Read NQAARIIT NE ROOG A paɗax ale 6 Bible Online

A paɗax ale 6 - NQAARIIT NE ROOG bible

A paɗax ale 6

¹O Yaal oxe a laya a Moyiis

²ta daawin a Aaroon fo xa ƥeem bargal kene: «Sadax fa ndoxel fee a wara o yoq took o sadaxand ole o yeng ole fop boo no nqes ne, too fiɗel le waree o ñuf.

³Fat o saasadax oxe a rokoox sabadoor naa fi’teena gaare, a doon teen o njata nqaa fi’teena gaare, a watin ndaw ke na sadax fa ndoxel fee took o sadaxand ole soo a ɓegelin paam o sadaxand ole.

⁴Cinj kaaga, fat a wol toki um, a rokoox lakas, ndax ta ɓis ndaw ke tafil saŋe ne, no mbiñ o nqoolu.

⁵Fiɗel le no sadaxand ole koy, kaa war o kaƥaa teen, a fañ o ñuf. Nqes nuu refna, o saasadax oxe kaa war o yipaa teen xa cuuƭ, a leemaa teen sadax fa ndoxel fee soo a dox teen neeneer ke na sadax fa njamsa’oor fee.

⁶Fiɗel le a wara o kaƥaa took o sadaxand ole kili, a fañ o ñuf.»

⁷«Keeke ndefu bargal ke na sadax fee no tuufe-duufe ke: Xa ƥiy axe Aaroon mbarun o ƥoxot o Yaal oxe mbaambir o sadaxand ole.

⁸Fat o saasadax oxe a naq o ɓay o leng no mbiɗel ke, a xot na diwliin fee fa cuuraay fee dooneena na sadax fee fop, a doxin took o sadaxand ole nen betandoor. Keene xan a ref sadax faa felna tuñ bo no Yaal oxe.

⁹Ke na yoqkaa teen, Aaroon fo xa ƥeem na ñaamkan. Fat a ñaamtin no Mbiñ o tedu nqe, kam o maax ole no Ƭiif ne o Yaal oxe a xetteel, too jegkee poɗaxnir.

¹⁰Juɗitkaand poɗaxnir. A las ale ci’uuma a den no sadax ke mi ndoxeena yoo. Kaa ted bo nen sadax fee na waasnoorteel pakaad fo nen sadax fa nqendandoor fee.

¹¹O koor oxuu refna ndeer xa ƥiy axe Aaroon a waagaan o ñaam, yaam a qaaj aleene no sadax ke ƥisiideena o Yaal oxe, den fo xa taan den a kesane boo faw. O lakas oxuu duqna teen, xan a ga’in.»

¹²O Yaal oxe a laya a Moyiis ee:

¹³«Keeke refu sadax fee Aaroon fo xa ƥeem a mbugko ƥoxotaxam, mi o Yaal oxe no ke xotitna a koom alaa oxuu refna na den a ɗuumkeel. A mbara o sadaxit ngap kilo tadik mbiɗel ñaal nuu refna, genwal fene nqes, genwal faana kirand.

¹⁴Fat a saaftel diwliin. Fat o xustin teɓ-reɓ, ta ref sadax faa hatna no tuufe-duufe ke, a fel tuñ bo no Yaal oxe.

¹⁵O saasadax oxe na ɗuumkeel ndeer xa ƥiy axe Aaroon, ndax ta rondandin nen o saasadax o maak, fat a fi’aa itam sadax feene. A las no Yaal oxe a refkaa boo faw. Fat a doxel fop boo riw.

¹⁶Sadax tuufe-duufe no saasadax oxuu refna fat a doxel fop, dara teen ñaamkaand muk.»

¹⁷O Yaal oxe a laya a Moyiis

¹⁸ta daawin a Aaroon fo xa ƥeem bargal kene na sadax fee na waasnoorteel pakaad: «No mbiñ onqe sadax fa ndoxel fee a xirsiteena, maaga sadax fee na waasnoorteel pakaad a xirsitkeel mbaambir no Yaal oxe. Sadax fa tedu tigi a refu.

¹⁹O saasadax oxe na ɓoxotkaa njegel ne fat a ñaamtin no Mbiñ o tedu nqe, kam o maax ole no Ƭiif ne o Yaal oxe a xetteel.

²⁰Oxuu duqna na tegeƴ ake, xan a ga’in. Fo’oy le a silangaa no ndikoorik, me ta silna, fat a daptel no Mbiñ o tedu nqe.

²¹A jawtange no ƥaxañ o maxte lanq, fat o ƥaxañ olaaga a gefel, ta jawtel no ƥaxañ xanjar, fat a fortel boo a xool soo a laxadtel foofi.

²²O koor oxuu fogna no saasadax we a waaga o ñaam teen. Sadax fa tedu tigi a refu.

²³Kaa koy, njegel leng naa sadaxteena yaam a baasnax pakaad ñaamkaand, yaa fo’oy um a ɓisiideena no Mbiñ o tedu nqe, kam Ƭiif ne o Yaal oxe a xetteel yaam njofoor ne fa Roog. Fat a doxel.»