Read NQAARIIT NE ROOG Yeremi 43 Bible Online

Yeremi 43 - NQAARIIT NE ROOG bible

Yeremi 43

¹Yaa Yeremi a layna xeet fee fop boo a ƴut fop ke o Yaal oxe Roog den a sim’uuna ta lay a den,

²Asariya fee o ƥiy Hosaya, Yohanan fee o ƥiy Kare’a fo goor felnooxu we fop a laya a Yeremi yee: «Ke o layaa jegee, o Yaal oxe Roog in lulirang o lay a in ee i mbaree o ndet Misira, ndax i laqook maaga.

³Kaa koy, Baruk fee o ƥiy Neriya o mat riñong na in. Kaa bug o ɓoxot a in na xa ƥay no Kaakalde we, ndax da mbar a in mbaat da ƥis a in Babilon took o hup doole.»

⁴Neene, Yohanan fee o ƥiy Kare’a, aa-adax lakas we no xiixire we fa xeet fee fop nananee ke o Yaal oxe hebil’ina a den da ngen no saax le Yudaa fop oo.

⁵Yohanan fo aa-adax lakas we no xiixire we a nqota boog yoqatin we Yudaa fop nomtoortiid’ina a ndeer qeet ke da pasaroox’ina fop, ndax da ngen no saax le Yudaa.

⁶A jeg’a na den goor, rew, xa teɓandoong, xa ƥiy xa tew axe no maad oxe fo fop we Nebusaradan fee adooxanna yeeyetax we no maad oxe Babilon a doxin’ina a Gedaliya fee o ƥiy Ahikam, too a ref o ndaan Safan, o tuleer Yeremi itam fa Baruk fee o ƥiy Neriya.

⁷A ndeta no saax laa Misira, yaam nananee ke o Yaal oxe a hebil’ina, too a mbadiida Tapanes[66].

⁸O Yaal oxe a daawnita a Yeremi fa lay um Tapanes ee:

⁹«Xoti a ƥil a maak, uup a den no ɗok le no dung ole refna no don-maax ole no mbind no maad ne Firawon fee kam Tapanes. Fi’i keene na kid no Yuuyudaa we.

¹⁰Cinj kaaga, layi a den ee: Keeke o Yaal oxe Roog fee Isra’el Hupna fop a layu: Nga’angyo, xam lulit o xoyankel o tag es Nebukadnesaar fee o maad oxe Babilon. Xam sip uum-maamaad um took a ƥil akeene uupeena, soo ta letin yiir um yoora den.

¹¹Xan a gar, a xaw saax le Misira: Oxe lafooxaneena fa nqon, xan a jof na fa nqon, oxe lafooxaneena mbaƭ, a jof no mbaƭ, oxe lafooxaneena laƥ, a jof no laƥ.

¹²Xan a heƥand[67] pind roog ke Misira, a dox roog keene mbaat ta ɓis a den. Ne o kaynaak a ɓaaltaa pay um, Nebukadnesaar a ɓaalitkaa saax le Misira. Cinj kaaga, xan a sutoox teen na jam.

¹³Xan a gef a toodook a ƥil a tedlande ke Bet-Semes[68] no saax le Misira, a dox pind roog ke Misira.»