Read NQAARIIT NE ROOG Yeremi 29 Bible Online

Yeremi 29 - NQAARIIT NE ROOG bible

Yeremi 29

¹Keeke refu ke bindeena kam o leetar ole o tuleer Yeremi a lultitna Yeerusaleem me no we yoqna no maak we ƥis’eena took o hup doole, saasadax we, duleer we fa xeet fee fop Nebukadnesaar a damit’ina Yeerusaleem, a ɓis a den took o hup doole kam Babilon.

²A lulta o leetar ole cinj ye o maad Yoyakin, ya no maad oxe, cawdiin ke, kelfa ke Yudaa fo ke Yeerusaleem, daadaaƴ we fo faal tafax we a mbar’ina o sutoox Yeerusaleem.

³Yeremi a ɓoxotaan na xa ƥay Elasa fee o ƥiy Safan fa Gemarya fee o ƥiy Hilkiya, den we Sedekiya fee o maad Yudaa a lul’ina Babilon maa Nebukadnesaar fee o maad oxe Babilon. O leetar ole kaa lay’u yee:

⁴«Keeke o Yaal oxe Roog fee Isra’el Hupna fop a layu fop we ta damitna Yeerusaleem, a ɓis a den took o hup doole kam Babilon:

⁵‹Maxyo pind soo ngen a den, njimbyo a ƭing soo ñaam xa tim axe den.

⁶Ngiligyo, ndimik xa ƥiy xa koor fo xa tew, ngilgan xa ƥiy xa koor axe nuun soo ci’it xa ƥiy xa tew axe nuun a tolax, ndax da ndim xa ƥiy xa koor fo xa tew. Mayƭandyo meene nu ndefna too ba nu mbañoox.

⁷Mbaaƭyo jam fee na teeru fee ɓis’uuma a nuun took o hup doole too nqeɗooxanin o Yaal oxe, yaam jam um xan a ref jam nuun.›

⁸Yaam keeke o Yaal oxe Roog fee Isra’el Hupna fop a layu: ‹Ba nu nqaƴ duleer we fo ɗeet we ndefna a ndeer nuun da nax a nuun! Ba xa ƭaaɗ axe nuun a ngaal a nuun.

⁹Yaam padafuleer ke da yegnaa a nuun no gon es xa maaƥ xa ƥor oo. Luliim a den. Mi o Yaal oxe layun.›

¹⁰Kaa koy, keeke o Yaal oxe a layu: ‹Yaa xa kiid qarɓeen ɓetuu ƭik axe a mbadnooxkaa na Babilon, xam topatooxahin a nuun, fadnan a nuun a tegit es, nomtiid a nuun no mbiñ onqene.

¹¹Yaam mi o Yaal oxe andaam ke yuuɓanuuma a nuun. Jam yuuɓanum a nuun, yuuɓaniim a nuun paaxeer, ndax um ci a nuun muj fa mbaax fo yaakaar.

¹²Maaga, xan nu ƈufginooxaam, ngeleeroox farna fa mi, nqeɗooxaa, too xam jaaɓ a nuun.

¹³Xan nu mbaaƭaxam too xan nu nga’aam, yaam xan nu mbaaƭaam fo xeeñ nuun fop.

¹⁴Xam ga’noox a nuun. Mi o Yaal oxe layun. Xam nomtiid we ƥiseena na nuun gilaa saax took o hup doole, fokatit a nuun ndeer qeet ke fop fo no fo mbiñ ne fop pasar’uuma a nuun. Cinj kaaga, xam nomtiid a nuun no mbiñ onqe ɓisit’uuma a nuun gilaa saax took o hup doole. Mi o Yaal oxe layun.›

¹⁵Yaag oo toox de, kaa nu layaa yee: ‹O Yaal oxe a sutana a in duleer kam Babilon.›

¹⁶Keeke o Yaal oxe a layu no maad oxe moofna took uum-maamaad le Dawid fo na xeet fee fop ngenna na teeru fene, fog we nuun ƥis’aandeena fa nuun took o hup doole.

