Read NQAARIIT NE ROOG Yeremi 25 Bible Online

Yeremi 25 - NQAARIIT NE ROOG bible

Yeremi 25

¹Keeke refu fa lay fee o tuleer Yeremi a daawna ta jagin na xeet fee Yudaa fop, no hiid o nahkandeer ole no maat Yoyakim fee o ƥiy Yosiya, too a ref o maad Yudaa, a jopir fo o hiid o eetaand ole no maat Nebukadnesaar fee o maad oxe Babilon.

²Yeremi a laya wiin we Yudaa fop fo we ngenna Yeerusaleem fop ee:

³«No kaa xotitna no hiid xarɓaxay fo o hiid o dadkandeer ole no maat Yosiya fee o ƥiy Amon too a ref o maad Yudaa, a gar fa xaye, xa kiid qarɓeen ƭik fo xa kiid xa tadaq axey axaa um daawaa fa lay fee no Yaal oxe, yegnan a nuun roog fuu feedna, ndaa nu nan-gilooxee.

⁴O Yaal oxe a lultiida a nuun duleer we dag um fop, roog fuu feedna ta luliid a den, ndaa nu nan-gilooxee, nu ndungee nof nuun, ndax nu nan.

⁵Kaa lul’u a den da lay ee: ‹Mbesyo a cinj boog a ƭat a paaxeer ale nuun fo kañaan ne na pi ake nuun. Maaga, xan nu ngen no saax le o Yaal oxe a ci’na a nuun, nuun fo daan nuun, bo na moos boo moos.

⁶Ba nu ngiɓoor fo roog lakas, ndax nu mbaɗoox a den, ngungaa mbaambir den, too ba nu mbuuxnoortaam nitaal roog ke nu njaloodna, yaaga fi’kiim a nuun paaxeer.

⁷Kaa koy, nu nan-gilooxiraam, ndaa kaa nu mbuuxnoortaam nitaal roog ke nu njaloodna, ndax nu or taamaala took nuun. Mi o Yaal oxe layun.›

⁸Ten taxu keeke o Yaal oxe Hupna fop a layu: ‹Feek nu nan-gilooxee fa lay es,

⁹xam lulit o xoyankel qeet ke no ɓemb-roog o janoon fop fa Nebukadnesaar fee o maad oxe Babilon, refna o tag es. Mi o Yaal oxe layun. Xam ɓisiid a den took saax lene fo we ngenna teen fo took qeet ke mbiduuna fop, ndax um saŋik a den, tas a den soo fi a den buuƴel, gef a den tuƈ boo faw.

¹⁰Xam ñuf a ndeer den xa ƈeel axe fo xa soroxole xe, o ñuxur no kor-no-kulook oxe fo ole no kuloox oxe, fangax le na ƥil a unir ake fo a qoolaand o lampa le.

¹¹Saax lene fop xan a fes a pec, a tas, too qeet kene xan a ndagoox o maad oxe Babilon boo xa kiid qarɓeen ɓetuu ƭik.

¹²Yaa xa kiid qarɓeen ɓetuu ƭik axe a mbadnooxkaa, xam dal took o maad oxe Babilon fa xeet um yaam tooñ den, dal took saax le den um taskaa boo kili. Mi o Yaal oxe layun.

¹³Xam fudin took saax leene fop ke layuuma no ten, fop ke bindeena no safe lene, padafuleer ke Yeremi a yegnitna took qeet ke fop.

¹⁴Yaam Kaakalde we fa qoox den itam xan a ndagoox qeet cegu doole fo maad maak, too xam rabid a den a pi den fo mbef den.› »

¹⁵Keeke o Yaal oxe Roog fee Isra’el a layaxam: «Xotti no ɓay es o feeƭ olene mayna muut fa biiñ fee no fuux le mi, soo yernin qeet ke um lulkang fop.

¹⁶Xan a yerin soo a tifil-tifilin, a mbiriɓ yaa da nga’kaa a bar ale um garitkaa a ndeer den.»

¹⁷Jangtaam o feeƭ ole no ɓay no Yaal oxe soo yernin qeet ke ta lul’axama fop.

