Read NQAARIIT NE ROOG Yeremi 37 Bible Online

Yeremi 37 - NQAARIIT NE ROOG bible

Yeremi 37

¹Nebukadnesaar fee o maad oxe Babilon a dalin’a a Sedekiya fee o ƥiy Yosiya o maad no saax le Yudaa na seek Yoyakin fee o ƥiy Yoyakim.[60]

²Kaa koy, Sedekiya mbaat dag um mbaat xeet fee no saax le nan-gilooxee ke o Yaal oxe a layoogna, a reefandin no tuleer Yeremi.

³O maad Sedekiya a lula a Yukal fee o ƥiy Selemiya fa Sefaniya fee o saasadax, too a ref o ƥiy Maseya, maa no tuleer Yeremi, ndax da layin ee: «Xeɗooxani a in o Yaal oxe Roog in!»

⁴Na jamaane faaga, Yeremi kaa widtoogu naa feltuuna a ndeer xeet fee, yaam ɓek’afulaand kaso.

⁵Xiixire we Firawon fee a sutoox’a Misira. Yaa Kaakalde we mbid’ina a Yeerusaleem o kurul-keƥ a yegna o nan olaaga, a ndiƈatooxa teeru fee.

⁶Maaga, o Yaal oxe a laya o tuleer Yeremi ta doon we Sedekiya a lulna yee:

⁷«Keeke o Yaal oxe Roog fee Isra’el a layu: Fat nu lay kene o maad oxe Yudaa lulna a nuun, ndax nu nga’ir fa mi: Xiixire we Firawon fee sutoox’ina, ndax da ƈufgiid a nuun, owe nomtooxaa no saax den Misira.

⁸Kaakalde we xan a nomtooxiid, a song teeru fene, a njaɓin soo a ndaaɓin.

⁹Mi o Yaal oxe, mexe layaa a nuun ee: Ba nu nax a qoox nuun, mboog ee Kaakalde we xan a ndet, a ngoƭ a nuun, yaam ndetkee.

¹⁰Nu nqawangaa sax xiixire we no Kaakalde we fop na nqire’aa fa nuun bo ta yoq na den goor waa ndibeena soom, xan a inooxatin, oxuu refna no ƭiif um, soo a ndaaɓ teeru fene.»

¹¹Ye xiixire we no Kaakalde we a ndiƈatooxaa a Yeerusaleem yaam xiixire we Firawon fee,

¹²Yeremi a jeema o sutoox Yeerusaleem. Kaa bug’u o ret no fiisel olaa Bensame, ndax ta daaw o ɗeg lanq um a ndeer xeet fee maaga[61].

¹³Ye ta fadiidna no Ndokand ne Bensame, a xeta maaga fo o aa-adax oxe no yeeyetax we ne’eena Yiriya, a ref o ƥiy Selemiya fo o ndaan Hananiya. A dama o tuleer Yeremi, a lay ee: «Maa no Kaakalde waa o jofaa!»

¹⁴Yeremi a doona yee: «Refee ndigil! Jofiim maa no Kaakalde waa.» Kaa koy, Yiriya nan-gilooxiran. A dama a Yeremi, a ɓisin maa no kelfa kaa.

¹⁵Weene a mbuuxana a Yeremi, a nqawin soo a mbegin no mbind Yoonatan fee o piibind oxe no maad oxe, maa da mbi’atna kaso.

¹⁶Neene, Yeremi a ɓeke no mband mbaqe ƥor, too a miñ’a maaga lool.

¹⁷Na bes fa leng, o maad Sedekiya a lulta o xotankel a Yeremi too a laamtaan na pet kam mbind no maad ne ten ee: «Ndax jegaa fa lay faa inoorna no Yaal oxe?» Yeremi a doona yee: «Ii, jegaanum.» A ɓaata teen ee: «Xan o ɓoxotel na xa ƥay no maad oxe Babilon.»

¹⁸Cinj kaaga, Yeremi a laamta o maad Sedekiya yee: «Na xar tooñoong mbaat dag of mbaat xeet fene boo a tax nu ƥekaam na kaso?

¹⁹Taa duleer we nuun boog yegnoogna a nuun padafuleer ee: ‹O maad oxe Babilon songiidkee a nuun mbaat saax lene?›

²⁰Ndiiki koy, nan-gilooxi, wo daali maad o yaal es! Ngela jaɓi a qeƭ es. Ba o nomtaam no mbind Yoonatan fee o piibind oxe, yaam ndik um xonit maaga.»

²¹O maad Sedekiya a heblita yee Yeremi a sektel no maax ole no yeeyetax we, a cooxeel bes fuu refna mbuuru muum no mbed ne no Juujuɗ Puuru we feek puuru ke njegaa na teeru fee. Naaga, Yeremi a yoqa no maax ole no yeeyetax we.