Read NQAARIIT NE ROOG Yeremi 4 Bible Online

Yeremi 4 - NQAARIIT NE ROOG bible

Yeremi 4

¹O Yaal oxe kaa tee: «Wo Isra’el, o nomtooxiidangaa, kaam ee o nomtooxiidangaa me mi, o watnangaa nitaal roog cakalaaru ke wo mbaambir es, waas a coqooyax ale,

²daaɓoortaa o Yaal oxe na ñoowaa fo ndigil fo a ƭat fo o cofel, maaga qeet lakas ke sax na wo a mbarke’itkeel soo a mbakoortaxam.»

³Keeke o Yaal oxe a layu we ngenna Yudaa fa Yeerusaleem: «Mbigooxanyo a qoox nuun o qol o qas, mbañ o nduufat kam takar-ñiig ke.

⁴Nqucooxanyo o Yaal oxe, nqucoox na qeeñ nuun, nuun wiin we Yudaa fo nuun we ngenna Yeerusaleem, ndik fuux es a biltoox nen fiɗel, a doxaa too waagkaand o ñuf yaam a pi a paaxeer ake nuun.»

⁵Yegnityo kam Yudaa, lambin kam Yeerusaleem, luuƥ kam saax le, njibin xa buuq, lay ee: «Mbokatooryo, i ndet no teeru cegu saŋe ke!»

⁶Sipyo a laay a anddiloor farna fa Siyoŋ, ƈufyo, ba nu ngeenoox, yaam o Yaal oxe xe heblitiidaa taamaala no ɓemb-roog o janoon fo o njakad o maak.

⁷Njogoy ne a suqtoora no ngus um, o yaayaq oxe no qeet ke a xot a ƭat, a sutoor no sanand um, ndax ta gef saax nuun tuƈ. Teeru ke nuun xan a tasel, a mbes a pec.

⁸Ten taxu, nderooxyo xa saaku, ƭomatoox soo iin, yaam fuux ɗomu le no Yaal oxe waasee a in.

⁹O Yaal oxe kaa tee: «A koom xan njambaar ne no maad we fo ne no kelfa ke a ɓut, saasadax we a njaaxiɗ, soo duleer we a ndiid.»

¹⁰Maaga, xam lay ee: «Cey, o Yaal oxe na refkaa boo faw, naxaa xeet fene fa Yeerusaleem, ye layoona yee: ‹Xan nu njeg jam!› A soƥa fop koy, laƥ ne xe fandaa a in!»

¹¹Na jamaane faaga, xeet fene fa Yeerusaleem xan a layel ee: «Nqeñ sumu jip ne xe hatiidaa na xa coong axe naangna halit kam a koƥ-a-ƥor alaa, a jagin farna fa xeet es. Refee koy nqeñ naa na feesteel bele.

¹²Nqeñ njegu doole yoo, naa inoorna maana boo me mi. Ndiiki koy, xam hate a den.»

¹³O pañ oxe xey a garaa nen a eel o ufang, a sareet-xire ke ten a nandtaa a und, pis ke ten a moƴ o ñof a canjiik. «Sabab took in, yaam i ngefe tuƈ.»

¹⁴O Yaal oxe kaa tee: «Wo Yeerusaleem, ɓogdi xeeñ of no kañaan, ndax o muc. A qalaat a paaxeer of ake kaa ngenkaa kam of boo a mban?

¹⁵O nan a inoortiida Dan, a yegnitaa taamaala no kaa xotitna no joong olaa Efrayim[8].

¹⁶Mbetandyo kene qeet ke, andnoorin a Yeerusaleem: Soosong owe inoortiidaa no saax goƭu, a njibnaa xa buuq xire took teeru ke Yudaa.

¹⁷Kaa mbid a Yeerusaleem o kurul-keƥ nen yeeyetax waa ndeerna o qol, yaam kaa ta siiknoor fa mi. Mi o Yaal oxe layun.

¹⁸A pesoorooƭ of fo a pi of ngaru fo ke daloonga, wo Yeerusaleem. Kaa ref o rim ole no kañaan of. A woora yee kaa xaaɗ xut, too a roka boo kam xeeñ of.»

¹⁹Cey, o fud es, o fud es! Kaam lañtooxaa yaam o ɗomeel, xeeñ es a jaq! Waagiim o tiim muk, yaam nanoodaam a luuƥ, nan xa buuq xire.

²⁰O njakad took o njakad na yegniteel, yaam saax le fop a fiitne. Ndak fo ndak, ƭiif ke mi a mbayte, o laqooxand ole mi a gaakel ndeer ñaf fo ƭeet.

²¹Ndi boo a mban um bugko ga’aa a laay xire le soo nanaa fangax le na luuƥ ale?

²²O Yaal oxe kaa tee: «Xeet es kaa ƥodax, andiraam. Xa ƥiy xa ƭof a ndefu, axaa njegeerna yiif. Kaa mbaane no fi paaxeer, ndaa mbaagee o mbi paax.»

²³Ɗeetaam lanq ke, ga da yoq o ƥor, saxit’ee nen dara, um ɗeet a asamaan, a qoolaand ale ten a ñuf ɗuƭ.

²⁴Ɗeetaam xa coong axe, ga da yo’nooxaa, soo a ñaang ake fop a sendaa.

²⁵Ɗeetaam too ga’atiim o kiin o leng, soo tiiƭ ke na asamaan fop a ƈuf.

²⁶Ɗeetaam too ga’aam ee a ƭing a refata a koƥ-a-ƥor, soo teeru ke fop a ngef tuƈ. Keene fop o Yaal oxe fi’tun fuux ɗomu le ten.

²⁷Keeke o Yaal oxe a layu: «Saax le fop xan a raad, ndaa koy gefkinum tuƈ.

²⁸Ten taxu lanq ke a ñaawooxaa, soo asamaan fee a niifaar maaga took, yaam layaanum, fosooxin. Ricooxkinum, nomtooxkiim teen a cinj.»

²⁹Teeru fee fop a ngoda o joor no fangax le no ŋaaŋaay pis we fo xaaxaƴ a qali we. Xa kus axe we njaɓnooxeel, a ƥil ake a ñayooxeel. Teeru fee fop a waase, too o leng genatee teen.

³⁰Kaa koy, wo Yeerusaleem fee bayteena, xar o fi’kaa? Kaa o rokooxaa tikoorik taalde’u, heloortaa kumooxel wurus, tusngul a kid of. Kaa o mosandooxaa na dara. Xa pes axe wo kaa sibatong, o mbarong doŋ a mbugu.

³¹Yaam kaam nanaa xa buuq nen axe no tew oxaa na gaajooxaa, xa buuq o ƭomel nen axe no tew oxaa na ñootaa taaw um. O ñuxur ole Siyoŋ oo. Kaa iinaa, a dek xa ƥay ee: «Sabab took es! Kaam xonaa yaam a qaw ale no waawar we!»