Read NQAARIIT NE ROOG A paɗax ale 9 Bible Online

A paɗax ale 9 - NQAARIIT NE ROOG bible

A paɗax ale 9

¹No ñaal ɓetuu ndadkandeer ne, Moyiis a xoya a Aaroon fo xa ƥeem fo maak we Isra’el.

²A laya a Aaroon ee: «Xoti o nqoox onqaa na ɓoxotkeel nen sadax fa mbaasnoor pakaad fo suk mbaal laa warna o ref sadax fa ndoxel, a ñak sik den ɗik fop, soo o ɓis a den mbaambir no Yaal oxe.

³Cinj kaaga, fat o hebil xeet fee Isra’el da ƥisiid suk fambe, a sadaxtin, ndax da ndaaw a baasan. Fat da ƥisiid itam o xeel fo o njuk mbaal, nuu refna na den a jeg o hiid too a ñak sik, da mbi’el sadax fa ndoxel.

⁴Fat da ƥisiid itam nqoox fo suk mbaal, ndax da sadaxit a den mbaambir no Yaal oxe nen sadax fa njamsa’oor, a yoonandtin sadax tuufe-duufe kaa mbosolteena diwliin, yaam xaye fee xaye sax o Yaal oxe a feeñoox a nuun.»

⁵Ke Moyiis a hebil’ina a ƥisiide mbaambir Ƭiif ne, soo mbokatax ne fop a ndalfoox o matiid, a ngeenoox mbaambir no Yaal oxe.

⁶Moyiis a laya yee: «Keeke refu ke o Yaal oxe a heblitna nu mbi’in, ndax o ndam um a feeñoox a nuun.»

⁷Moyiis a laya a Aaroon ee: «Matiidi o sadaxand ole, ɓoxot sadax fa mbaasnoor pakaad of fa sadax fa ndoxel of too jofoorand a xoox of fa Roog, jofoorand ƥasil of fa Roog. Ɓoxoti itam sadax fee na xeet fee too jofoorand a den fa Roog, ne o Yaal oxe a heblituuna.»

⁸Maaga, Aaroon a matiida o sadaxand ole, a xiris o xeel ole na refkaa sadax fa mbaasnoor pakaad um.

⁹Xa ƥeem a ƥisiidaan fo’oy le, ta suup teen nqol um, a ɗuumin took xa can axe no sadaxand ole soo a ɓax ke yoqna na caf ale no sadaxand ole.

¹⁰A doxa took o sadaxand ole neeneer ke ndefna: A qisiil ake fo ke moƴna o faax no xeeñ le no njegel ne sadaxteena, ne o Yaal oxe a heblit’uuna a Moyiis.

¹¹A tegeƴ ake fo ƭool ne koy, a doxa a den tafil saŋe ne.

¹²Aaroon a xirsa suk mbaal le na sadax fa ndoxel fee. Xa ƥeem a ƥisiidaan fo’oy le, soo ta wiisin took o sadaxand ole fo me widuuna fop.

¹³A cooxaan sadax fee ɗegeena teɓ-reɓ fo xoox le, soo ta dox a den took o sadaxand ole.

¹⁴A laxada laaw ke fo a caf ake soo a dox a den took o sadaxand ole, xa ƭeg xa lakas axe na sadax fa ndoxel fee a mbar a lanq.

¹⁵Cinj kaaga, Aaroon a ɓoxota o Yaal oxe sadax fee na xeet fee. A xota suk fambe le na sadaxitkeel, ndax xeet fee a njeg a baasan pakaad, a xirsin soo a sadaxtin, ne ta fi’it’uuna no xeel ole.

¹⁶A ɓoxota itam sadax fa ndoxel fee, a sadaxtin ne ta hebliteena.

¹⁷A ɓisiida sadax fee no tuufe-duufe ke fogreerna fa sadax fee no nqes ne, a naq teen o ɓay muut soo a doxin took o sadaxand ole.

¹⁸A dalfooxa o xiris nqoox ne fo suk mbaal le xeet fee a ƥisiidna nen sadax fa njamsa’oor. Xa ƥiy axe ten a ƥisiidaan fo’oy le, soo ta wiisin took o sadaxand ole fo me widuuna fop.

¹⁹A cooxanoyo itam neeneer ke no nqoox ne fo ke no suk mbaal le ndefna: Falaari fee fa neebam fee muurna laaw ke fo a qisiil ake fo ke moƴna o faax no xeeñ le.

²⁰A ndoona neeneer keene took kang ke no cegel ƭik ke. Cinj kaaga, Aaroon a doxa neeneer ke took o sadaxand ole.

²¹Aaroon a yaanda kang ke fo a ñaal a ñamaak ale mbaambir no Yaal oxe, ne Moyiis a heblit’uuna.

²²Aaroon a yoɗa xa ƥay um farna fa xeet faa, a barke a den, soo a fudoox a cinj ye ta ɓoxotna sadax fa mbaasnoor pakaad fee fa sadax fa ndoxel fee fa sadax fa njamsa’oor fee boo a ƴut.

²³Moyiis fa Aaroon a ndoka kam Ƭiif ne o Yaal oxe a xetteel. Yaa da sutoorna taaga, a mbarke’a xeet faa. Maaga, a qoolaand ale no ndam onqe no Yaal oxe a feeñooxa xeet faa fop.

²⁴Fiɗel a sutoora mbaambir no Yaal oxe, a dox sadax fa ndoxel fee fo neeneer ke ndeeƭna took o sadaxand ole. Xeet faa fop a nga’aan too a soroxole’a soo a ngung a lanq.