Read NQAARIIT NE ROOG Yeremi 50 Bible Online

Yeremi 50 - NQAARIIT NE ROOG bible

Yeremi 50

¹Fa lay fee o Yaal oxe a layna na Babilon, no saax le no Kaakalde we, a reefandin no tuleer Yeremi:

²«Yegnityo a ndeer qeet ke, lambin, sip a laay a anddiloor, kaam ee lambinyo, mbañ o ƭasin dara, lay ee: Babilon a jaɓe, Bel a naag ɓot a sed, Merodak a diidlandel[84]! Nitaal roog ke Babilon a seda ɓot, pangool ke ten a ndiidlandel.

³Xeet a inooxantaan no ɓemb-roog o janoon[85] too xan a supit saax le ten a pec. O leng genkatee teen, wiin we fo cegel ke a nduux a koƥ.

⁴Na pe akaaga fo na jamaane faaga, Ii-isra’el we fo Yuuyudaa we xan a nomtooxandooriid. Mi o Yaal oxe layun. Xan a ñaaƴaa a loolaa, a mbaaƭaa o Yaal oxe Roog den.

⁵Xan a laamtaa a ƭat ale jofna Siyoŋ, a ngeleer a kid den farna fo maaga: ‹Ngaryo, i ndamoox no Yaal oxe no ngiɓoor naa na refkaa boo faw, too i mbeeckiran muk.›

⁶Xeet es kaa ndeeƭu o siir paal mo’u. Gaynaak den kaa mo’andoogu a den, a njoqooynoornaa a den na xa coong axe. Kaa mbirlooxoogu ndeer xa coong axe fo a ñaang ake, a mbeecit ngetand den.

⁷Fop we nqetoogna fa den, a listooga a den, too fañ we den kaa layoogu yee: ‹I mbi’ee pariƴ leng, yaam kaa tooñ o Yaal oxe, ngenand ne no cofel ole, o Yaal oxe refna yaakaar no daan den.›

⁸Ƈufyo sutoox a Babilon, inoox no saax le no Kaakalde we! Qustooryo nen a suk pambe kaa adooxanna ged.

⁹Nga’angyo, xam init no saax le no ɓemb-roog o janoon a yaj a pokate no qeet maak, ɓakandiid a den took Babilon. Xan a mbogooxanin, a njaɓin. A kas ake den kaa nand fo ake no qir o say oxaa gatkeerna o ƥor muk.

¹⁰Saax le no Kaakalde we xan a gefel, fop we na mbalitkan xan a ndeyƭoox. Mi o Yaal oxe layun.

¹¹Nuun we nguyitna xeet es, a bug oo nu mbelakinoox too ndef no ɗaay, ndaaploox nen fi laa na duutaa bele, ŋexel nen naar-koor,

¹²ndaa xan ya nuun a sed ɓot, oxe rimna a nuun xan a seeƈaar, a refat oxe falakna na saax ake. A koƥ-a-ƥor a refkataa, lanq beeru koroŋ fo o tan.»

¹³Fuux le no Yaal oxe xan a tax genkataand, a wootat ne te fodeena fop. Fop we na ndeefkaa paam Babilon xan a njaaxiɗ, a mbuuƴanaa yaq fee daluuna.

¹⁴Nuun xaaxaƴ a qali we fop, mbogooxanyo xire me widna a Babilon. Nqaƴyo took um, ba nu ngend a kas ake, yaam a tooña o Yaal oxe.

¹⁵Njibinyo o saax oo saax o wuuq xire took um! Babilon a ɓoxotooxa! Taax-took ke ten a ngaakooxa, tabax ke ten a njiƭtoox, yaam ndabdinax no Yaal oxe yoo. Ndabdinooxyo took um, mbi’in ke ta fi’na lakas we.

¹⁶Moocandyo kam Babilon oxe na duufaa fo xe na pokooxaa a ñand ale yaa fo a saxad ale. Mbaambir laƥ mbaawar ne, fat oxuu refna a geleeroox farna fa xeet um, o kiin oo kiin a ƴuf farna fo saax um.

¹⁷Isra’el kaa reeƭu mbaal mo’u, cogoy ke a ndaxan. O maad oxe Asuur eetun o lisit, soo oxe falakna o duguñaa xa kiiƈ um a ref Nebukadnesaar fee o maad oxe Babilon.

¹⁸Ten taxu keeke o Yaal oxe Roog fee Isra’el Hupna fop a layu: «Xam xaw o maad oxe Babilon fo saax um ne xawtuuma o maad oxe Asuur.

¹⁹Cinj kaaga, xam nomtiid a Isra’el no ngenand um, ta suufaa took Karmel fo kam Basan, a giñ tem took o joong ole Efrayim fo kam Galaad.

²⁰Mi o Yaal oxe kaam ee: Na pe akaaga fo na jamaane faaga, xan njofaƭar ne Isra’el a waaƭeel muu refna, ndaa doonkaand a ngid, bakaad fee Yudaa a naaɓeel, ndaa ga’kaand sen. Yaam xam waasan we um xaƴkaa da ñoow.

²¹Songyo saax le Meratayim, ndal took we ngenna Pekod[86]! Moocandyo a den, saŋik a den boo ba o leng a yoq! Mi o Yaal oxe layun. Mbadinyo ke hebluuma a nuun fop!

²²Xa buuq xire xe njibaa kam saax le, too o njakad onqe a magna.

