Read NQAARIIT NE ROOG Yeremi 24 Bible Online

Yeremi 24 - NQAARIIT NE ROOG bible

Yeremi 24

¹O Yaal oxe a lalaxam a ƭamba ƭak xa tun akaa ndiƈeena mbaambir Mbind ne no Yaal oxe. Keene a reeƭa a cinj ye Nebukadnesaar fee o maad oxe Babilon a damitna a Yoyakin fee o ƥiy Yoyakim Yeerusaleem, a ɓisin took o hup doole kam Babilon, ten fo kelfa ke Yudaa, daadaaƴ we fo faal tafax we.

²A leng na ƭamba ke kaa saq’u xa tun xa paaxu lool nen xa tun xa poorateel axe, soo a ƭamba lakas ale a saq xa tun axaa mbaaxaƭarna mbaaxaƭar, boo mbaagaand o ñaam.

³O Yaal oxe a laamtaxam ee: «Yeremi, xar ga’o?» Um doon ee: «Xa tun ga’um. Xa tun xa paax axe kaa mbaax lool, xa paaxeer axe a mbaaxaƭar a mbaaxaƭar, boo mbaagaand o ñaam.»

⁴Maaga, o Yaal oxe a layaxam ee:

⁵«Keeke o Yaal oxe Roog fee Isra’el a layu: Ne xa tun xa paaxu xene a mbuudteel, neene we ndameena mbaƭ na Yudaa a ngaaltaxam, den we raxtuuma no mbiñ onqene boo no saax laa no Kaakalde we.

⁶Xan a kid es a ngaan took den, too xam nomtiid a den no saax lene. Xam sinjatin a den too taskatiim a den, xam jimbatin a den too fuurkatiim a den.

⁷Xam ci a den yiif laa da anditna yee mi refu o Yaal oxe. Xan a ndef xeet es, soo um ref Roog den, yaam xan a nomtooxiid me mi fo a qeeñ den fop.

⁸Ne xa tun xa paaxeer axe mbaaxaƭarna mbaaxaƭar, boo mbaagataand o ñaam a mbi’eel, neene um fi’kaa a Sedekiya fee o maad Yudaa, kelfa ke ten fo yoqatin we Yeerusaleem, we yoqna no saax lene fo we ngenna no saax laa Misira. Mi o Yaal oxe layun.

⁹Neene, maat ke na adna fee fop xan a ndiid, a njaq, yaa da nga’na a den. Xan a ndef benir fo naxoor, calat fo saloor no fo mbiñ ne um pasarkaa a den fop.

¹⁰Xam hebliid took den xire, biim fa piste, boo yaa da moockaa no saax lene ci’uuma a den, den fo daan we den.»