Read NQAARIIT NE ROOG Yeremi 13 Bible Online

Yeremi 13 - NQAARIIT NE ROOG bible

Yeremi 13

¹Keeke refu ke o Yaal oxe a heblaxama: «Reti jikik o kumnoor o pasaak, humnooxin no ndet of, ndaa baa o suupin na foofi muk.»

²Jikaam boog o kumnoor, ne o Yaal oxe a layit’axama o ten, soo humnooxan no ndet es.

³Cinj kaaga, o Yaal oxe a layaxam jaf ɗikandeer ee:

⁴«Jangi o kumnoor ole jikoona too o humnooxin no ndet of, inoox ret no xuluɓ olaa Ofrat soo ɗasnin maaga no waaƥ ɓil.»

⁵Retaam na ƥeeraamb alaa Ofrat soo ɗasnin maaga, ne o Yaal oxe a heblit’axama o ten.

⁶Cinj a pe a mayu, o Yaal oxe a layaxam ee: «Inooxi ret Ofrat, xotik o kumnoor ole hebil’oonga o ɗasnin maaga.»

⁷Nomtooxaam boog Ofrat, waaƭaa soo xotatin o kumnoor ole no mbiñ onqe ɗasin’anuuma. Kaa koy, o kumnoor ole kaa fot’u boo jiriiñatee tus.

⁸Maaga, o Yaal oxe a daawnaxam fa lay feeke:

⁹«Keeke o Yaal oxe a layu: Neene deŋ um yaqitkaa ka’atinoor ke Yudaa fo ka’atinoor maak ke Yeerusaleem.

¹⁰Xeet fa soxodu feene kaa mbañ o nan-giloox fa lay es. Kaa nqox no saƭik xoox ole den, a ngiɓoor fo roog lakas, ndax da mbaɗoox a den soo a ngungaa mbaambir den. Xan a nand nen o kumnoor olene jiriiñateerna tus.

¹¹Yaam kat, ne o koor a humnoortaa o kumnoor no ndet um, neene humnoorit’um maat ne Isra’el fop fo ne Yudaa fop, ndax da ndef xeet es, o niwel es, a simat es fo kelax es. Kaa koy, nan-gilooxee.» O Yaal oxe layun.

¹²«Fat o daawin a den fa lay feeke: Keeke o Yaal oxe Roog fee Isra’el a layu: O jalag oluu refna kaa fi’el yipir biiñ. A ndoonangaang ee: ‹Ndax kaa i andee yee o jalag oluu refna yipir biiñ oo?›

¹³Maaga, fat o lay a den ee: Keeke o Yaal oxe a layu: Nga’angyo, xam wayin nep fop we ngenna no saax lene, maad we moofna no uum-maamaad le Dawid, saasadax we, duleer we fo we ngenna Yeerusaleem.

¹⁴Xam duguñrand a den, faap oo o ƥiy oo. Wuuskiim, yirimkiim o leng, too o liir o leng yaqankiraam o saŋik a den.» O Yaal oxe layun.

¹⁵Nan-gilooxyo too mbet nof nuun, ba nu magnandooxat, yaam o Yaal oxe na layaa.

¹⁶Ƥoxotyo o Yaal oxe Roog nuun o ndam boo ta helko fo niɓaanaa, soo nu tolof na xa coong axe na kid-a-caɓru ke. Xan nu cungaa a qoolaand ale, ndaa xan a suptin o niɓaan, a fi’in a sisaaƥ.

¹⁷Nu nan-gilooxangee kene, xam lool na pet, yaam a magnandax ale nuun. Xam yuurin xa kooniit, a kid es a nqaaraa fo xa kooniit, yaam xan o siir ole no Yaal oxe a ɓisel took o hup doole.

¹⁸«Layi o maad oxe fa ya no maad oxe yee: Moofyo a lanq, yaam fo ndip fo mosaan ne nuun a yenta na qoox nuun.

¹⁹Teeru ke no ɓemb-roog o ñamaak kaa mbegel, o leng wetatee tokand ke den, yaam xeet fee Yudaa fop a ƥise took o hup doole, a ƥise took o hup doole ne da mbodeena fop.»

²⁰Wo Yeerusaleem, yoɗi a kid of too ɗeet[28], fañ we wo we inoortiidaa no ɓemb-roog o janoon. Taa o siir ole doxin’ee’oona, ged le reeƭna o ndam of?

²¹Xar o laykaa, yaa we merandoox’oona a inooxankang, ndax da maadooxanong? Ndax xa ƭomel axe ndaawkirang nen xa ƭomel no tew oxaa na gaajooxaa?

²²Maaga, xan o laamtoox ee: ‹Xar taxu kene a dalaam?› Tooñ mayaan ke wo taxu xa lifar axe no ndoki of a nguñtel, soo o yentel.

²³Ndax o ngiin-o-ƥaal a waaga o supit ƭool um mbaat o ƴaxal a supit a taad um? Nuun itam, ndax nu mbaaga o mbi paax, nuun we merna o mbi’aa paaxeer?

²⁴Mi o Yaal oxe itam, xam pasar a nuun nen boob laa a qeñ ale na koƥ-a-ƥor ale a maƥna.

²⁵Keeke refu muj of, wo Yeerusaleem, a las ale naqanoonga, mi o Yaal oxe, yaam kaa o weecaam soo hooloox xa maaƥ.

²⁶Mi fa xoox es xam yoɗ xa lifar axe no ndoki of boo na mukit of, ndax cer ƥor of a nga’el.

²⁷Ga’aam ceeq ke wo fo woƈok-woƈok of, njaga sednooxu ne wo, nitaal roog cakalaaru ke wo took a ñaang ake na koƥ ale. Sabab took of, wo Yeerusaleem! Kaa o refkaa no nqoolaƭar boo a mban?»