Read NQAARIIT NE ROOG Yeremi 41 Bible Online

Yeremi 41 - NQAARIIT NE ROOG bible

Yeremi 41

¹No nqool o ɓetuu ƭikandeer onqe no hiid o leng kut olaaga, Isma’el fee o ƥiy Netaniya, too a ref o ndaan Elisama, a gara Mispa me Gedaliya, a yoon fo goor xarɓaxay. Isma’el kaa fog’u no ƥasil no maad, a ref o leng no aa-adax no xiixire we no maad oxe. A ndeerandoora a ñaamaa kam Mispa.

²Maaga, Isma’el a naaga daket, ten fo goor xarɓaxay we yoon’ina fo ten, soo a nqawit laƥ a Gedaliya fee o ƥiy Ahikam, too a ref o ndaan Safan. Naaga, a mbara oxe o maad oxe Babilon a dalin’ina ta maadooxaa no saax le.

³Isma’el a warahina goor Yuuyudaa we ndeeƭna fa Gedaliya fop kam Mispa fo xiixire Kaakalde we ndeeƭna maaga.

⁴No feet olaa, a soƥ o leng yegafulee a bar ale Gedaliya,

⁵goor qarɓeen ɓetuu tadik waa inoortiidna Sikeem, Silo fa Samari a matiida Mispa. Kaa nduus’u xa taatam den, a nquuy toki den soo a ñaasoox[64]. Kaa saq’u sadax tuufe-duufe fa cuuraay, ndax da ƥoxot a den kam Mbind ne no Yaal oxe.

⁶Isma’el fee o ƥiy Netaniya a sutoora Mispa, a xetik fa den, a loolaƭooxaa. Yaa ta fadna maa den, a laya a den ee: «Mbadiidyo maa Gedaliya fee o ƥiy Ahikam!»

⁷Kaa koy, yaa da mbadiidna a ndeer teeru fee, Isma’el fo goor we yoon’ina fo ten a nqirsa a den soo a ndeɓ a den kam mband mbaqe.

⁸A jeg’a koy a ndeer den goor xarɓaxay waa lay’ina a Isma’el ee: «Ba o war a in, yaam i njega ñaamel kaa i laqna na xa qol axaa: bele, lorso, diwliin fo suum.» Maaga, a wuusa a den too waree a den nen yoon den.

⁹Mband mbaqe ne Isma’el a deɓna xa tal axe no goor waaga fop mbar’eena reeƭu mband mbaqe maak ne[65] o maad Aasa a waqin’ina, ye ta xire’aa fa Baasa fee o maad Isra’el. Mband mbaqe neene Isma’el a mayƭand’u fo xa tal.

¹⁰Cinj kaaga, Isma’el a dama mbaƭ yoqatin we na xeet fee fop ndeeƭna Mispa, boo na xa ƥiy xa tew axe no maad oxe sax, fop daal we Nebusaradan fee adooxanna yeeyetax we no maad oxe a doxin’ina a Gedaliya fee o ƥiy Ahikam. Isma’el a ɓisa a den nen faɗ, a jagin maa no Aa-amon waa.

¹¹Yohanan fee o ƥiy Kare’a fo aa-adax we no xiixire we fop ndeeƭna fo ten a yega paaxeer ke Isma’el fee o ƥiy Netaniya a fi’ina fop.

¹²A nqota goor we den fop, a ndet a songik a Isma’el. A ndaawtaan paam a mbeel a maak alaa Gibe’on.

¹³Yaa we Isma’el a dam’ina mbaƭ a nga’na a Yohanan fo aa-adax we no xiixire we fop yoonna fo ten, a mbelakinooxa.

¹⁴Maaga, we Isma’el a ɓistiid’ina Mispa fop a nqurulooxa, a nomtoox soo a mbokatooriid fa Yohanan.

¹⁵Kaa koy, Isma’el fo ɓetuu daduk no goor we ten a ƈufa mbaambir Yohanan, a ndaɗik maa no Aa-amon waa.

¹⁶Yohanan fee o ƥiy Kare’a fo aa-adax we no xiixire we fop ndeeƭna fo ten a nqota yoqatin we na xeet fee fop Isma’el fee o ƥiy Netaniya a ɓistiid’ina Mispa a cinj ye Gedaliya fee o ƥiy Ahikam a wareena. A jeg’a na den goor xiixire, rew, xa caaƈ fo cawdiin. Den fop Yohanan a nomtitiida a den Gibe’on.

¹⁷A nqota a ƭat, a ƥutnoox no daland olaa Kimham paam Betleheem. Kaa mbosoox’u o ndet Misira,

¹⁸ndax da ngoƭ Kaakalde we. Kaa saɗaroogu a den, yaam ne Isma’el fee o ƥiy Netaniya a war’ina a Gedaliya fee o ƥiy Ahikam o maad oxe Babilon a dalin’ina ta maadooxaa no saax le.