Read NQAARIIT NE ROOG Yeremi 26 Bible Online

Yeremi 26 - NQAARIIT NE ROOG bible

Yeremi 26

¹No mberaandoong naa no maat Yoyakim fee o ƥiy Yosiya, too a ref o maad Yudaa, o Yaal oxe a daawna a Yeremi fa lay feeke.

²O Yaal oxe a layaan ee: «Geenooki no maax olaa no Mbind es, lay fop we ngenna no teeru ke Yudaa, na nqeɗiidaa no Mbind es, fop ke hebloonga o lay a den. Ba o hend teen dara!

³Xeƈa xan a nan-giloox, a mbes a cinj a ƭat a paaxeer den. Maaga, xam ricoox paaxeer ke yuuɓan’uuma a den yaam kañaan ne na pi den.

⁴Xan o lay a den boog ee: ‹Keeke o Yaal oxe a layu: Nan-gilooxaamoo, ndax nu ndeef kebil ke cooxuuma a nuun,

⁵nan-giloox fa lay no duleer we dag es um lultiidaa a nuun roog fuu feedna, too nu nan-gilooxee a den.

⁶Nu nan-gilooxatangiraam koy, xam fi Mbind neeke ne fi’uuma a Silo soo fi teeru fene a ref saloor no qeet ke na adna fee fop.› »

⁷Saasadax we, duleer we fa xeet fee fop ndeeƭna maaga a nana Yeremi a yegnitaa fa lay feene kam Mbind ne no Yaal oxe.

⁸Yaa Yeremi a layna boo a ƴut fop ke o Yaal oxe a hebil’uuna, ndax ta layin xeet fee fop, saasadax we, duleer we fo faan le ndeeƭna maaga fop a ndamaan, a layin ee: «Fa nqon jagto!

⁹Xar taxu o yegnitaa no gon no Yaal oxe yee Mbind neeke xan a nand nen a Silo, soo teeru feeke a tasel, a fes a pec?» Maaga, fop waa ndeeƭna no Mbind Roog ne a mbokatoorana a Yeremi.

¹⁰Yaa kelfa ke Yudaa a yegna ke xew’ina, a inoora no mbind ne no maad oxe, a ndet no Mbind ne no Yaal oxe soo a moof mbaambir Ndokand nqas ne no Mbind ne no Yaal oxe.

¹¹Maaga, saasadax we fo duleer we a laya kelfa ke fa xeet fee fop ee: «O koor oxene kaa war o maalel fa nqon! Nu nanooda fo nof nuun, ke ta layna took teeru fene.»

¹²Kaa koy, Yeremi a laya kelfa ke fop fa xeet fee fop ee: «O Yaal oxe lulaxam, ndax um yegnit took Mbind Roog nene fo took teeru fene a ƭelem ake nu nanna fop.

¹³Ndiiki koy, supityo a pesoorooƭ nuun fo a pi nuun, nan-giloox o ñuxur no Yaal oxe Roog nuun. Yaaga xan o Yaal oxe a ricoox paaxeer ke ta waajan’ina a nuun.

¹⁴Mi koy, mexey na xa ƥay nuun, mbi’aamoo kuu jagooxna too a jofoox a nuun.

¹⁵Kaa rek, fat nu and a paax ee nu mbarangaam, nu ngadooxa fo’oy jaambuur, nuun fa teeru fene fo we ngenna teen. Yaam no ndigil, o Yaal oxe lulaxam me nuun, ndax um yegin a nuun a ƭelem akeene fop.»

¹⁶Kelfa ke fa xeet fee fop a laya saasadax we fo duleer we yee: «O koor oxene waree o maalel fa nqon, yaam no gon no Yaal oxe Roog in a layu fa in.»

¹⁷Maaga, leng-leng no maak we no saax le a inooxa, a lay mbokatax ne na xeet fee yee:

¹⁸«Mise fee genna Moreset a yegnit’a padafuleer na jamaane Hiskiya fee o maad Yudaa too a layooga xeet fee Yudaa fop ee: ‹Keeke o Yaal oxe Hupna fop a layu: Siyoŋ xan a guurel a refat o qol, Yeerusaleem a refat juum kefatin, soo o joong ole no Mbind Roog ne a refat ñaang laa muurooxna fo suungaan.›

¹⁹Ndax Hiskiya fee o maad Yudaa fo we Yudaa fop a mbarnoor’aan? Ndax Hiskiya saɗar’ee o Yaal oxe? Ndax ƴufginoox’ee o Yaal oxe? Maaga, o Yaal oxe a ricooxa paaxeer ke ta waajan’ina a den. In o mat, i mbug o ngadin a qoox in paaxeer magnitu neene!»

²⁰Na jamaane Yeremi, a jeg’a itam o koor o lakas oxaa yegnitoogna padafuleer no gon no Yaal oxe. Uriya fee o ƥiy Semaya a reeƭu, too a gen’u Kiryat-Ye’arim. A layooga took teeru fene fo took saax lene ne Yeremi a laytooguuna deŋ.

²¹O maad Yoyakim fo aa-adax no xiixire we ten fop fo kelfa ke ten fop a nana ke Uriya a lay’ina. Maaga o maad oxe a waaƭooga maa ta warnoortuuna. Uriya a yegaan, a diid soo a ƴuf a ret Misira.

²²Kaa koy, o maad Yoyakim a lula a Elnatan fee o ƥiy Akboor Misira, ta yoon fo goor leng-leng.

²³A sutta a Uriya Misira, a ƥisin maa no maad Yoyakim. Oxeene a warnoortaan laƥ, a deɓnoor o dal ole ten no gasand ole rool we a ngaseel.

²⁴Yeremi o mat, Ahikam fee o ƥiy Safan saytoox’un. Ten taxu Yeremi ɓoxot’aand na xa ƥay xeet fee, ndax ta warel.