Read NQAARIIT NE ROOG Yeremi 40 Bible Online

Yeremi 40 - NQAARIIT NE ROOG bible

Yeremi 40

¹O Yaal oxe a daawna a Yeremi fa lay um a cinj ye Nebusaradan fee adooxanna yeeyetax we no maad oxe Babilon a nomtit’uuna Rama. Yeremi kaa humit’el ceen a ndeer no we ndameena na Yeerusaleem fo na Yudaa mbaajoogeena o ƥis Babilon took o hup doole.

²O aa-adax oxe no yeeyetax we no maad oxe a xotnika a Yeremi, a layin ee: «O Yaal oxe Roog of a yegnit’a took saax lene taamaala fene.

³Ndiiki koy, o Yaal oxe a hebliida, a fadin ke ta yegnit’ina. Ne nu tooñna o Yaal oxe too nu nan-gilooxee o ñuxur um, taxu keene a dal a nuun.

⁴Wo o mat, xam woktanong xaye ceen ke na xa ƥay of. O yoon fa mi Babilon a jofooxangaang, gari, too xam topatooxong a paax. Kaa koy, a jofooxangirang itam, ba o gar. Ɗeetangi, saax le fop oxey mbaambir of, reti muu jagooxoonga too a jofooxong.»

⁵Maaga, ne Yeremi a maad’ina o doongaa ke ta fi’kaa, Nebusaradan a ɓaata teen ee: «Nomtooxi maa Gedaliya fee o ƥiy Ahikam, too a ref o ndaan Safan, o maad oxe Babilon a dalinna ta maadooxaa took teeru ke Yudaa. Geni fo ten a ndeer xeet fee mbaat o dal muu jofooxoonga.» O aa-adax oxe no yeeyetax we no maad oxe a cooxaan ñaamel fo neexil soo a xaƴin ta ret.

⁶Yeremi a reta maa Gedaliya fee o ƥiy Ahikam, maaga Mispa, soo a genat fo ten a ndeer no we na xeet fee yoq’ina no saax le.

⁷A jeg’a aa-adax no xiixire we Yudaa maad’ina o pasarooxaa na koƥ alaa. Den fo goor den a yega yee o maad oxe Babilon a dalin’a a Gedaliya fee o ƥiy Ahikam ta maadooxaa no saax le soo a doxnin goor, rew, xa caaƈ fo rool we no saax le ƥis’aandeena Babilon took o hup doole.

⁸A soƥiida a Gedaliya Mispa. Den ndeeƭu Isma’el fee o ƥiy Netaniya, Yohanan fa Yoonatan we xa ƥiy Kare’a, Seraya fee o ƥiy Tanhumet, xa ƥiy xa koor axe Efay fee genna Netofa fa Yesaniya fee rimeena Maaka, den fo goor den.

⁹Gedaliya fee o ƥiy Ahikam, too a ref o ndaan Safan, a daaɓooxa fa den, den fo goor den, ee: «Ba nu saɗar o ndagoox Kaakalde we, moofyo no saax le, ndagoox o maad oxe Babilon, too yaaga xan a mal a nuun.

¹⁰Mi o mat, meeke Mispa um yoqkaa, ndax um refan Kaakalde we na ngarkaa me nuun. Nuun o mat mboqyo xa biiñ axe, xa tim axe fa diwliin, yip a den na xa ƥaxañ axe nuun soo moof no teeru ke nuun nu saqna.»

¹¹Yuuyudaa we fop oo ndeeƭna Mowaab, maa no Aa-amon we, kam Edoom fo na saax a lakas ake fop a yega yee o maad oxe Babilon a xaƴ’a yoqatin kam Yudaa, a dalnan a den a Gedaliya fee o ƥiy Ahikam, too a ref o ndaan Safan, ta maadooxaa took den.

¹²Maaga, Yuuyudaa weene fop a nomtoortiida no fo mbiñ ne da pasar’eena fop, a ngar no saax le Yudaa, a ƥoxotoox na Gedaliya, maaga Mispa. A ngisa xa biiñ fo xa tim xa mayaan axaa muk.

¹³Yohanan fee o ƥiy Kare’a fo aa-adax we no xiixire we fop ndeeƭna na koƥ alaa a soƥiida a Gedaliya Mispa,

¹⁴a layin ee: «Ndax andaa a paax ee Baalis fee o maad no Aa-amon we a luliida a Isma’el fee o ƥiy Netaniya, ndax ta jang o ñis of?» Kaa koy, Gedaliya fee o ƥiy Ahikam gim’ee fa lay den.

¹⁵Maaga, Yohanan fee o ƥiy Kare’a a lay’a a Gedaliya na pet maaga Mispa yee: «Xaƴi um ret war a Isma’el fee o ƥiy Netaniya. O leng andkiran. Xar na taxkaa ta xaƴel a jang o ñis of? Xar taxu we ngenna Yudaa mbokatoorna me wo a pasarooxkahinaa, soo yoqatin we Yudaa a saŋkoox?»

¹⁶Kaa koy, Gedaliya fee o ƥiy Ahikam a doona a Yohanan fee o ƥiy Kare’a yee: «Ba o fi kaaga, yaam ke o layaa na Isma’el jegee.»