Read NQAARIIT NE ROOG Yeremi 2 Bible Online

Yeremi 2 - NQAARIIT NE ROOG bible

Yeremi 2

¹O Yaal oxe a daawnaxam fa lay um ee:

²«Reti o yegin a Yeerusaleem kene: O Yaal oxe kaa tee: Kaam wetandooxaa ne gore’it’oona na mi, ye o refaa o ndeɓandoong, ne bugit’axamoona ye o refaa o toog es, ne reeftoogaxamoona na koƥ-a-ƥor alaa, no jegel olaa dara a saxkeerna.

³Maaga, Isra’el kaa kesan’el o Yaal oxe nen taawlax ke no saxade le. Fop we nduqooguuna, a nqawooge, taamaala a sagoox a den.» O Yaal oxe layun.

⁴Nuun mbind Yakoob, nuun a qaw ake Isra’el fop, nan-gilooxyo fa lay fee no Yaal oxe.

⁵O Yaal oxe kaa tee: «Ndi njofaƭar num daan nuun a nga’u na mi boo a tax da ngoƭaam, a ndeefan xa koɓong, boo a ndefat xa koɓong den fa qoox den?

⁶Laamteeyo yee: ‹Taa o Yaal oxe, ten oxe sutitna a in no saax laa Misira, a ɗox a in na koƥ-a-ƥor alaa, no lanq beeru kaa mayna a ƥaaxaand, no lanq kaa njegeerna o mboofi na pelyook ale na fa nqon fee, no lanq kaa o leng a naageerna o reefaa, too o leng genee maaga?›

⁷Ɓisiidaam a nuun no saax jaɓu taxar, ndax nu ñaam teen xa tim axe moƴna o mbel. Kaa koy, ye nu mbadiidna, nu nqoolaƭaranda saax es, o jeg es nu mbi’in sibdel.

⁸Saasadax we laamtee yee: ‹Taa o Yaal oxe?› We na njangnaa kebil ke andiraam, ɗooɗox we na xeet fee a siiknoor fa mi, duleer we a lay no gon Baal. Kaa ngiɓoor fo roog kaa mbaageerna o ndimle.

⁹Ten taxu um geenoox no layoorahin fa nuun, soo fi’kahinan fo xa taan nuun. Mi o Yaal oxe layun.

¹⁰Ƥeryo boog boo no fimb laa Sipere, no mudand, too ƭeet. Lulityo Kedaar, no batand, ngoroox a paax too ƭeet boo nga, ndax a jega teen nandu neene.

¹¹Ndax a jega xeet faa na sofaa roog den, ke da ndefeerna ndef roog fop oo? Xeet es o mat a softaxam xa koɓong xa ƥor, mi fee o ndam um[1].

¹²Asamaan, jaaxɗi no keene, send soo firiɓ! Mi o Yaal oxe layun.

¹³Xeet es a tooña a caf a ƭak: a mbaasaxam, mi fee refna a cur foofi fo ñoow ole, ndax da maxan a qoox den pand, pand kaa mbeɗidna boo mbaagee o ngarin foofi.»

¹⁴«Ndax Isra’el o paɗ o cike a refu, ndi kaa rimel no mbaƭ? Xar taxu ta gefel tuƈ?

¹⁵Fo njogoy fo njanglax kaa ŋuuranan, a mbumbaa, a ngef saax le ten tuƈ, soo teeru ke ten a ndaaɓel, o leng genatee teen.

¹⁶Wiin we Memfiis sax fo we Tapanes[2] kaa ƥuuraa ƭuf of.

¹⁷Ndax keene dalirang, yaam ne waasoona o Yaal oxe Roog of, ye ta ɗoxang a ɗox na ƭat ale sax oo?

¹⁸Ndiiki koy, xar a ɗaxu o retaa Misira, ndax o yerik no xuluɓ olaa Niil? Xar a ɗaxu o xotaa a ƭat ale Asuur, ndax o yerik no xuluɓ olaa Ofrat?

¹⁹Kañaan of xan a garit a qaw of, soo ngore’aƭar of a ɓisiid o yarel of. Neene, xan o and ne o waas o Yaal oxe Roog of, fañaam o saɗar, a faaxaƭaritna soo a feƭar.» O Yaal oxe na refkaa boo faw Hupna fop layun.

