Read NQAARIIT NE ROOG Yeremi 27 Bible Online

Yeremi 27 - NQAARIIT NE ROOG bible

Yeremi 27

¹No mberaandoong naa no maat Sedekiya[44] fee o ƥiy Yosiya, too a ref o maad Yudaa, o Yaal oxe a daawna a Yeremi fa lay feeke:

²Keeke o Yaal oxe a layaxam: «Jalni xa ƥaak fo kadoor soo gadoox a den.

³Lulti a den o maad oxe Edoom, oxe Mowaab, oxe no Aa-amon we, oxe Tiir fo xe Sidoŋ, reefandin no duleer we den ngarna Yeerusaleem me Sedekiya fee o maad Yudaa.

⁴Ɓisni a den da lay yaal den ee: Keeke o Yaal oxe Roog fee Isra’el Hupna fop a layu: Keeke nu laykaa yaal nuun:

⁵Katil maak ne mi fo o ɓay o jegu doole le mi saktum lanq ke, wiin we fo muumeen ke ndefna took lanq ke, too sañaam o ci a den oxuu felaxama.

⁶Ndiiki koy, mexe ɓoxotaa a saax ake nuun fop na xa ƥay Nebukadnesaar fee o maad oxe Babilon, refna o tag es, cooxan muumeen-a-koƥ ke sax, ndax da ndagooxan.

⁷Qeet ke fop xan a ndagooxin, ten fo o ƥeem fo o ndaan um, boo na waxtu fee saax um a hapaneena itam, yaa qeet cegu katil fo maad maak a ndamkan mbaƭ.

⁸Boo xeet mbaat maat a ndagooxeerna a Nebukadnesaar fee o maad oxe Babilon, a mbañ o ngadoox a kadoor ale ta seraa a den, xam xawit a den xire, biim fa piste, boo yaa um moocanditkaa a den o ɓay um. Mi o Yaal oxe layun.

⁹Nuun koy, ba nu nan-giloox duleer we nuun, ɗeet we nuun, ɗaaɗaaɗ we nuun, maɗag we nuun, ñaañango we nuun, den we na layaa a nuun ee: ‹Nu ndagooxkee o maad oxe Babilon.›

¹⁰Xa maaƥ xa ƥor a yegnaa a nuun. Nu nan-gilooxangaa a den koy, xan nu ƥisel maa goƭna saax nuun, yaam xam raxit a nuun teen soo nu saŋkoox.

¹¹Kaa koy, xeet fee na njaɓkaa o ngadoox a kadoor ale o maad oxe Babilon a seraa a den soo a ndagooxin, xam xaƴ a den fo njaambuur den no saax den, ndax da nqooxan soo a ngen teen. Mi o Yaal oxe layun.»

¹²Daawnaam deŋ a Sedekiya fee o maad Yudaa leng kut ke yee: «Njaɓyo ngadoox a kadoor ale o maad oxe Babilon a seraa a nuun, ndagooxin, ten fa xeet um, too yaaga xan nu ñoow.

¹³Xar taxu wo fa xeet of nu mbar o nqonit na xire, biim mbaat piste, ne o Yaal oxe a laytuuna na xeet fuu ndagooxkeerna o maad oxe Babilon?

¹⁴Ba nu nan-giloox fa lay no duleer we na layaa a nuun ee: ‹Nu ndagooxkee o maad oxe Babilon!› Xa maaƥ xa ƥor a yegnaa a nuun.

¹⁵O Yaal oxe kaa tee: ‹Luliim a den, too kaa yegnitaa xa maaƥ no gon es, ndax um rax a nuun soo nu saŋkoox, nuun fo duleer we na yegnaa a nuun padafuleer.› »

¹⁶Layaam saasadax we fo we ndeeƭna maaga fop xa ƭelem axene: «Keeke o Yaal oxe a layu: Ba nu nan-giloox fa lay fee no duleer we nuun na yegnaa a nuun ee: ‹Ƥaxañ ke no Mbind ne no Yaal oxe wey a nomtitiideel Babilon no ñofu!› Xa maaƥ xa ƥor a yegnaa a nuun.

¹⁷Ba nu nan-giloox a den. Ndagooxyo o maad oxe Babilon, too xan nu ñoow. Xar taxu teeru fene a nar o refik juum kefatin?

¹⁸A soƥangaa yee duleer a ndefu tigi, too fa lay fee no Yaal oxe xe fa den, fat a nqeɗoox boog o Yaal oxe Hupna fop, ndax tig oo tig cegu njiriiñ ke yoqna kam Mbind ne no Yaal oxe, no mbind ne no maad oxe Yudaa fo kam Yeerusaleem ƥiskaand itam Babilon.

¹⁹Yaam keeke o Yaal oxe Hupna fop a layu na toodook ake, no waaŋaan o maak ole, no tiƈir ke fo no tig oo tig cegu njiriiñ lakas ke[45] yoqna kam teeru fene,

²⁰ke Nebukadnesaar fee o maad oxe Babilon a xot’eerna, ye ta damitna Yeerusaleem a Yoyakin fee o ƥiy Yoyakim, too a ref o maad Yudaa, fo garmi ke Yudaa fo ke Yeerusaleem fop, a ɓis a den took o hup doole kam Babilon.

²¹Yaaga boog, keeke o Yaal oxe Roog fee Isra’el Hupna fop a layu no tig oo tig cegu njiriiñ ke yoqna kam Mbind ne no Yaal oxe, no mbind ne no maad oxe Yudaa fo kam Yeerusaleem:

²²‹Xan a ƥisel Babilon, a yoq maaga boo a koom alaa um topatooxkaa a den, mi o Yaal oxe, yoɗatinit a den maaga soo nomtiid a den no mbiñ onqene.› »