Read NQAARIIT NE ROOG Yeremi 36 Bible Online

Yeremi 36 - NQAARIIT NE ROOG bible

Yeremi 36

¹No hiid o nahkandeer ole no maat Yoyakim fee o ƥiy Yosiya, too a ref o maad Yudaa, o Yaal oxe a daawna a Yeremi fa lay fene:

²«Waaƭi o laxas safe, bind teen fa lay fee layoonga fop no maat ne Isra’el fo ne Yudaa fo no qeet ke fop no kaa xotitna a koom alaa layuuma fa wo, na jamaane Yosiya, boo xaye.

³Xeƈa xan wiin we Yudaa a and taamaala fee yuuɓanuuma a den fop, ndax da mbes a cinj a ƭat a paaxeer ale den. Maaga, xam waasanit tooñ den fo pakaad den.»

⁴Maaga, Yeremi a xoya a Baruk fee o ƥiy Neriya soo a layaa fop ke o Yaal oxe a daawin’uuna, Baruk a bindan no laxas safe le.

⁵Cinj kaaga, Yeremi a hebla a Baruk ee: «Kaam xañtel o rok kam Mbind ne no Yaal oxe, waagiim o ret maaga boog mi fa xoox es.

⁶Kaa koy, wo na retkaa teen na bes fee no koor ne, jang no laxas safe le bindoona fa lay fee no Yaal oxe layoonga. Xan o nannoorin we na xeet fee na ndefkaa no Mbind ne no Yaal oxe boo no wiin we Yudaa na inoortiidkaa no teeru ke den.

⁷Xeƈa xan a tax da nqeɗoox o Yaal oxe, oxuu refna a fes a cinj a ƭat a paaxeer um, yaam fuux le fo say ole o Yaal oxe a regdinooxna xeet fene a magna.»

⁸Baruk fee o ƥiy Neriya a fi’a fop ke o tuleer Yeremi a hebil’uuna. A reta no Mbind ne no Yaal oxe, ndax ta jang maaga fa lay fee no Yaal oxe bindeena no laxas safe le.

⁹Keene xe xew’a no hiid o ɓetkandeer ole no maat Yoyakim fee o ƥiy Yosiya, too a ref o maad Yudaa, no nqool o ɓetuu nahkandeer onqe. Fop we ngenna Yeerusaleem fo fop we ngenna no teeru ke Yudaa kaa nqoy’el no Mbind ne no Yaal oxe, ndax da ngoor mbaambir no Yaal oxe.

¹⁰Maaga, Baruk a janga kam Mbind ne no Yaal oxe mbaambir xeet fee fop fa lay fee Yeremi bindeena no laxas safe le. Oxe geenoox’a na ndok ale Gemarya fee o ƥiy Safan, o piibind oxe, no maax took olaa, paam ndokand nqas ne no Mbind ne no Yaal oxe.

¹¹Mise fee o ƥiy Gemarya, too a ref o ndaan Safan a nana fa lay fee no Yaal oxe fop bindeena no laxas safe le

¹²soo a fudoox no mbind no maad ne, na ndok ale no piibind oxe. Kelfa ke fop kaa mbokatoor’u maaga. A jeg’a a Elisama fee o piibind oxe, Delaya fee o ƥiy Semaya, Elnatan fee o ƥiy Akboor, Gemarya fee o ƥiy Safan, Sedekiya fee o ƥiy Hananiya fo kelfa lakas ke fop.

¹³Mise a wetandooxa a den fop ke ta nan’ina ye Baruk a jangaa no laxas safe le mbaambir xeet fee.

¹⁴Maaga, kelfa ke fop a lula a Yehudi fee o ƥiy Netaniya, too a ref o ndaan Selemiya fo o ndanaraat Kuusi maa Baruk, ndax ta layin ee: «Xoti o laxas safe le jangoona mbaambir xeet fee too gar!» Baruk fee o ƥiy Neriya a xota o laxas safe le soo a ret maa den.

¹⁵A layaan ee: «Moofi too jangan a in ke bindeena no laxas safe le.» Baruk oo a janganaan a den.

