Read NQAARIIT NE ROOG A paɗax ale 8 Bible Online

A paɗax ale 8 - NQAARIIT NE ROOG bible

A paɗax ale 8

¹O Yaal oxe a laya a Moyiis ee:

²«Xoti a Aaroon fo xa ƥeem fo tikoorik tedu ke fa diwliin fa ƭuumir fee fo nqoox ne na sadax fa mbaasnoor pakaad fee fo a suk paal a ƭak ake fo a cenjel ale no puuru canja’e ke,

³too fokat mbokatax ne fop no ndokand ne no Ƭiif ne.»

⁴Moyiis a fi’a ke o Yaal oxe a hebil’uuna, too mbokatax ne a nqeta no ndokand ne no Ƭiif ne.

⁵Moyiis a laya mbokatax ne yee: «Keeke refu ke o Yaal oxe a heblitna, ndax ta fi’el.»

⁶Moyiis a matandiida a Aaroon fo xa ƥeem soo a ɓogid a den.

⁷A rokana a Aaroon sabadoor ne, a humanin o qap ole, a rokanin o forok ole, a doonanin o jamb ole, a ŋaƭtin o kumnoor ole no jamb ole.

⁸A rokanaan no ngang um safaƈ ne soo a ɓek teen «Urim fee» fa «Tumim fee»[2].

⁹A tañalaan, a doon a ƈang wurus a tedu na tagid um, ne o Yaal oxe a heblit’uuna a Moyiis.

¹⁰Moyiis a xota diwliin fa ƭuumir fee, a ɗuum Ngenand ne fo fop ke refna teen, soo a tedlandin.

¹¹A wiisaan took o sadaxand ole boo a caf ɓetaa ƭaq, soo a ɗuum o sadaxand ole fo ƥaxañ ke ndefna teen fop fo o roon o ɓogdinoor ole fo tiƈoor um, ndax ta tedland a den.

¹²A juura diwliin fa ƭuumir fee took xoox le Aaroon soo a ɗuumin, ndax ta tedlandin.

¹³Moyiis a matandiida itam xa ƥiy axe Aaroon, oxuu refna na den, ta rokanin sabadoor, a humanin o qap soo a tañalin, ne o Yaal oxe a heblit’uuna o ten.

¹⁴A matandiida nqoox ne na sadax fa mbaasnoor pakaad fee, soo Aaroon fo xa ƥeem a ndoon xa ƥay den took xoox le no nqoox ne.

¹⁵Moyiis a xirsaan, a xot no fo’oy le, a suup teen nqol um, a ɗuumin took xa can axe no sadaxand ole soo a ɓogid o sadaxand ole. Cinj kaaga, a ɓaxa fo’oy le na caf ale no sadaxand ole. Neene mat a tedlandtun, ndax ta fi’it meen njofoor ne.

¹⁶A xota neebam fee muurna laaw ke fop fo ke moƴna o faax no xeeñ le fo a qisiil ake fa neebam den, a dox a den fop took o sadaxand ole.

¹⁷Kaa koy, a doxta nqoox ne tafil saŋe ne: Ƭool oo, a tegeƴ oo, kutatin oo, ne o Yaal oxe a heblit’uuna a Moyiis.

¹⁸A matandiida suk mbaal le na sadax fa ndoxel fee, soo Aaroon fo xa ƥeem a ndoon xa ƥay den took xoox le no suk le.

¹⁹Moyiis a xirsaan, a wiis fo’oy le took o sadaxand ole fo me widuuna fop.

²⁰A ɗegaan teɓ-reɓ, a dox xoox le fo xa ƭeg axe fo neeneer ke.

²¹A ɓogdita laaw ke fo a caf ake foofi soo a dox suk mbaal le fop took o sadaxand ole. Keene koy, sadax fa ndoxel a refu, a fel tuñ bo no Yaal oxe, ne o Yaal oxe a heblit’uuna a Moyiis.

²²A matandiida suk mbaal lakas le, refna mbaal ndodir ne, soo Aaroon fo xa ƥeem a ndoon xa ƥay den took xoox le no mbaal ne.

²³Moyiis a dalfooxa o xiris suk mbaal le, a xot no fo’oy le soo a ɗuumin no yuuf ole no nof ñamaak ne Aaroon fo no nqol ngoogoor ne no ɓay um o ñamaak fo ne na caf a ñamaak um.

²⁴Cinj kaaga, a matandiida xa ƥiy axe Aaroon, a ɗuum fo’oy no yuuf ole no nof ñamaak den fo no nqol ngoogoor ne no ɓay o ñamaak den fo ne na caf a ñamaak den, soo a wiis ke yoqna no fo’oy le took o sadaxand ole fo me widuuna fop.

²⁵A xota neeneer ke ndefna: Falaari fee fa neebam fee muurna laaw ke fop fo ke moƴna o faax no xeeñ le fo a qisiil ake fa neebam den fo a ñaal a ñamaak ale.

²⁶A xotta itam na cenjel ale no puuru canja’e ke dooneena mbaambir no Yaal oxe, o gaf o janja’e fo o gaf o saafe laa xiiwteena diwliin fo o fuudu, soo a doon a den took neeneer ke fo took a ñaal a ñamaak ale.

²⁷A doona keene fop na xa ƥay Aaroon fo na xa ƥay axe na xa ƥiy axe ten soo a sim a den da yaand a den mbaambir no Yaal oxe.

²⁸Cinj kaaga, Moyiis a xotta a den na xa ƥay den soo a dox a den took o sadaxand ole, sadax fa ndoxel fee a gartin a lanq. Keene refu sadax fa ndodir fee doxeena, a fel tuñ bo no Yaal oxe.

²⁹Moyiis a xota ngang ne no suk mbaal dodir le soo a yaandin mbaambir no Yaal oxe. Keene refu a las ale Moyiis, ne o Yaal oxe a heblit’uuna o ten.

³⁰Moyiis a xota na diwliin fa ndodir fee fo no fo’oy le reeƭna took o sadaxand ole, a wiis a den took Aaroon fo no tikoorik um, a wiis a den itam took xa ƥiy axe Aaroon fo no tikoorik den. Neene, a tedlanda a Aaroon fo tikoorik um fo xa ƥiy axe Aaroon fo tikoorik ke da saq’ina.

³¹Moyiis a laya a Aaroon fo xa ƥeem ee: «Njawityo a tegeƴ ake no ndokand ne no Ƭiif ne o Yaal oxe a xetteel. Maaga o mat nu ñaamitkan fo mbuuru ndodir ne refna na cenjel ale, ne heblitanuuma, ye layuuma yee: ‹Aaroon fo xa ƥeem na ñaamkan.›

³²Ke na yoqkaa na tegeƴ ake fo no mbuuru ne, fat nu ndoxin.

³³Fat nu njeg ñaal ɓetuu ƭik kaa nu sutooxkeerna ndokand ne no Ƭiif ne, boo yaa ñaal ke nu mbareena o ndodit a mbadnooxna, yaam xan nu saɗgeel boo ñaal ɓetuu ƭik.

³⁴O Yaal oxe fa xoox um heblitu ta fi’tel ne ta fi’teena xaye, ndax nu njofoorandel fo ten.

³⁵Fat nu yoq boog no ndokand ne no Ƭiif ne boo ñaal ɓetuu ƭik, ñaal fo o yeng, too mbadin o far nuun no Yaal oxe, ndax nu nqonkee, yaam keene refu ke hebil’eema.»

³⁶Aaroon fo xa ƥeem a mbi’a fop ke o Yaal oxe a hebil’ina a Moyiis.