Read NQAARIIT NE ROOG A paɗax ale 7 Bible Online

A paɗax ale 7 - NQAARIIT NE ROOG bible

A paɗax ale 7

¹«Keeke ndefu bargal ke na sadax fa nqendandoor fee: Tig tedu tigi a refu.

²No mbiñ onqe sadax fa ndoxel fee a xirsiteel, maaga njegel ne na sadax fa nqendandoor fee a xirsitkeel. Cinj kaaga, fat fo’oy le a wiisel me widna o sadaxand ole fop.

³Fat neeneer kene fop a ƥoxotel o Yaal oxe: Falaari fee fa neebam fee muurna laaw ke,

⁴fo a qisiil ake fa neebam fee widna a den, a muur xa saax axe, ke moƴna o faax no xeeñ le, ta watnandoorkaa fo a qisiil ake.

⁵Fat o saasadax oxe a dox keene fop took o sadaxand ole mbaambir no Yaal oxe, ta ref sadax fa nqendandoor.

⁶O koor oxuu fogna no saasadax we a waaga a ñaam teen. Fat a ñaamtin no Mbiñ o tedu nqe. Tig tedu tigi a refu.

⁷Neene a reftu na sadax fa nqendandoor fee nen sadax fa mbaasnoor bakaad fee. Kebil ne leng kut oo no sadax ƭik keene. O saasadax oxe andoona yee ten na fi’kaa njofoor ne, na jegkaa njegel ne.»

⁸«O saasadax oxe na ɓoxotankaa o kiin sadax fa ndoxel um, xan a pay fo ƭool ne na sadax fee ta ɓoxotna.

⁹Sadax tuufe-duufe fa njuɗe fuu ta waagna o ref mbaat faa saafeena mbaat faa jaweena, o saasadax oxe ɓoxotuuna na jegkan.

¹⁰Sadax fa mbosolte diwliin fuu ta waagna o ref mbaat faa fosoltaandeena dara, xa ƥiy axe Aaroon fop na njegkan, oxuu ta refna ref na den.»

¹¹«Keeke ndefu bargal ke na sadax fa njamsa’oor fee na ɓoxotkeel o Yaal oxe:

¹²Boo sadax feene a ɓoxoteena, ndax ta gidmitel o Yaal oxe, fat njegel ne bugeena o sadaxit a yoonandtel xa kaf diwliin xa cuɗe xa canja’e fo xa puudu xa canja’e kaa nqiiwteena diwliin fo xa kaf axaa mbi’teena mbiɗel qiiwte diwliin.

¹³Fat a ɓaat na xa kaf axeene mbuuru naa jegna poɗaxnir, ndax ta yoonandtel sadax fa njamsa’oor feene na gidmiteel o Yaal oxe.

¹⁴Fat a jeg onqaa o Yaal oxe a watnaneena no sadax keene. A las aleene koy, o saasadax oxe wiisna fo’oy le no njegel ne na sadax fa njamsa’oor fee na jangkan.

¹⁵A tegeƴ ake no njegel ne sadaxteena koy, fat a ñaamel no ñaal ne ta sadaxteena. Dara teen xaƴkaand boo no feet olaa.

¹⁶A soƥangaa yee kaa jeg oxaa ɓoxotna sadax fa njamsa’oor, ndax ta fadnitin a tegit mbaat ta fi’an no fud o letu, njegel ne fat a ñaamel no ñaal ne ta sadaxitkeel, soo ke na yoqkaa teen, a ñaamel no feet olaa.

¹⁷Ke na yoqkaa na tegeƴ ake no njegel ne, fat a doxel no ñaal ndadkandeer naa.

¹⁸Ñaal ndadkandeer ne koy, boo o kiin a ñaamna a tegeƴ akaa yoq’ina na sadax fa njamsa’oor um, o Yaal oxe waagee o jaɓ sadax um feene, too ɗaxkiran dara, yaam a tegeƴ ake kaa mboɓat, too oxuu ñaamna teen, xan a gadoox tooñ um.

