Read NQAARIIT NE ROOG Yeremi 30 Bible Online

Yeremi 30 - NQAARIIT NE ROOG bible

Yeremi 30

¹Yeremi a daawta no Yaal oxe fa lay fene:

²«Keeke layum, mi o Yaal oxe Roog fee Isra’el: ‹Bindi no safe fa lay fee layoonga fop.

³Ñaal key a ngaraa, kaa um nomtiidkaa we na xeet es, Isra’el fa Yudaa, ƥiseena gilaa saax took o hup doole, nomtiid a den no saax le ci’uuma daan den, too xan a njegkin. Mi o Yaal oxe layun.› »

⁴Keeke ndefu boog xa ƭelem axe o Yaal oxe a layna na Isra’el fo na Yudaa.

⁵Kaa tee: «Xa buuq o njom’andaand axey naneel, diid oo, refee jam.

⁶Laamityo boog too ƭeet: ndax o koor a naaga o ñootaa? Xar taxu um ga’aa o koor oo koor a dam ndet nen o tew oxaa na gaajooxaa? Xar taxu mukit ke fop a mbeƭar?

⁷Ndaw naqad! Ñaal nene a jaaxɗandta, jegee lakas naa nandna fo ten. Jamaane naqad oo na Yakoob, ndaa xan a muc teen.»

⁸O Yaal oxe Hupna fop kaa tee: «No ñaal neene, xam ɓol a kadoor ale meɗna no cok of, wo Yakoob, daƈit a cengir ake wo. Maaga, dagooxkatiro wiin jan we.

⁹Xan Ii-isra’el we a ndagoox o Yaal oxe Roog den fa Dawid fee um dalnatinankaa a den nen o maad.»

¹⁰O Yaal oxe kaa tee: «Wo Yakoob fee o tag es, ba o saɗar, ba o firiɓ, wo Isra’el, yaam mexey muclitang no lanq koƭu, muclit xa taan of no saax le da ƥiseena took o hup doole. Xan Yakoob a nomtooxiid, a ñoowaa na jam fo o yaadax, too o leng jom’andkatiran.

¹¹Yaam mexey fa wo, ndax um muclong. Mi o Yaal oxe layun. Xam moocand qeet ke pasar’oonga fop, ndaa wo o mat, moocandkiroong. Kaa koy, xam xawtong o cofel, waagiroong o ɗeet nen a jaambuur.»

¹²Keeke o Yaal oxe a layu[46]: «Ngaañax ne wo waagee o wod, too uut le wo a ɗoma lool.

¹³O leng fartirang, ndax ta laxas uut le wo. Jegee teex mbaax naa waagoonga o wodand.

¹⁴Fop we mbesanoogoonga[47] a mbeecaang, mbaaƭatirang muk, yaam xawtaaxoong nen o pañ, fadong ƭomu yaam tooñ mayu ke wo fo pakaad magnu ke wo.

¹⁵Xar taxu o ɗomatooxaa yaam ngaañax ne wo fo o ƭomel ole wo waageerna o wod? Tooñ mayu ke wo fo pakaad magnu ke wo taxu um fi’ong keene.

¹⁶Kaa koy, fop we na listang xan a listel, too fop we na noonooraa fa wo xan a ƥisel den fop took o hup doole. We na yaqang, xan a yaqel, too we na njaɓaa o jeg of, xam xaƴ o jeg den a jaɓel

¹⁷yaam xam nomtong no wod-fo-ɓaal, wodand a uut ake wo, wo Siyoŋ, wo fee na xoyeel ‹o tew o buuse xe›, a ƭat no leng a yongeerna. Mi o Yaal oxe layun.»

¹⁸Keeke o Yaal oxe a layu: «Xam xendandatin ƭiif ke Yakoob, yirim kenand ke ten, teeru fuu refna a maxatinel na pec um, mbind mosu nuu refna a daknel na seek a ndigil um.

¹⁹Xan a simat a yoɗoor a ndeer den, xa ƈeel no we na mbelakinooxaa. Xam mayƭand xeet es, too mbañooxkatee. Xam ɓoxot a den o ndam, too nqeefkataand.

²⁰Xa taan axe Yakoob xan a ñoowtikat nen daan waa yaaga, mbokatax den a geennel koŋ mbaambir es, ndaa xam xaw ñaañagadil we den fop.

²¹Kelfa den xan a hat na den, o kelwaar den a sutoor teen. Xam ci’in ta matiidaam, too xan a ɓeriid farna fa mi. Ndi an waagkoogu fi keene too ɓoxotee o ñis um, a refangeerna mi xoyun? Mi o Yaal oxe layun.

²²Xan nu ndef xeet es, soo um ref Roog nuun.»

²³A und ale no Yaal oxe xey! Fuux le a biltooxa, a qeñ a maak alaa na yo’nooxaa a dalaa took no soxodu we.

²⁴Fuux le no Yaal oxe ɓooskee boo yaa ta fi’kaa, a fadin yuuƥ ke no xeeñ um. Xan a jeg camaane kaa nu andkan.