Read NQAARIIT NE ROOG Yeremi 14 Bible Online

Yeremi 14 - NQAARIIT NE ROOG bible

Yeremi 14

¹Keeke o Yaal oxe a layu a Yeremi ye fo feñ ole:

²«Xeet fee Yudaa kaa naqadiloox, teeru ke ten ee yereng, we ngenna teen a ngooy, a moof a lanq. O wuuq ƭomatax a yoɗoora Yeerusaleem.

³Wiin maak we a lula fo mboƭomsogor ne, da mbaaƭik foofi. Ye weene a mbadiidna no pand ke, soƥee teen foofi soo a nomtooxiid fo qaw ƥor, a may fo gaci, a sed, a muuroox.

⁴Lanq ke a mbeɗɗa, yaam ne a teƥ a jegateerna no saax le, too xooxoox we a seda, a muuroox.

⁵O gaay ole sax a rima kam a koƥ ale soo a xaƴ o ƥiy onqe, yaam a nap jeg’ee.

⁶Xa paam-a-koƥ axe a ngeenooxa took xa coong axe naangna halit, a ñisaa nqeñ ne nen xa ƥox-a-koƥ axe. A kid ake den kaa nqooɗat yaam daaƭ jeg’ee.»

⁷Ke tooñ ke in a njambaa a in fop oo, fi’i tig yaam gon of, wo o Yaal oxe yaam ngore’aƭar ne in a maya lool, i mbakaada na wo.

⁸Wo fee refna yaakaar Isra’el, o Muumucil um yaa fa naqad fee, xar taxu o ref nen o kenar kam saax le, nen o ñaañaaƴ oxaa ɗapiidna, ndax ta fe doŋ?

⁹Xar taxu o ref nen o koor o caqu, nen a salma-koor alaa waageerna o mucil? Yaag oo toox de, woxey a ndeer in, wo o Yaal oxe, too kaa i kesanel a wo. Ba o xaƴ a in boog.

¹⁰Keeke o Yaal oxe a layu no kaa jofna na xeet feene: «Ii, a coqooyax felu a den, da ƥodax o jaf. Kaa koy, yooniim no keene, mi o Yaal oxe. Wetandooxaam ndiiki tooñ den, too kaam xawaa pakaad den.»

¹¹Cinj kaaga, o Yaal oxe a layaxam ee: «Ba o xeɗan xeet feene kaa maluuna.

¹²A ngoorangaa sax, nan-gilooxkiim a ƈufginax den. A ƥoxotangaam sadax toxel fo sadax tuufe-duufe sax, taxkee da mbelaam, yaam mi xam saŋkit a den laƥ, biim fa piste.»

¹³Doonaam ee: «Ey, o Yaal oxe na refkaa boo faw, duleer we we layaa a den ee: ‹Xire dalkee a nuun, too biim jegkee me nuun, yaam jam fa miñu Roog a ci’kaa a nuun mene sax sax.› »

¹⁴Kaa koy, o Yaal oxe a layaxam ee: «Xa maaƥ xa ƥor duleer weene a yegnitaa no gon es. Luliim a den, roxondiim a den tig, too layiim a den tus. Peeñil cegeer, yegnit koɓong fo naanaxir ke na qeeñ den a yegnaa a nuun.

¹⁵Ten taxu keeke layum, mi o Yaal oxe, no duleer weene na njo’tanaxam, too luliim a den, den we na layaa yee xire mbaat biim njegkee no saax lene: Xire fo biim xan a saŋik duleer weene.

¹⁶Xeet fee da ndaawinna yegnit padafuleer den o mat xan a ndeɓel no ped ke Yeerusaleem yaam o ngar fo biim le fa xire fee. Jegkee o leng oxaa gasna a den na mboy, den oo rew den oo, xa ƥiy xa koor den fo xa ƥiy xa tew den. Neene, xam fudin took den paaxeer ke da mbi’na.

¹⁷Wo Yeremi fat o lay a den kene: A kid es kaa ngen no nqaaraa fo xa kooniit ñaal fo o yeng, yaam o njakad o maak onqe dalna o njaaƈ o ndoog onqe refna xeet es, ngaañax naa ɗomna tigi.

¹⁸Um sutooxangaa na koƥ alaa, waa yenitna na xire doŋ um ga’aa, um rokiid kam teeru fee, ga’aa waa na nqonaa fo nqeex. O tuleer oxe fo o saasadax oxe sax owe mbidaa kam saax le, ndaa andee xar a ngelu o mbi.»

¹⁹O Yaal oxe, ndax kaa o deɓ a Yudaa wol? Ndax kaa Siyoŋ a maasong ƴam? Xar taxu o gaañ a in boo i mbaagatee o mbod? Jam i yaakaaroogu, ndaa jegee dara kaa faaxna. Kaa i cungoogu mbodandel, ndaa diid soom refu meen.

²⁰O Yaal oxe, i anddilooxa kañaan in, tooñ ke no daan in, yaam i mbakaada na wo.

²¹Yaam gon of, ba o xeef a in, ba o niwaƭar uum-maamaad le no ndam of[29]. Wetandooxi ngiɓoor ne dalnoona fa in, ba o ɗegin.

²²A ndeer pangool ke no qeet ke, ndax a jega na den faa na deɓaa? Ndax asamaan fee na cooxtaa a teƥ-eel ake? Ndax refee wo, o Yaal oxe Roog in? Na wo i yaakaaru, yaam wo na fi’aa keene fop.