¹⁹Boo a tegeƴ ake a nduqna tig qoolaƭaru, ñaamkaand. Fat a ndoxel. O kiin oxuu andoona yee a xoola, a waaga o ñaam na tegeƴ ake,

²⁰ndaa oxe xoolaƭarna a ñaamangaa a tegeƴ ake na sadax fa njamsa’oor fee o Yaal oxe a jegna, oxeene kiin fat a sutel xeet fee Isra’el.

²¹Oxuu duqna tig qoolaƭaru, ta ref soɓe faa hatna no kiin mbaat muumeen fa nqoolaƭaru mbaat qoolaƭaru kuu ta waagna waag o ref, soo a ñaam na tegeƴ ake na sadax fa njamsa’oor fee o Yaal oxe a jegna, oxeene kiin fat a sutel xeet um.»

²²O Yaal oxe a laya a Moyiis

²³ta daawin Ii-isra’el we bargal kene: «Nu mbaree o ñaam muk neeneer nqoox mbaat mbaal mbaat fambe.

²⁴Neeneer njegel medu mbaat naa ƥaaɓaan ke a mbarna, a waage o jiriiñoor no kuu ta refna, ndaa nu ñaamkiran muk.

²⁵Boo o kiin na nuun a ñaamna neeneer ke no cegel ke mbareena o ƥoxot o Yaal oxe no sadax toxel ke, fat oxeene a sutel xeet um.

²⁶Nu mbaree o yer muk fo’oy ndiiƭ mbaat muumeen a caf a nahak, no fo mbiñ ne nu ngenkaa fop.

²⁷Oxuu yerna fo’oy luu ta waagna waag o ref, fat a sutel xeet um.»

²⁸O Yaal oxe a laya a Moyiis

²⁹ta daawnahin Ii-isra’el we bargal kene: «Oxuu na ɓoxotiidkaa o Yaal oxe sadax fa njamsa’oor, fat a watnan teen o Yaal oxe a las um.

³⁰Ten fa xoox um fat a ɓisiid ke wareena o dox mbaambir no Yaal oxe. Fat a ɓisiid neeneer ke fo ngang ne no njegel ne, ngang ne a yaandel mbaambir no Yaal oxe.

³¹Fat o saasadax oxe a dox neeneer ke took o sadaxand ole, soo Aaroon fo xa ƥeem a njang ngang ne.

³²No sadax camsa’oor ke nuun, mbatinyo a ñaal a ñamaak[1] ale, cooxin o saasadax oxe.

³³O leng na xa ƥiy axe Aaroon, oxe na ɓoxotkaa fo’oy le fo neeneer ke na sadax fa njamsa’oor fee, na jegkaa a ñaal a ñamaak ale, ta ref a las um.

³⁴O Yaal oxe kaa xotaa no sadax camsa’oor ke xeet fee Isra’el a sadaxtaa ngang ne na yaandeel fo a ñaal ale na watneel, soo a coox a den a Aaroon fo xa ƥeem. Keene xan a ref kebil ñufkeer naa xeet fee Isra’el a mbarna o ngayaa.»

³⁵A las akeene mbatniteena no sadax ke ƥoxoteena o Yaal oxe, Aaroon fo xa ƥeem na njegkan, no ke xotitna yaa da ndalneena kam calel ke no Yaal oxe nen saasadax.

³⁶Keene o Yaal oxe a heblu xeet fee Isra’el da cooxin a den no kaa xotitna no ñaal naa da ƭuumeena. Xan a ref kebil ñufkeer muk ndeer xa taan den.

³⁷Keene refu kebil ne na sadax fa ndoxel fee fo na sadax fee no tuufe-duufe ke fo na sadax fa mbaasnoor pakaad fee fo na sadax fa nqendandoor fee fo na sadax fee no ndod ne fo na sadax fa njamsa’oor fee.

³⁸O Yaal oxe a daawnitaan a Moyiis no joong olaa Sinayi, no ñaal naa ta hebilna xeet fee Isra’el da ƥisiid sadax den me no Yaal oxe, ye da ndefna kam a koƥ-a-ƥor alaa Sinayi.