaat ta nax o kiin, a jang tig um,

²²a xañangaa yee ga’ee ke mo’na too a ga’in xil mbaat ta daaɓoox na xa maaƥ, ndax ta ɗasin a pi a paaxeer a nandu neene, aluu ta waagna waag o ref,

²³o kiin oxeene a tooña boog too a ware o xaw. A wara o dakin ke ta guuɗna mbaat ta jaɓtin no lakas mbaat ke ta doxneena mbaat ke ta gisna

²⁴mbaat no ke ta daaɓooxna na xa maaƥ. Dakinkiran soom a day teen, ndaa fat a ɓaat teen a qaaj a ƥetkandeer ale no ke keene a waagna o jar, a daknin oxe jeguuna no ñaal ne ta ɓoxotkaa sadax fa nqendandoor um.

²⁵Cinj kaaga, a wara o ɓisiid me no saasadax oxe suk mbaal laa jegeerna sik fa leng, a xottin na ged, too a war o jar ke o laykaa, ndax ta ɓoxotel o Yaal oxe, ta ref sadax fa nqendandoor.

²⁶Maaga, fat o saasadax oxe a jofoorandin fo o Yaal oxe, too oxeene xan a waasanel, nuu tooñ naa a fodna fod.»