²⁰O Yaal oxe kaa tee: «Wo Isra’el, miñaa o ɓol kadoor ke wo, daƈit a cengir ake wo soo lay ee: ‹Dagooxkatiroong!› Kaa koy, took ñaang jiig luu refna fo yoora ndaxar saqtu nuu refna wondoortee maaga nen a caga.

²¹Yaag oo toox de kaam jimb’ong nen ndaxar biiñ safu[3], naa o ax ole a faaxna. Nam suptooro ndaxar biiñ malu, naa hatna a ngenareem?

²²O ɓogoorangaa ke na ran-gandaa sax oo mbaat o jiriiñoor a saafu mayu, gak le no tooñ of xan a maadaa mbaambir es. Mi o Yaal oxe na refkaa boo faw layun.

²³Nam saɗo o layit ee: ‹Xoolaƭarandooxiim, reefiim a ƭat ale Baaliin?› Ɗeeti ne o ñaaƴtaa na yulanq ale[4]! Anddilooxi ke fi’oona. O ga’angaang ee o ngeeleemb o ndew onqaa na ƴufaa o saax oo saax.

²⁴Kaa o nand fo o faam-a-koƥ o rew, merna a koƥ-a-ƥor ale. Kaa duñnooxaa nqeñ ne kam a yuxum um. A ŋaayax um, an waagun o xañit? Koor ke na mbaaƭan naangee o nqijaa, kaa soƥan ta bug o ŋaayoox.

²⁵Wo Isra’el, wootooxi ndik o ñaaƴ a caf a ƥor, wootoox a peep of a weer kaŋ! Kaa koy, kaa o doon ee: ‹Ha’aa, waasaam! Fexaam roog can ke too faw um reef a den.›

²⁶Ne o kuuɗ oxaa beteena a sedtaa, neene we na xeet fee Isra’el a seditkaa, den fo maad den, kelfa den, saasadax den fo duleer den.

²⁷Kaa layaa a teex ale yee: ‹Wo refu faap es›, soo ɓil le da layin ee: ‹Wo rimaxam na adna fee!› Kaa mbesaam ndiiñ, a mbañ o ƭeetaam, mi o Yaal oxe. Kaa koy, taamaala a sagooxangaa a den, da ndamtaam ee: ‹Inooxi mucil a in!›

²⁸Taa roog ke jaloodoona boog? Fat da inoox, a mbaagangaang o mucil yaa fa taamaala of! Yaam wo Yudaa, jegaa roog kaa mayitna nen teeru ke wo.

²⁹Xar taxu nu nqasraa fa mi? Nuun fop, nu siiknoora fa mi. Mi o Yaal oxe layun.

³⁰Xawaam a nuun, ndaa ɗaxee dara, nu njaɓee a maƭax aleene. Ndaa kañ, laƥ nuun a ñaama duleer we nuun, nu mband a den nen njogoy.

³¹Nuun wiin we no suk nene, nan-gilooxyo a paax ke o Yaal oxe a layna: Ndax a koƥ-a-ƥor reeƭum na Isra’el mbaat saax o niɓaan? Xar taxu xeet es a lay ee: ‹In njegu a qoox in, i mbugee o nomtooxiid me wo?›

³²Ndax o njaaƈ o ndoog a naaga weecaa kelax um, mbaat o kulook a weec o qap um? Xeet es o mat a mbeecaxam, yaa leng a andeerna.

³³Andaa a paax ne o ñaaƴnitaa, ndax o bugel. Ten taxu o merat boom sax.

³⁴Fo’oy le no toroxu we mbi’eerna dara oxey na xa lifar axe no ndoki ne wo. Yaag oo toox de betiro a den da mbaƭtaa begax of. Keene fop yaqanee

³⁵o lay ee: ‹Fi’iim cageer leng. Fat fuux le no Yaal oxe a goƭaam!› Kaa koy, mi o Yaal oxe, xam layoor fa wo, feek kaa o lay ee: ‹Bakaadiim.›

³⁶Xar o ñofandooxanaa boo suptaa a ƭat of? Xan Misira a sednoorong ne Asuur a sednoorit’oonga.

³⁷Xan o nomtoortiid me ten itam, roxondoox xa ƥay of, yaam mi o Yaal oxe deɓaam ke hoolooxoona. Xotitkiro ngoora leng na den.»