Read NQAARIIT NE ROOG Yeremi 44 Bible Online

Yeremi 44 - NQAARIIT NE ROOG bible

Yeremi 44

¹Keeke refu fa lay fee no Yaal oxe daawneena a Yeremi, ta jagin no Yuuyudaa we fop ndal’ina no saax le Misira too a ngenoogu na teeru fee Migdol, fee Tapanes fa fee Memfiis fo no jegel ole Patros garitna no ɓemb-roog o ñamaak:

²«Keeke o Yaal oxe Roog fee Isra’el Hupna fop a layu: Nu nga’a taamaala fee fop ɓisiiduuma took Yeerusaleem fo took teeru ke Yudaa fop. Den oo weene a mbesa a pec xaye, too o leng genatee teen.

³Keene a xewa, yaam we ngen’ina teen a mbi paaxeer, ndax da mbuuxnooraam. A ndoxana roog can ke cuuraay soo a mbaɗoox a den, ke da and’eerna a den fop oo, ta ref den mbaat nuun mbaat daan nuun.

⁴Kaam gen no luliidaa a nuun duleer we dag es ñaal oo ñaal, ndax da lay a nuun ee: ‹Mbaasyo a pi a cednooxu leene sibuuma!›

⁵Kaa koy, nu nan-gilooxee, nu ndungee nof nuun, ndax nu mbaas paaxeer ke nuun, mbañ o ndoxan cuuraay roog can ke.

⁶Maaga, o say es fo fuux es a njuumooxa, a ndaaɓ teeru ke Yudaa fo ped ke Yeerusaleem. Teeru keene a ndefata juum kefatin, a mbes a pec, ne ta waageena o ga’it xaye.

⁷Ndiiki koy, keeke o Yaal oxe Roog fee Hupna fop, Roog fee Isra’el, a layu: Xar taxu nu mbi’aa a qoox nuun paaxeer ƭomu, suudtaa a ndeer xeet fee Yudaa goor fo rew, xa caaƈ fo bax, boo jegatee na nuun yoqatin leng?

⁸A pi nuun kaa mbuuxnooraam! Kaa nu ndoxanaa cuuraay roog can ke no saax le Misira, me nu laqooxiidna, ndax nu mbañooxaa, ndef saloor fo niwaƭarel a ndeer qeet ke no lanq ke fop.

⁹Ndax kaa nu mbeecit a pi a paaxeer ake no daan nuun, ake no maad we Yudaa fo ake no rew den, ake na nuun fa qoox nuun fo ake no rew nuun mbi’eena no saax le Yudaa fo no ped ke Yeerusaleem?

¹⁰Boo xaye nu ndicooxee, nu saɗariraam, nu ndeefee kebil es fo bargal es ke cooxuuma a nuun, nuun fo daan nuun.

¹¹Ten taxu keeke o Yaal oxe Roog fee Isra’el Hupna fop a layu: Nga’angyo, hebooxaam o fi a nuun paaxeer, saŋik xeet fee Yudaa fop.

¹²Xam dam we yoqna na Yudaa mbosooxna o ndet no saax laa Misira, ndax da laqook maaga. Misira a saŋkoorkaa den fop. Xan laƥ mbaat biim a ñaam a den, a xotit no xe moƴna o neew boo no xe moƴna o maak. Kaam ee, xan laƥ mbaat biim a war a den, da ndef saloor, o njaq, qeefel fo cednooxu.

¹³Ne daltuuma took we Yeerusaleem, um dalitkaa took we laqooxna no saax le Misira: fo laƥ, biim fa piste.

¹⁴O leng no we yoqna na Yudaa too a laqooxiid mene, no saax le Misira, ɓostooxkee mbaat ta daɗ. O leng na den nomtooxkee no saax le Yudaa, da ndiilooxaa o ngenatinik, a refangee leng-leng waa na ƥostooxkaa.»

¹⁵Goor we fop and’ina yee rew we den kaa ndoxanoogu roog can cuuraay, rew mayu we mbokatoor’ina maaga fop fo we na xeet fee fop ndal’ina Patros, no ɓemb-roog o ñamaak ole no saax le Misira, a ndoona a Yeremi yee:

¹⁶«Ke o layaa fa in no gon no Yaal oxe fop oo, i nan-gilooxkirang.

