Read NQAARIIT NE ROOG Yeremi 39 Bible Online

Yeremi 39 - NQAARIIT NE ROOG bible

Yeremi 39

¹No hiid o ɓetuu nahkandeer ole no maat Sedekiya fee o maad Yudaa, no nqool xarɓaxayandeer onqe, Nebukadnesaar fee o maad oxe Babilon a gara fo xiixire um fop mbaambir Yeerusaleem, a mbidin o kurul-keƥ.

²No hiid xarɓaxay fo o hiid o lengandeer ole no maat Sedekiya, no ñaal ɓetuu nahkandeer ne no nqool o nahkandeer onqe, o gur a sexe no saŋe ne na teeru fee.

³Maaga, aa-adax we no maad oxe Babilon fop a ndoka na teeru fee, a ndal no Ndokand a ndeer ne. A jeg’a maaga a Nergal-Sareseer fee adooxanna xiixire we, Samgar-Nebo, Sarsekim fee adooxanna cawdiin ke, Nergal-Sareseer fee adooxanna yaal-o-and we fo aa-adax lakas we no maad oxe Babilon fop[62].

⁴Yaa Sedekiya fee o maad Yudaa fo xiixire we ten fop a nga’na ke xew’ina, a ƈufa, a sutoox teeru fee no yeng ole, a ndeef na ƭat ale na ƭing ale no maad oxe, no ndokand ne refna a ndeer saŋe ƭik ke soo a nqot a ƭat ale jaginna no xuluɓ olaa Yordaan.

⁵Kaa koy, xiixire we no Kaakalde we a ndaaba a den, a ndamit a Sedekiya na xa saawit axaa Yeriko. A ndama a Sedekiya, a ƥisin maa Nebukadnesaar fee o maad oxe Babilon reeƭna Ribla no saax laa Hamat. Maaga o mat Nebukadnesaar a hate’it’u a Sedekiya.

⁶O maad oxe Babilon a xirisnoora xa ƥiy xa koor axe Sedekiya maaga Ribla na kid faap den. A xirisnoora itam wiin maak we Yudaa fop.

⁷Cinj kaaga, a yulna a kid ake Sedekiya soo a diknoortin ceen xanjar, ndax ta ɓisin Babilon.

⁸Kaakalde we a ndaaɓa mbind no maad ne fo pind mosu ke na xeet fee soo a maaf saŋe ke Yeerusaleem.

⁹Cinj kaaga, Nebusaradan fee adooxanna yeeyetax we no maad oxe a ɓisa took o hup doole Babilon we maad’ina o ngenaa na teeru fee, we ƥoxotoox’ina no Kaakalde we fo we yoq’ina no baane ke[63].

¹⁰Kaa koy, rool we na xeet fee, we njeg’eerna dara, Nebusaradan a xaƴa a den da ngen no saax le Yudaa, a ci a den no ñaal naaga a ƭing taxar biiñ fo xa qol.

¹¹Nebukadnesaar fee o maad oxe Babilon a hebil’a a Nebusaradan no kaa farna na Yeremi yee:

¹²«Xotkeen, topatooxin a paax, ba o fi’in paaxeer leng, ndaa kañ fesoori fo ten ne ta layitkang.»

¹³Nebusaradan fee adooxanna yeeyetax we no maad oxe, Nebusasban fee adooxanna cawdiin ke, Nergal-Saretseer fee adooxanna yaal-o-and we fo aa-adax we no maad oxe Babilon fop

¹⁴a lulta o nqotankel a Yeremi no maax olaa no yeeyetax we. A ƥoxotaan a Gedaliya fee o ƥiy Ahikam, too a ref o ndaan Safan, ndax ta ɓisin ta xaad. Neene, Yeremi a genoogata a ndeer xeet fee.

¹⁵Ye Yeremi a maad’ina o dameel no maax ole no yeeyetax we, o Yaal oxe a daawnaan fa lay um na xa ƭelem axene:

¹⁶«Reti lay a Ebed-Melek, o Kuukuus oxe yee: Keeke o Yaal oxe Roog fee Isra’el Hupna fop a layu: ‹Xam fadin ke yegnituuma took teeru fene: Refee koy jam ndaa taamaala. Keene xan a fadnoox na kid of a koom.

¹⁷Wo o mat, xam muclong a koom. Mi o Yaal oxe layun. Ɓoxotkaandee na xa ƥay no wiin we o saɗaraa.

¹⁸A woora yee xam muclong, too laƥ ñaamkirang. Xan o mucil o ñis of tan-tan, yaam hoolooxaxamo. Mi o Yaal oxe layun.› »