Read NQAARIIT NE ROOG Yeremi 21 Bible Online

Yeremi 21 - NQAARIIT NE ROOG bible

Yeremi 21

¹O maad Sedekiya[35] a lula a Pasehuur fee o ƥiy Malkiya, ten fa Sefaniya fee o saasadax too a ref o ƥiy Maseya maa Yeremi, ndax da layin ee: «Ga’rani a in fo o Yaal oxe, yaam Nebukadnesaar fee o maad oxe Babilon oxe xire’aa fa in. Xeƈa xan o Yaal oxe a fi’anahin a in njomlaand, ndax o pañ in oxeene a riƈatoox a in.» Maaga, o Yaal oxe a daawna a Yeremi fa lay um, soo ta heblit o yegnanel a Sedekiya yee:

⁴Keeke o Yaal oxe Roog fee Isra’el a layu: «Kaa nu ñoxoraa fo o maad oxe Babilon fo a yaj ake ten ƥiikilna a nuun. Kaa koy, xam ser xiixire we na ñoxorteel ƥonax den tafil saŋe ne da nomtoox cook kam ee kam teeru fee.

⁵Mi fa xoox es, xam ñoxorit fa nuun o ɓay o daawu fo a naax a cegu doole, kam fuux, o say fo ngañak.

⁶Xam xaw fop ke na ñoowaa na teeru fene, wiin we fo cegel ke, da nqonit na piste.

⁷Cinj kaaga, xam ɓoxot a Sedekiya fee o maad Yudaa fo dag um fo we na xeet fee na muckaa na piste fee, no laƥ ne fo no biim le na xa ƥay Nebukadnesaar fee o maad oxe Babilon, na xa ƥay no fañ den fo na xa ƥay no we mbugna njang o ñis den. Xan Nebukadnesaar a xawit a den laƥ too wuuskee a den, yirimkee a den mbaat ta jeg o liir na den. Mi o Yaal oxe layun.

⁸Xeet fene o mat, fat o lay a den ee: Keeke o Yaal oxe a layu: Ci’aam a nuun nu njil ndeer a ƭat ale no ñoow ole fo ale na fa nqon fee.

⁹Oxuu maadna o genaa kam teeru fene, laƥ mbaat biim mbaat piste na warkan, ndaa oxuu sutooxna soo a ɓoxotoox no Kaakalde we ƥiikilna a nuun, xan a ñoow, a mucil o ñis um tan-tan.

¹⁰Yaam xam geleerooxan teeru feene, refee koy ndax um muclin ndaa ndax um moocandin. Xan a ɓoxotel na xa ƥay no maad oxe Babilon na raaɓitkan fiɗel. Mi o Yaal oxe layun.»

¹¹Ke layeena no mbind ne no maad oxe Yudaa. Nan-gilooxyo ke o Yaal oxe a layna,

¹²nuun mbind Dawid! «Nqes nuu nu ngate’aa, ngate’ityo o cofel, suqit oxe na toroxandeel na xa ƥay no ñaañagadil oxe, ndik fuux es a biltoox nen fiɗel, a doxaa too waagkaand o ñuf, yaam a pi a paaxeer ake nuun! Mi o Yaal oxe layun.

¹³Mi yoo nuun oo, nuun we ngenna took ɓil fodru le garitna o saawit ole took[36]. Cey, nuun we na layaa yee: ‹An na fudooxkaa, a songiid a in? An na rokkaa no kenand ke in?›

¹⁴Xam xaw a nuun, reefandin no ke a pi nuun a njagitna. Xam heƥand fiɗel kam suungaan a toodook qool ake nuun[37], ta raaɓ ke widna a nuun fop. Mi o yaal oxe layun.»