¹⁶Yaa da nanna fa lay feene fop, a ƭeetra fo diid, a lay a Baruk ee: «Xan i yegin o maad oxe keene fop.»

¹⁷Cinj kaaga, a laamta a Baruk ee: «Layangi a in nam bindto keene fop? Ndax Yeremi layong o ten?»

¹⁸Baruk a doona a den ee: «Ten layoogaxam fa lay feene fop, soo um bindtaa a den aŋkar no laxas safe lene.»

¹⁹Maaga, kelfa ke a laya a Baruk ee: «Reti ɗasik, wo fa Yeremi, too ba o leng a and me nu ndefna.»

²⁰Den fa qoox den a ndeta no maax ole, me no maad oxe, cinj ye da nqaƴna o laxas safe le na ndok ale Elisama fee o piibind oxe. A yegna o maad oxe ke xew’ina fop.

²¹Maaga, o maad oxe a lula a Yehudi, ta xotik o laxas safe le. Yehudi a xottaan na ndok Elisama fee o piibind oxe, a jangin mbaambir no maad oxe fo kelfa ke ngeenoox’ina paam o maad oxe fop.

²²Kaa soƥ’u o maad oxe a genaa no mbind seeseek ne, yaam a jopir no nqool o ɓetuu nahkandeer onqe. Taƭoor yipu a kaagaañ kaa heƥand’el mbaambir um.

²³A mbanuu Yehudi a jang’ina xa per xa tadaq mbaat xa nahaq, o maad oxe a seeltooga a den nduus ne no piibind oxe, a deɓ a den kam fiɗel le no taƭoor ke, boo neene o laxas safe le fop a sooyu.

²⁴Neene, o maad oxe fo dag we ten fop nan’ina ke bindeena no laxas safe le ndiidee too mbaaree toki den yaam naqad.

²⁵Yaag oo toox de Elnatan, Delaya fa Gemariya a nqeɗoox’a o maad oxe, ndax doxkee o laxas safe le, ndaa nan-giloox’ee a den.

²⁶O maad oxe a hebla a Yerahmel fee o ƥiy no maad oxe, Seraya fee o ƥiy Asri’el fa Selemiya fee o ƥiy Abdel da ndam a Baruk fee o piibind oxe fo o tuleer Yeremi. Kaa koy, o Yaal oxe a ɗasna a den.

²⁷A cinj ye o maad oxe a doxna o laxas safe le saq’ina fop ke Yeremi a bindnoor’ina a Baruk, o Yaal oxe a laya a Yeremi yee:

²⁸«Dakooxi waaƭ o laxas safe lakas too bindahin teen fa lay fee fop reeƭna no laxas safe eetaand ole Yoyakim fee o maad Yudaa a doxna.

²⁹Xan o lay a Yoyakim fee o maad Yudaa yee: Keeke o Yaal oxe a layu: Wo o mat doxu o laxas safe lene, lay a Yeremi yee: ‹Xar taxu o bind teen ee a woora yee xan o maad oxe Babilon a gar, a gef saax lene soo a moocand wiin we fo cegel ke?›

³⁰Ten taxu keeke layum, mi o Yaal oxe, na wo Yoyakim fee o maad Yudaa: Jegkiro o ndaan o leng oxaa rondandoonga took uum-maamaad le Dawid, too o dal of xan a luuñaa na sumaan ale no ñaal ne fo na ƥuuɓ ale no yeng ole.

³¹Xam xawong, wo fo xa taan of fo dag of yaam tooñ nuun too xam ɓisiid took nuun, took we ngenna Yeerusaleem fo took wiin we Yudaa taamaala fee regdinooxuuma a nuun fop, too nu nan-gilooxiraam.»

³²Cinj kaaga, Yeremi a waaƭa o laxas safe lakas, a cooxin a Baruk fee o piibind oxe, too a ref o ƥiy Neriya. Baruk a binda teen ne Yeremi a laytooguuna o ten fa lay fee no laxas safe le fop Yoyakim fee o maad Yudaa a dox’ina. Fa lay fa lakas fa mayu fa nandu neen a ɓaatahine teen.