Read NQAARIIT NE ROOG Yeremi 38 Bible Online

Yeremi 38 - NQAARIIT NE ROOG bible

Yeremi 38

¹Sefatiya fee o ƥiy Matan, Gedaliya fee o ƥiy Pasehuur, Yukal fee o ƥiy Selemiya fa Pasehuur fee o ƥiy Malkiya a nana ye Yeremi a layaa xeet fee fop ee:

²«Keeke o Yaal oxe a layu: ‹Oxe na yoqkaa kam teeru fene xan laƥ mbaat biim mbaat piste a ñaamin, ndaa oxe na sutooxkaa, ndax ta ɓoxotoox no Kaakalde we, xan a ñoow, a mucil o ñis um tan-tan!›

³Keeke o Yaal oxe a layahinu: ‹No ndigil, xan teeru fene a ɓoxotel na xa ƥay no xiixire we no maad oxe Babilon na jaɓkan.› »

⁴Kelfa ke a laya o maad oxe yee: «O koor oxene fa nqon helun! Ke ta layaa kaa foosnooraa goor xiixire we yoqna kam teeru fene fa xeet fee fop. O koor oxene waaƭanee xeet fee jam, ndaa taamaala den a oraa.»

⁵Maaga, o maad Sedekiya a doona a den ee: «O ten oo xeene na xa ƥay nuun, yaam o maad oxe waagee dara na nuun.»

⁶Kelfa ke a njanga a Yeremi, ndax da ƥekin no mband mbaqe ne Malkiya fee o ƥiy no maad oxe reeƭna no maax ole no yeeyetax we. A yoornita teen a Yeremi xa ƥaak. Jeg’ee foofi kam mband mbaqe ne, ndaa a jeg’a no dung ole lopopooƈ, too Yeremi a loofa kam fee.

⁷Ebed-Melek, o Kuukuus oxe, a ref jawdiin faa fogna no mbind no maad ne, a yega yee Yeremi kaa deɓ’el kam mband mbaqe ne. Ne ta jopir’ina o maad oxe a ref no Ndokand ne Bensame,

⁸Ebed-Melek a sutoora no mbind no maad ne, a gar a lay o maad oxe yee:

⁹«Daali maad, o yaal es, goor wene a mbi’a cageer no fop ke da mbi’na o tuleer Yeremi. A ƥekaan kam mband mbaqe naa. Xan a xonit teen fo nqeex, yaam mbuuru jegatee na teeru fee.»

¹⁰Maaga, o maad oxe a hebla a Ebed-Melek, o Kuukuus oxe yee: «Xotti mene goor qarɓeen tadik, yoon fa den sutik o tuleer Yeremi no mband mbaqe naa boo ta helko fo xonaa.»

¹¹Ebed-Melek a xota goor we, a ret no mbind no maad ne, no mbiñ onqaa refna ɗuga kamba le, a xot maaga xa seegit xa nogoyu fo liir quuyooxu soo a yoorit a den xa ƥaak a Yeremi kam mband mbaqe ne.

¹²Ebed-Melek a laya a Yeremi yee: «Ŋaƭooxi xa seegit axene fo liir kene na xa naaplaand of, roof xa ƥaak axe ɗuga fee.» Yeremi a fi’a naaga.

¹³A qicta a Yeremi xa ƥaak axe, a suttin no mband mbaqe ne. Cinj kaaga, Yeremi a yoqata no maax ole no yeeyetax we.

¹⁴O maad Sedekiya a lulta o xotankel o tuleer Yeremi, a ɓisaniidel o ten no ndokand ndadkandeer ne no Mbind ne no Yaal oxe. O maad oxe a laya a Yeremi yee: «Kaam bug’ong o laamit tig! Ba o ɗasnaam dara.»

¹⁵Yeremi a doona a Sedekiya yee: «Um feeñlangaang ke jegna, ndax warnoorkiraamo? Um asangaang, nan-gilooxkiraamo!»

¹⁶Maaga, o maad Sedekiya a daaɓooxa na pet fa Yeremi, a lay ee: «Mexe daaɓoortan o Yaal oxe na ñoowaa, ten oxe ci’na a in o ñoow, ee warnoorkiroong too ɓoxotkiroong na xa ƥay no goor wene mbugna njang o ñis of.»

¹⁷Yeremi a laya a Sedekiya yee: «Keeke o Yaal oxe Roog fee Hupna fop, Roog fee Isra’el, a layu: ‹O sutooxangaa ɓoxotoox no kelfa kaa no maad oxe Babilon, xan o mucil o ñis of, too teeru fene raaɓkaand. Xan o ñoow, wo fo ƥasil of.

¹⁸Kaa koy, o fañangaa o ɓoxotoox no kelfa ke no maad oxe Babilon, teeru fene xan a ɓoxotel na xa ƥay no Kaakalde we na ndaaɓkan, too wo ɓostooxkiro na xa ƥay den.› »

¹⁹O maad Sedekiya a laya a Yeremi yee: «Kaam jaaxiɗ yaam Yuuyudaa we ƥoxotooxna no Kaakalde we. Kaam saɗaraa o ɓoxotel na xa ƥay den, da ñagadilaam.»

²⁰Yeremi a doonaan ee: «Ɓoxotkaandee. Nan-gilooxi o ñuxur no Yaal oxe ne laytoonga o ten, yaaga xan a malong, too xan o mucil o ñis of.

²¹Kaa koy, o fañangaa o ɓoxotoox, fa lay fene o Yaal oxe a feeñlaxama xan a fadnoox:

²²Rew we na yoqkaa kam mbind no maad ne Yudaa fop xan a ƥisel no kelfa kaa no maad oxe Babilon. Rew we xan a ngimanang ee: ‹We njamsa’oor’ina fa wo a njeyaang, a maafong. Ye a caf of a loofaa kam lopopooƈ le, a mbesaang ndiiñ.›

²³Rew we wo fop fo xa ƥeef xan a ƥisel maa no Kaakalde waa, too wo itam ɓostooxkiro na xa ƥay den. Xan o ɓay no maad oxe Babilon a naagong nuus, too teeru fene xan a raaɓel.»

²⁴Maaga, Sedekiya a laya a Yeremi yee: «Ba o leng a and dara na fa lay feene, too yaaga xonkiro.

²⁵Yaa kelfa ke a yegkaa yee layaam fa wo, xan a ngar a layang ee: ‹Yegni a in ke layoona o maad oxe fo ke o maad oxe a layoonga. Ba o ɗasin a in dara, too yaaga i mbarnoorkirang.›

²⁶Fat o doon a den ee: ‹Kaam xeɗooxoogu o maad oxe, ndax nomitkiraam no mbind Yoonatan, ndik um xonit maaga.› »

²⁷Naaga, kelfa ke fop a ngara me Yeremi, a ndef no laamtan. A doonta a den deŋ ne o maad oxe a heblit’uuna. A mbaasaan na yelem, yaam tigaa joot’ee.

²⁸Yeremi a yoqa no maax ole no yeeyetax we boo neene Yeerusaleem a jaɓe.