Read NQAARIIT NE ROOG Yeremi 20 Bible Online

Yeremi 20 - NQAARIIT NE ROOG bible

Yeremi 20

¹Pasehuur fee o ƥiy Imer, too a ref o saasadax oxe kelfa’na a yetax ale no Mbind Roog ne a nana Yeremi a yegnitaa fa lay faaga.

²Pasehuur a ranja o tuleer Yeremi mbaƭ soo a jengin na toɓand ale refna no Ndokand took ne Bensame na rokteel no Mbind ne no Yaal oxe.

³No feet olaa, Pasehuur a wokta a Yeremi na toɓand ale. Maaga, Yeremi a layaan ee: «O Yaal oxe xoykatirang Pasehuur, ndaa Magoor Misaabib, tekitna ‹diid le xey muu refna›.

⁴Yaam keeke o Yaal oxe a layu: ‹Xam ɓekong no diid, wo fo qaariit of fop. Xan laƥ ne no pañ den a maaf a den, too xan o ga’oodin. Xam ɓoxot xeet fee Yudaa fop na xa ƥay no maad oxe Babilon, too xan a ɓis a den Babilon took o hup doole, a xawit a den laƥ.

⁵Xam ɓoxot na xa ƥay no fañ den kalal ke no we ngenna na teeru fene fop, o rim ole no jale den fop, ke da njegna ta moƴ o faax fo a kamba ke no maad we Yudaa fop. Xan a njaɓel, a njangel soo a ƥisel Babilon.

⁶Wo Pasehuur itam fo we ngenna no mbind of fop, xan nu ƥisel took o hup doole. Xan o ret Babilon too maaga o xonitkaa, gasel maaga, wo fo qaariit of fop ke yegnoona tefee ndigil.› »

⁷O Yaal oxe, naxaxamo too yenaam me ɗaapanaxamoona. Naagaxamo nuus fa doole soo maafaam. Kaam gen no jaleel bes fuu refna, fop a nqaadnooxaxam.

⁸A mbanuu haƥatuuma o don es, waraam o wuuq, yegnit a ƭom-yedar fo ñagadil. Fa lay fee no Yaal oxe na taxaxam o xaadnooxeel soo weneel bes fuu refna.

⁹Maaga layaam ee: «Xalaatkatinum too laykatiim no gon um.» Kaa koy, kaa nand’u kam es nen fiɗel laa na kaƥaa, a wegoox na xa kiiƈ es. Jeemaanum o gadoox boo xij, ndaa waagatinum.

¹⁰Nanaam wiin mayu a layaa paaxeer na mi, a lastitaxam ee «Diid le xey muu refna». Leng we kaa layaa yee: «Fat nu ngoƥattin», lakas we yee: «Iyo, fat i ngoƥattin». Fop we jamoor’uuma sax kaa ngorooxaa na mi o njuumte nqe moƴna o neew, a layaa yee: «Xeƈa xan a yen me ta ɗaapaneena, soo i ndamin, ndabdinoox took um.»

¹¹Kaa koy, o Yaal oxe xey fa mi nen a salma-koor a cegu doole. Ten taxu we na ñagadilaxam xan a tolof too mbaagankiraam o sep. Xan a sed ɓot, yaam ne da njegeerna ne da mbugna, a ngaci boo faw, too o leng weeckiran.

¹²O Yaal oxe Hupna fop wo andu oxe jofna, horooxaa a pug fo a qalaat a ƭasu ke. Xam ga ndabdinax of took den, yaam wo doxnum nqeloor es.

¹³Ngimanyo o Yaal oxe, kaam ee simatyo o Yaal oxe, yaam kaa wataa o ñis no ndool onqe no ɓay no fiifi paaxeer we.

¹⁴Yaasam bes fee rimeema a salooxel! Koo baa bes fee ya es a rimaxama a barke’el!

¹⁵Yaasam o koor oxe mayƭandna a faap es fo o ɗaay ye ta yegnuuna yee: «Rimanee o ƥiy o ngoor», a salooxel!

¹⁶Yaasam o koor oxeene a nand fo teeru ke o Yaal oxe a jaxasna too jegee teen o ndicax. Yaasam ta nan xa poygax no nqes ne fo xa buuq xire njoloor o mbuc.

¹⁷Roog a hel’axam o warit no fud ya es, ndax ya es a ref a mboy es soo a ref fo fud boo faw!

¹⁸Xar taxu boog um sutoox no fud ya es, ndax um ñoowaa no coono fo na naqad soo xa yeng es a muukooraa gaci?