Read NQAARIIT NE ROOG Yeremi 10 Bible Online

Yeremi 10 - NQAARIIT NE ROOG bible

Yeremi 10

¹Nuun Ii-isra’el we, nan-gilooxyo ke o Yaal oxe a layna na nuun.

²O Yaal oxe kaa tee: «Ba nu laal a pesoorooƭ ale no qeet ke, too ba nu send mbaambir xa anddiloor axe na asamaan, ne qeet ke a sendtaa mbaambir den.

³Yaam o mbaax onqe no qeet lakas ke xa koɓong xa ƥor oo. Ndaxar ne kaa godteel no suungaan le, o seesex a sex teen nitaal roog,

⁴ta laartel xaaliis fa wurus, soo a daaƴtel xa teng fo xa cibamb, ndax yo’nooxkee.

⁵Kaa nand nen mbooƴ sipe no qol xa peeƭ. Naangee o layaa, too kaa meeɓeel, yaam mbaagee o ndupit o jaf. Ba nu saɗar a den, yaam mbaagee o mbi paaxeer, ne da mbaageerna o mbi’it paax.»

⁶O Yaal oxe, dara nandee fa wo. Kaa o magin, too gon of kaa magin, a may katil.

⁷Ndi an saɗarkeerong, wo o maad oxe no qeet ke? Wo o mat jare o saɗar, yaam a ndeer no yaal-o-and we fop no qeet ke fo no maat den fop o leng nandee fa wo.

⁸Den fop kaa tapoor a mbanxoy soo a yoqit, a cangin ale den refee tus. Roog ke den a teex rek a ndefu!

⁹Xaaliis fa nqawe faa ɓistiideena Tarsis fa wurus faa ɓistiideena Ufaas[22] a mosandte. O seesex sexu a den, o paal wurus a xaw a den. Roog keene kaa ndokeel haŋik fa nqiiyiiy fo haŋik fa yeeq. Den fop no waane no kiin doŋ a ngatu.

¹⁰Kaa koy, o Yaal oxe refu Roog fa ndigil fee, a ref Roog fa ñoow jok fee, o maad oxe na refkaa boo faw. A fuuxangaa, lanq ke a yo’noox, too qeet ke ngatlee xulmbax um.

¹¹Fat nu lay a den keeke: Roog ke sakeerna a asamaan mbaat lanq ke xan a mooc took lanq ke fo ɗuga asamaan fee[23].

¹²O Yaal oxe a sakta lanq ke katil um, a sinjit adna fee o and um soo a letnit asamaan fee o jeg-yiif um.

¹³A heblitangaa, poofi ke a ngitatir na asamaan. Kaa yoɗtaa a eel a maak ake no cat ke no lanq ke, a ƥalañnaa xa kiiñaand axe kam a teƥ ale soo a suqtitaa qeñ ke no keegand ke ten.

¹⁴No keene, o kiin oo kiin oxe ŋam yaam a ñak o and, o paal wurus oxuu refna a naag ɓot yaam pangool ke ten, yaam ke ta muulna xa koɓong xa ƥor oo, too jegee na den o ñoow.

¹⁵Xa andand xa ƥor a ndefu, jale laa jalatna. Xan da mooc, yaa a qaw ale den a garkaa.

¹⁶Roog fee Yakoob koy nandee fa den, yaam o ten saku fop, too Isra’el refu xeet fee ta jegoodna. Gon um refu: «O Yaal oxe Hupna fop.»

¹⁷Wo Yeerusaleem fee wideena o kurul-keƥ, gisi tig oo tig ke wo ndefna a lanq,

¹⁸yaam keeke o Yaal oxe a layu: «Jaf leeke, xam suusaand we ngenna no saax le. Xam fiiqil a den ƭomu, ndax da naagel nuus[24].»

¹⁹Yeerusaleem a falalooxa yee: «Sabab took es, yaam yaqooxaam pic! Uut le mi waagee o wod, mi fee layoogna yee: Keene soom a reeƭangaa coono es, hatilkoogaanum.

²⁰Kaa koy, ƭiif es kaa baytel, xa ƥaak axe ten fop a ƭegel. Xa ƥees kaa nqaƴaam, o leng na den refatee meen. Jegiim o leng oxaa sipatinanaxama ƭiif es, a peŋnanaam piis ke no laqooxand es.»

²¹Ɗooɗox we na xeet fee kaa mbanxoy. Mbaaƭee o Yaal oxe. Ten taxu nqenɗee, too we da ƭoxoogna fop a pasare.

²²Nan-gilooxangyo fangax combol le na matiidaa. Yo’in maak ley a inoortiidaa no saax le no ɓemb-roog o janoon. Teeru ke Yudaa xan a suptel a koƥ-a-ƥor, a ndefat ngenand xa ƥox-a-koƥ axe.

²³O Yaal oxe, andaam ee o kiin oxe andee muj um, too oxe na ñaaƴaa naagee ɗoxaa o jaf um.

²⁴O Yaal oxe, yaraam, ndaa fat a ref no cofel, too baa ref kam fuux of, ndik o yaqaam pic.

²⁵Bilti fuux of took a saax ake andeeroonga fo took qeet ke ƈufginoorkeerna gon of, yaam a lista xeet fee Isra’el, a lista soo a saŋik a den, a mbayit kenand den.