²³Ndi nam o leede le na adna fa muum a ɓolte, a duguñel? Ndi nam Babilon a gefte tuƈ, a refat o njaaxɗataand a ndeer qeet ke?

²⁴Wo Babilon, ɗaapanaaxoong mbog, o yen teen, too foogino. Ye ga’ee’oona teen rek, naagee nuus, yaam kaa o maafir fa mi o Yaal oxe.»

²⁵O Yaal oxe a weta ngeekand um, a suudit teen ƥonax ke ta laltitkaa fuux ɗomu le ten. O Yaal oxe na refkaa boo faw Hupna fop xan a fadin calel um kam saax le no Kaakalde we.

²⁶Inooryo muu refna, ngar took Babilon, mbaƭit tap ke ten, mbi’in a kusax, ngefin tuƈ. Baa dara a yoqat teen.

²⁷Mbaryo wiin maak we ten fop, ƥis a den no warand olaa! Sabab took den, yaam bes den a fadiida, waxtu fee da ngadooxkaa a pi den.

²⁸Nan-gilooxyo! Xa buuq axe no ƴuuƴuf we, axe no we ndaɗitna no saax le Babilon, owe yegnitaa kam Siyoŋ ee: «O Yaal oxe Roog in a rabdinooxa, a rabdinooxana yaq fee no Mbind ne ten.»

²⁹Nqoyanyo a Babilon xaaxaƴ a qali we, fop we ndefna ɗana! Ndalyo me widuuna, ba o leng a daɗ. Ndabdeenoo a pi um, mbi’in deŋ ne ta fi’na lakas we! Kaa lalit o felnax um paam o Yaal oxe, paam o Tedu xe Isra’el.

³⁰Ten taxu o Yaal oxe kaa tee: «Mbes ke ten xan a yen no paayo ke ten, xiixire we ten fop a saŋkel a koom.

³¹Xam damir fa wo, o pelnooxu xe refoona, yaam bes of a fadiida, waxtu fee o gadooxkaa a pi of a gar. Mi o Yaal oxe na refkaa boo faw Hupna fop layun.

³²O pelnooxu xe xan a tolof, a yen, too o leng inatinkiran. Xam heƥand fiɗel no teeru ke ten, ta raaɓ ke widuuna fop.»

³³Keeke o Yaal oxe Hupna fop a layu: «Ii-isra’el we fo Yuuyudaa we a ñagadilandoore. Fop we ƥis’ina a den gilaa saax took o hup doole a maada o ndamaa a den, a mbañ o nqaƴ a den.

³⁴Kaa koy, mi o baawat den, jegaam katil, mi fee gon es a refna o Yaal oxe Hupna fop. Xam farit a den, ndax um ci saax le o yaadax, soo jaaxland we ngenna Babilon.»

³⁵O Yaal oxe kaa tee: «Fat laƥ ne a dal took no Kaakalde we, took no we ngenna Babilon fo kelfa ke ten fo yaal-o-and we ten.

³⁶Fat laƥ ne a dal took duleer maamaaɓ we, da ndefat yoqit. Fat laƥ ne a dal took a salma-koor ake ten, cer den a leeƈoox.

³⁷Fat laƥ ne a dal took pis ke ten fo a sareet-xire ke ten, took no xos no wiin wuu ndefna a ndeer um, da nand fo rew. Fat laƥ ne a dal took kalal ke ten, da njaɓel.

³⁸Fat o feñ a yen took poofi ke ten, da ŋiis, yaam saax nitaal roog cakalaaru a refu, da sayaa no pooƴ keene.

³⁹Ten taxu paafal ke fo xa ƥox-a-koƥ axe xan a korolooxaa teen, soo a ba ake a ngenin. O mbindeef o leng genkatee teen, jegkatee wiin na xa taan boo na xa tanaraat.

⁴⁰Ne ta refit’ina na Sodoom fa Gomoor fo teeru ke mbid’ina a den, Roog a gef’ina tuƈ, o leng genkatee kam Babilon. O mbindeef o leng dalkatee teen. O Yaal oxe layun.

⁴¹Xeet fey a inoortiidaa no ɓemb-roog o janoon, saax maak fo maad mayu a ƭistiidaa no cat adna.

⁴²Kaa pokoox a qali fo a salma, a ƈaxooxaa soo a ñak yirmande. Fangax le den kaa dititaa nen no maag ole. Kaa ŋaay pis, a nqodan a ñoq ale, a ndef leng, too wo a inooxanu, wo Babilon.

⁴³O maad oxe Babilon oxaa daawaa o nan oleene rek, xa ƥay um owaa leeƈooxaa, naqad a damin, ta ɗomeel nen o tew oxaa na gaajooxaa.

⁴⁴Ga’angi, nen njogoy naa na sutoortiidaa no joc ole Yordaan, a jagin na xa suufand xa quƥu sap axaa, neene ndeer ñaf fo ƭeet xam rax Kaakalde we no saax le, dalin teen oxe um jilkaa. Ndi an nandu fa mi? An saɗu xeloor fa mi? O aa-adax oxum na xoxkaa mbaambir es?»

⁴⁵Ten taxu, nan-gilooxyo ke o Yaal oxe a yuuɓanna a Babilon, ƭaap ke ta fofanna saax le no Kaakalde we. A woora yee xan a ƭooqel nen cegel boo no we moƴna o neew, xa suufand axe den a mbiitnel mbaambir den.

⁴⁶Fangax le na caɓ ale Babilon xan a tax lanq ke a yo’noox, xa buuq a nannoox a ndeer qeet ke.