Read NQAARIIT NE ROOG Yeremi 17 Bible Online

Yeremi 17 - NQAARIIT NE ROOG bible

Yeremi 17

¹O Yaal oxe kaa tee: «Bakaad fee no we ngenna Yudaa kaa bindtel pindir njelem, a tufir jamaa. Kaa miimel na patax ale na qeeñ den fo took xa can axe na xa sadaxand axe den[32].

²Neene, xa ƥiy den xan a mbetandoox xa sadaxand axe den fo xa taaƴ axe da lupanna a Asera paam taxar saqtu ke, took a ñaang a ciig ake

³fo xa coong axe kam a koƥ ale[33]. Kalal ke nuun fo o jeg nuun fop, xam ci’it a den da njaɓel, den fo a ñaang a sadaxand ake nuun, yaam pakaad ke nu mbi’na kam o fiisel ole nuun fop.

⁴Xan nu ñak lam ne ci’’uuma a nuun. Xam fi a nuun faɗ no fañ nuun no saax laa nu andeerna. Yaam nu ngeƥanda fuux le mi, too xan a kaƥaa boo kili.»

⁵Keeke o Yaal oxe a layu: «O koor oxe hoolooxna o mbindeef, ngeƈnooxand um ta gaɗin no njer, soo xeeñ um a fes o Yaal oxe a cinj, a salooxe.

⁶Kaa nand nen ngol kam o tan, too ga’kee baneex a garaa muk. Xan a gen no fo mbiñ fo ndoxu ne na koƥ-a-ƥor ale, no lanq qanju, maa o leng a geneerna.

⁷Kaa koy, o koor oxe hoolooxna o Yaal oxe too a doxnoox no ten, a barke’e.

⁸Kaa nand nen ndaxar njimbe paam poofi, a joobnaa a paƴ um farna fo a ƈufnand ale. Saɗaree yaa a sumaan ale a garna, soo saqit um a gen no neepaa. No hiid o feñ sax naagee jaaxɗaa, too kaa gen no rimaa.

⁹Xeeñ no kiin moƴu o naɗoox kuu refna, too waagaand o wodand! An waagun o and?

¹⁰Mi o Yaal oxe, kaam ga’aa boo kam xeeñ soo horooxaa a pug ake, ndax um dakin oxuu refna a pesoorooƭ um, reefandin no ke a pi um a njagitna.

¹¹Nen a ceɓel alaa ɓopna ke ta ɓoofeerna neene oxe na fokatanooxaa halal fa leweer a nandu. Ndeer ee ndeer xa yeng um, xan a ñak o jeg um soo na muj um ta refat yoqit.»

¹²Uum-maamaad jegu o ndam le, yoɗeena no ke xotitna no mberaand naa, refu o mbiñ onqe no faɗoorand ole in.

¹³O Yaal oxe, wo refu yaakaar Isra’el! Fop we na mbaasang xan a sed, we mbesoonga a cinj xan a sooƴ nen a kon akaa mbindeena a lanq, yaam kaa mbaasong, wo o Yaal oxe, a cur foofi fo ñoow ole.

¹⁴Wodandaam, o Yaal oxe, too xam wod, muclaam, too xam muc, yaam wo soom um simataa.

¹⁵Owey a laamtaxam ee: «Taa fa lay fee no Yaal oxe? Fat a fadnoox boog!»

¹⁶Refee yee mi riñong o fi taamaala fee[34], saliim ñaal naqad ne a gar. Wo, andaa ke hatna no don es, mbaambir of layum.

¹⁷Ba o ref na mi kaa na sendnooraxam, wo fee refna njaɓnooxand es yaa fa taamaala.

¹⁸Yaasam ñaañagadil we mi a sed, mi o mat ba um sed. Yaasam da mbiriɓ, mi o mat ba um firiɓ. Garti took den ñaal taamaala, yaq a den pic.»

¹⁹Keeke o Yaal oxe a layaxam: «Reti fod me na xoyeel Ndokand ne na xeet fee, me maad we Yudaa a ndoktaa soo a sutooraa, fo no tokand ke Yeerusaleem fop.

²⁰Fat o lay a den ee: Nan-gilooxyo ke o Yaal oxe a layna a nuun, nuun maad we Yudaa fo nuun fop we ngenna Yudaa fa Yeerusaleem, na ndoktaa no tokand kene!

²¹Keeke o Yaal oxe a layu: Mbootooxyo a qoox nuun, ba nu ndoxondoox toq na bes fee na ñootnax ale, ndeefin a den no tokand ke Yeerusaleem.

²²Ba nu sutit no pind ke nuun toq na bes fee na ñootnax ale too ba nu njal teen dara, ndaa tedlandyo bes fee na ñootnax ale, ne heblit’anuuma daan nuun

²³Kaa koy, daan nuun nan-gilooxee, ndungee nof den, a saƭik a qoox, ndax nan-gilooxkiraam soo a mbañ a cangin es.»

²⁴O Yaal oxe kaa tee: «Nu nan-gilooxangaam a paax, mbañ o ndoknit toq no tokand ke na teeru fene na bes fee na ñootnax ale, nu tedlandangaa bes fee na ñootnax ale too mbañ o njal teen dara,

²⁵maaga, maad fo gelwaar den xan a ndeefit no tokand kene. Maad weene xan a moof no uum-maamaad le Dawid, a ñaaƴtaa a sareet-xire fo pis, gelwaar den a njengel a den. Wiin we Yudaa fo we ngenna Yeerusaleem xan a ndeefit itam no tokand kene, too xan teeru fene a genel boo kili.

²⁶Xan wiin a inoortiid no teeru ke Yudaa fo me widna a Yeerusaleem, no jegel ole Bensame, no le na yulanq ake, no le na xa coong axe fo no ɓemb-roog o ñamaak, a ƥisiid kam Mbind ne no Yaal oxe sadax toxel, sadax lakas, sadax tuufe-duufe fa cuuraay, a ƥisiid o Yaal oxe itam sadax fa ngidmir.

²⁷Kaa koy, nu nan-gilooxangiraam, nu tedlandangee bes fee na ñootnax ale, ndoxondoox toq soo ndokit no tokand ke Yeerusaleem na bes fee na ñootnax ale, maaga xam heƥand fiɗel no tokand ke ten, ta raaɓ pind mosu ke Yeerusaleem, too ñufkee boo muk.»