Read NQAARIIT NE ROOG Yeremi 28 Bible Online

Yeremi 28 - NQAARIIT NE ROOG bible

Yeremi 28

¹No hiid o leng kut ole, no mberaandoong ne no maat Sedekiya fee o maad Yudaa, no nqool o ƥetkandeer onqe no hiid o nahkandeer ole, o tuleer Hananiya fee o ƥiy Asur, genna Gibe’on, a layaxam kam Mbind ne no Yaal oxe mbaambir saasadax we fa xeet fee fop ee:

²«Keeke o Yaal oxe Roog fee Isra’el Hupna fop a layu: ‹Xam ɓol a kadoor ale o maad oxe Babilon a seraa a nuun.

³Boo xa kiid xa ƭaq a ngelko fo mbadaa xam nomtiid no mbiñ onqene tig oo tig ke no Mbind ne no Yaal oxe fop, Nebukadnesaar fee o maad oxe Babilon a xotit’ina meen, a ɓis a den Babilon.

⁴Xam nomtiid no mbiñ onqene itam a Yoyakin fee o ƥiy Yoyakim, too a ref o maad Yudaa, fo fop we Yudaa ƥis’eena took o hup doole kam Babilon, yaam xam ɓol a kadoor ale o maad oxe Babilon a seraa a nuun.› »

⁵O tuleer Yeremi a doona o tuleer Hananiya mbaambir saasadax we fa xeet fee fop ndeeƭna kam Mbind ne no Yaal oxe,

⁶a lay ee: «Amiini! Yaasam o Yaal oxe a fi neene! Yaasam o Yaal oxe a fadin padafuleer ke yegnitoona, a nomtitiid Babilon boo no mbiñ onqene tig oo tig ke no Mbind ne no Yaal oxe fo fop we ƥis’eena took o hup doole.

⁷Kaa rek, nan-gilooxi a paax ke um laykang, wo fa xeet fene fop:

⁸Duleer we adooxna a in, mi fa wo, yaaga boo fa ndiik a yegna a saax a mayu fo maat maak xire, taamaala fa piste.

⁹Kaa koy, a soƥangaa yee o tuleer a yegnita jam, na pexey mbadnandoong naa no ke ta yegnitna ta anditkeel nen oxaa o Yaal oxe a lulna ndigil.»

¹⁰Maaga, o tuleer Hananiya a dontita a kadoor ale no cok ole no tuleer Yeremi, a ɓolin.

¹¹Cinj kaaga, Hananiya a laya mbaambir xeet fee fop ee: «Keeke o Yaal oxe a layu: ‹Neene deŋ, boo xa kiid xa ƭaq a ngelko fo mbadaa, um dontitkaa a kadoor ale Nebukadnesaar fee o maad oxe Babilon no cok qeet ke fop, ɓolin.› » Maaga, o tuleer Yeremi a suura a ƭat um.

¹²A cinj ye o tuleer Hananiya a ɓolna a kadoor ale no cok ole Yeremi, o Yaal oxe a daawna a Yeremi fa lay um na xa ƭelem axene:

¹³«Reti lay a Hananiya yee: Keeke o Yaal oxe a layu: Ɓolaa a kadoor a teex, ndaa xan o softin a kadoor a celem.

¹⁴Yaam keeke o Yaal oxe Roog fee Isra’el Hupna fop a layu: Doonaam a kadoor a celem no cok no qeet keene fop, ndax da ndagoox a Nebukadnesaar fee o maad oxe Babilon, too koy xan a ndagooxin. Muumeen a koƥ ke sax xam ɓoxotin a den.»

¹⁵Cinj kaaga, Yeremi a laya o tuleer Hananiya yee: «Nan-gilooxi a paax Hananiya: O Yaal oxe lulirang, soo wo, o riñ xeet fene no ngooloox xa maaƥ.

¹⁶Ten taxu, o Yaal oxe a layong ee: ‹Xam raxtong took lanq ke. Xan o xon no hiid olene, yaam kaa o riñ xeet fee da siiknoor fa mi o Yaal oxe.› »

¹⁷No hiid olaaga deŋ o tuleer Hananiya a xonu, no nqool ɓetuu ƭikandeer onqaa.