¹⁸Yernaanum a Yeerusaleem fo teeru ke Yudaa, maad we ten fo kelfa ke ten, ndax teeru keene a mbes a pec, a tas, a ndefat buuƴel fo saloor, nen a xaye sax.

¹⁹Yernaanum a Firawon fee o maad Misira fo dag um, kelfa ke ten fa xeet um fop,

²⁰qeet pogreer ke na ñoowaa Misira fop, — maad we no saax le Uus fop, — we no saax le no Fiifilista we fop, ndefna we na teeru fee Askalon, fee Gaasa, fee Ekron fo we yoqna na fee Asdod,

²¹— Ee-edoom we, Moomowaab we fo Aa-amon we,

²²— maad we Tiir fop, we Sidoŋ fop fo we no fimb le kaltaa o maag ole,

²³— we ngenna Dedaan, Teema, Buus fo we na nduusaa took fee na xa ƭek axe den[42],

²⁴- maad we Arabi fop fo we no qeet pogreer ke na ñoowaa na koƥ-a-ƥor alaa,

²⁵— maad we Simri, we Elam fo we Medi fop,

²⁶— maad we no ɓemb-roog o janoon fop, da mat mbaat da ngoƭ, oxuu yoqteena, maat ke na adna fee fop daal, ndefna took lanq ke! A cinj den koy, xan o maad oxe Babilon[43] a yer.

²⁷O Yaal oxe a heblaxam um lay a den ee: «Keeke o Yaal oxe Roog fee Isra’el Hupna fop a layu: Yeryo, mbay nep, mbasil, yen boo nu inooxkatee, yaa nu nga’kaa a bar ale um garitkaa a ndeer nuun.»

²⁸A ɓaata teen ee: «A mbañangaa o nqotit no ɓay of o feeƭ ole, ndax da yer, fat o lay a den ee: Xan nu yer teen kañ, yaam o Yaal oxe Hupna fop heblitun.

²⁹Na teeru fee kesaneema um feritkaa taamaala fee, soo nuun o mat, nu mbug o ƭeetel nen caambuur! Nu ƭeetkaand nen caambuur, yaam xam hebliid laƥ took no fop we ngenna na adna fee.» O Yaal oxe Hupna fop layun.

³⁰O Yaal oxe a layahinaxam ee: «Yegnanaam a den a ƭelem akeene fop soo ɓaat teen ee: ‹O Yaal oxe xe bumbtaa maaga took-ee-took, o ñuxur um a fangoortaa no ngenand tedu ne ten. Oxe bumbanaa o suufnand um, ne we na nduutaa xa tim ndaxar biiñ no nirand a njibnitaa xa buuq, neene a wuuqantaa fop we ngenna na adna fee.

³¹Fangax le a nannooxa boo no cat adna, yaam o Yaal oxe xe layooraa fo qeet ke, a hate’aa pindeef ke fop, soxodu we ta ɓoxot a den da saŋkitel laƥ.› » O Yaal oxe layun.

³²Keeke o Yaal oxe Hupna fop a layu: «Taamaala xan a xotit na xeet boo na xeet, a und a maak a ɗisit no cat ke no lanq ke.»

³³We o Yaal oxe a warkaa a koom xan a luuñaa maaga, no cat leng boo no cat lakas no lanq ke. Nqaaraandkaand, ngiskaand too ngaskaand. Xan a ndefik tosir lanq ke.

³⁴Nuun ɗooɗox we, iinyo too mbuuq, nuun yaal xa siir axe, mbirkilooxyo a lanq, yaam ñaal ke nu nqiriskeel soo pasarel a mbadiida. Xan nu yen nen o ƥaxañ o cegu njiriiñ.

³⁵Maaga, xan ndaɗand ne no ɗooɗox we a sooƴ, laqooxand ne no yaal xa siir axe a mooc.

³⁶Nanyo xa buuq axe no ɗooɗox we fo xa iin axe no yaal xa siir axe, yaam o Yaal oxe xe ruudnaa xa suufnand den.

³⁷Xa suufnand jam axe a mbootata yaam fuux ɗomu le no Yaal oxe.

³⁸A waasa ngenand um, ne o njogoy o njanglax a waastaa nqanq um, yaam saax le den a raadnite fuux le no yaayaq oxe fo fuux ɗomu le ten.