¹⁷Ndaa kañ, kaa i mbug o mbadin ke i ndegitna: Xan i ndoxan a Astarte, Lingeer fee na asamaan, cuuraay soo njuuranin, ne i mbi’tuuna, in fo daan in, maad in fo kelfa in, kam teeru ke Yudaa fo no ped ke Yeerusaleem. Maaga, i njeg’a ñaamel boo ta dey, ƭaay boo wee xa kene too i and’ee taamaala.

¹⁸Kaa koy, naa i mbaasu o ndoxanaa a Lingeer fee na asamaan cuuraay soo mbañat o njuuranin, i ñaka fop, soo laƥ fo biim a ñaam a in.»

¹⁹Rew we a ƥaata teen ee: «Kaa refeerna keene sax, boo i ndoxanaa a Lingeer fee na asamaan cuuraay soo njuuranan, gor in kaa yoonaa teen. Ndax na kunpa no gor in i mbi’anaa a Lingeer fee na asamaan xa kaf axaa samandaaluuna soo njuuranan?»

²⁰Maaga, Yeremi a laya xeet fee fop, goor fo rew, fop we ndoonit’uuna neene yee:

²¹«Cuuraay fee nu ndoxna kam teeru ke Yudaa fo no ped ke Yeerusaleem, nuun fo daan nuun, maad nuun, kelfa nuun fa xeet fee fop, ndax o Yaal oxe wetandooxiran, ndax damiran no xeeñ um?

²²O Yaal oxe waagatee o muñ kañaan ne na pi nuun fo cednooxu ke nu mbi’na. Ten taxu saax le nuun a fes a pec, a wootat, a saloorteel, too genataand, ne ta refitna xaye.

²³Yaam ne nu ndoxanna roog can cuuraay, mbakaad no Yaal oxe, yaam ne nu nan-gilooxeerna o ñuxur no Yaal oxe too nu ndeefee kebil um, bargal um fo a cangin um, taxu taamaala feeke a dal a nuun, ne ta refitna xaye.»

²⁴Yeremi a layahina xeet fee fop, moƴtaa sax rew we fop ee: «Nuun Yuuyudaa we fop ndefna no saax le Misira, nan-gilooxyo fa lay fee no Yaal oxe!

²⁵Keeke o Yaal oxe Roog fee Isra’el Hupna fop a layu: Nuun fop, goor fo rew, nu mbi’a ke nu ndegitna. Kaa nu lay ee xan nu mbadin a tegit ake nuun, ta ref o ndoxan a Lingeer fee na asamaan cuuraay soo njuuranin. Ndamyo a paax boog ke nu layna, mbadin deŋ ke nu ndegitna!

²⁶Ten taxu nuun Yuuyudaa we ngenna no saax le Misira, nan-gilooxyo ke um layaa, mi o Yaal oxe: Mexe daaɓoortan gon maak le mi yee kam saax le Misira fop o leng ƴufginoorkatee gon es, ndax ta daaɓoox ee: ‹Ne ta wooritna yee o Yaal oxe na refkaa boo faw oxe ñoowaa.›

²⁷Nga’angyo, xam fexeyan a nuun, ndax um doon a nuun taamaala ee baneex. Yuuyudaa we fop ndefna no saax le Misira, xan laƥ fo biim a saŋik a den boo da mooc.

²⁸Leng-leng soom na ƥostooxkaa no laƥ ne, a nomtoortiid no saax le Misira, a ndet Yudaa. Maaga, wiin weene fop yoqna no Yuuyudaa we laqooxiid’ina no saax le Misira xan a and fa lay fum na fadnooxkaa, fee mi mbaat fee den.

²⁹Mi o Yaal oxe, xam coox a nuun o anddiloor, ndax nu and ee xam dal took nuun no saax lene, too ke layuuma na nuun xan a fadnoox no ndigil, ta ref taamaala nuun.

³⁰Keeke fosooxum, mi o Yaal oxe: Xam ɓoxot a Hofra fee refna Firawon fee, o maad Misira, na xa ƥay no fañ um, na xa ƥay no we mbugna njang o ñis um, ne ɓoxottuuma a Sedekiya fee o maad Yudaa na xa ƥay Nebukadnesaar fee o maad oxe Babilon, o pañ um oxe bug’ina jang o ñis um.»