¹⁷Keeke o Yaal oxe Hupna fop a layu: ‹Mexe ɓisiidaa took den xire, biim fa piste. Xam fi da nand nen xa tun xa potu xaa mbaaxaƭarna mbaaxaƭar boo mbaagaand o ñaam.

¹⁸Xam daabit a den xire, biim fa piste. Neene, maat ke na adna fee fop xan a ndiid, a njaq, yaa da nga’na a den. Xan a ndef saloor, o njaq, o ndiidlataand fo cednooxu a ndeer qeet ke fop pasar’uuma a den,

¹⁹yaam nan-gilooxee fa lay es, den we um lultiidaa roog fuu feedna duleer we dag es. Nuun o mat oo, nu nan-gilooxee a den. Mi o Yaal oxe layun.›

²⁰Nuun koy, nan-gilooxyo fa lay fee no Yaal oxe, nuun fop we ƥiseena took o hup doole, nuun we o Yaal oxe a sutit’ina Yeerusaleem, a ɓis a nuun Babilon.

²¹Keeke o Yaal oxe Roog fee Isra’el Hupna fop a layu na Ahab fee o ƥiy Kolaya fo na Sedekiya fee o ƥiy Maseya, na yegnaa a nuun xa maaƥ xa ƥor no gon es: ‹Xam ɓoxot a den na xa ƥay Nebukadnesaar fee o maad oxe Babilon, too xan a war a den mbaambir nuun.

²²Xan da saloorteel ndeer we na Yudaa ƥiseena took o hup doole kam Babilon. Xan a layeel ee: Yaasam o Yaal oxe a fi’ong ne ta fi’na a Sedekiya fa Ahab, we o maad oxe Babilon a juɗna.

²³Yaam kaa da mbi o njombe kam Isra’el, ye da njimbooxna no ceeq fo rew no gend den soo a lay xa maaƥ no gon es. A soƥa koy ee hebliim a den dara. Andaam keene fop too mi fa xoox es seede’un. Mi o Yaal oxe layun.› »

²⁴O Yaal oxe a hebla a Yeremi ta yegin a Semaya fee genna Nehelam ee:

²⁵«Keeke o Yaal oxe Roog fee Isra’el Hupna fop a layu: ‹Lultaa o leetar no gon of a Sefaniya fee o ƥiy Maseya, too a ref o saasadax, lultin itam saasadax lakas we fa xeet fee Yeerusaleem fop, ndax o lay ee:

²⁶O Yaal oxe a dalnaang, wo Sefaniya, o saasadax na seek Yehoyada fee o saasadax, ndax o yetooxaa kam Mbind ne no Yaal oxe o koor oxuu na jiitaa, too a ne’ooxaa o tuleer, o jengin na toɓand fo a ƈang.

²⁷Ndiiki koy, xar taxu xasaniro a Yeremi fee genna Anatot, fi’ooxna o tuleer a ndeer nuun?

²⁸O ngar fa wo taxu ta waag o lultiid a in o leetar mene Babilon, ndax ta yegin a in ee xan i miñ a koƥ. A laya a in sax i max pind, ngen a den, njimb a ƭing soo ñaam xa tim axe den.› »

²⁹Sefaniya fee o saasadax a janga o leetar oleene a maak, too o tuleer Yeremi itam a nanaan.

³⁰Maaga, o Yaal oxe a hebla a Yeremi yee:

³¹«Lulti o layanel fop we ƥiseena took o hup doole yee: ‹Keeke o Yaal oxe a layu na Semaya fee genna Nehelam: Semaya a yegna a nuun padafuleer, too lulinum, a riñ a nuun nu ngooloox xa maaƥ.

³²Ten taxu, mi o Yaal oxe, xam xaw a Semaya fee genna Nehelam fo xa taan um. O leng na den genkee a ndeer xeet fene too ga’kee paax ke um fi’ankaa xeet es, yaam Semaya kaa riñ xeet es da siiknoor fa mi. Mi o Yaal oxe layun.› »