Read NQAARIIT NE ROOG Yeremi 15 Bible Online

Yeremi 15 - NQAARIIT NE ROOG bible

Yeremi 15

¹O Yaal oxe a layaxam ee: «Moyiis fa Sami’el sax a ngeenoox’angaa mbaambir es, yirimkoogiim xeet feene. Raxi a den da ngoƭaam, fat a ndet!

²A laamtangaang ee: ‹Mam i njofkaa?› fat o doon a den ee: Keeke o Yaal oxe a layu: Fat oxe lafooxaneena fa nqon, a jof na fa nqon, oxe lafooxaneena laƥ, a jof no laƥ, oxe lafooxaneena biim, a jof no biim oxe lafooxaneena mbaƭ, a jof no mbaƭ.»

³O Yaal oxe kaa tee: «Xa qos xa nahaq a ƭom um xawitkaa a den: Laƥ ne xan a war a den, xa ƥox axe a listir a den soo a tud ake fo ƥaaɓaan ke a ñaam a den, a salax a den.

⁴Neene, maat ke na adna fee fop xan a ndiid, yaa da nga’na ke fi’uuma a den. Keene refu a qaw ale no fop ke Manaase fee o ƥiy Hiskiya, o maad Yudaa, a fi’na kam Yeerusaleem.»

⁵O Yaal oxe kaa tee: «Ndi an na yirimkang, wo Yeerusaleem, an na ɗomatooxankang? An na ɗapiidkaa, ndax ta laamtong nam fi’o?

⁶Waasaxamo, fesaam a cinj. Mi yoo yoɗanaaxoong o ɓay es, yaqong pic. Deyƭooxaam sik na ticax.

⁷Pasaraam a den boo no cat ke no saax le nen oxaa na baacaa fo ndal. Xañtaam a den xa ƥiy, saŋik xeet es, yaam mbesee a ƭat den a cinj.

⁸Fi’aam boo ñaaw we den a ngup o may pep ke no lanq ke no maag ole. Njoloor o mbuc hebliidaam o yaayaq took ya ke no mbes ke[30], joor took den ndak fo ndak o njaaxɗataand fo diid.

⁹Yaay fee rim’ina xa ƥiy xa koor ɓetaa ƭaq a ŋeesooxa, a ososaa. Njeeƈ um a muda njoloor. A seda ɓot soo a seeƈaar. We yoqna na xeet fee koy, xam ɓoxot a den da saŋkitel laƥ na kid no fañ den.» O Yaal oxe layun.

¹⁰Sabab took es! Xar taxu o rimaam, wo ya es? Kaam ref o kiin o cofooraand fo o baagraand no saax le fop. Luɓiim too ɓandtiim, ndaa yaqanee fop kaa salooxaxam.

¹¹Kaa koy, o Yaal oxe a laya yee: «Xam watong. Xam fi fañ of a ƈufginooxong yaa fa taamaala den, yaa fa naqad den.

¹²Xar waagu o moxoñ njelem ne, njelem ne inoorna no ɓemb-roog o janoon mbaat xanjar fee?

¹³Wo Yudaa, xam ci’it o jeg of fa halal of na meere-meere, yaam pakaad ke fi’oona no fiisel ole wo fop.

¹⁴Xam fi’ong o paɗ no fañ of[31] kam saax laa andeeroona, yaam fiɗel le no fuux es a biltooxa too xan a raaɓ a nuun.»

¹⁵Kaa koy, wo o Yaal oxe andaa fop. Wetandooxaam, saytooxaam soo rabdinooxanaam no ñaañagadil we mi. Ba o xaƴaam um loroox no muñ ole wo took no fañ es, wo fee niidna o fuux. Andi yee wo taxaxam o weneel.

¹⁶Fa lay of oxaa fadiid’aa me mi, kaam xamboogun. Kaa reeƭu na mi baneex fo o ɗaay xeeñ es, yaam kaam kesanel a wo, wo o Yaal oxe Roog fee Hupna fop.

¹⁷Moofiim muk a ndeer no we na mbumbaayaa, ndax um ŋas. O ɓay o mayu katil ole wo a seraxam um moof sang es, yaam kaa o mayƭand’aam fo fuux.

¹⁸Xar taxu coono es a gen kili? Xar taxu boo uut le mi waagee o wod, a fañ faƥit ee fi’kee aak? No ndigil kaa o ref na mi nen a ƈufnand alaa na ŋiisaa, nen poofi kaa na naxaa oxe hoɗomeena.

¹⁹Maaga o Yaal oxe a doonaxam ee: «O nomtooxiidangaa me mi, xam xotatinong no calel es. O jektirandangaa ke jegna o njiriiñ fo xa ƥaral, yaaga xan o ref o coojo’it es. Wiin we Yudaa xan a nomtooxiid me wo, ndaa refee yee wo na nomtooxkaa me den.

²⁰Xam fi’ong na xeet fene tabax nqanjar saƭku koŋ. Xan da ñoxor fa wo, ndaa mbaagankirang dara, yaam mexey fa wo, ndax um muclong soo watong. Mi o Yaal oxe layun.

²¹Xam muclong no ɓay no soxodu we, watong no ɓay no wiin fo’oy we.»