Read NQAARIIT NE ROOG Yeremi 51 Bible Online

Yeremi 51 - NQAARIIT NE ROOG bible

Yeremi 51

¹Keeke o Yaal oxe a layu: «Xam wuuɗiid nqeñ yaayaq took Babilon, took no fañ we mi.

²Xam hebliid took Babilon wiin jan waa na mbeeskan, a ndaadin saax le. Xan a mbidin o kurul-keƥ a koom alaa fa taamaala fee.

³Xam hebil xaaxaƴ a qali we den ee: ‹Nqaƴyo took no weene ƭaay’ina a qali den, den fo we na nqaaƴooraa ndoki njelem den. Ba nu mbuus mbes ke den, saŋikyo xiixire we ten fop.›

⁴We ngaañeena ƭomu xan a luuñaa kam saax le no Kaakalde we, we ndibeena a lañtooxaa no ped ke ten.

⁵Mi o Yaal oxe Roog fee Hupna fop, waasiim a Isra’el fa Yudaa, ke saax den a mayna may fo tooñ fop oo mbaambir es, mi o Tedu xe Isra’el.»

⁶Ƈufyo sutoox a Babilon, oxuu refna a mucil o ñis um, ndik nu saŋkoox na qaw ale ten, yaam waxtu a tabdinax no Yaal oxe yoo. Xan a rabdin a pi um.

⁷Babilon kaa reeƭu a tokol wurus no ɓay no Yaal oxe, alaa waynooroogna adna fa muum. Qeet ke a yera na biiñ fee ten, a njiit.

⁸Ndak fo ndak, Babilon a jiƭtooxa, a duguñoox. «Ƭomatooxyo took um, mbaaƭan uut le ten teex ƭuumooxel, xeƈa xan a wod.»

⁹Kaa layel ee: «I mbaadna a Babilon, ndaa wodee! Fat i mbaasin pelek, nqaad, oxuu refna no saax um, yaam a qaw um a daawka a asamaan, a yoɗoox boo na eel akaa.»

¹⁰O Yaal oxe a ɓoxota a in ɓur. Ngaryo i mbetandoox kam Siyoŋ ke o Yaal oxe Roog in a fi’na.

¹¹Lakyo a kas ake, mayƭand a tungaar ake! O Yaal oxe a xiira maad we Medi na xire, yaam kaa bug o gef a Babilon tuƈ. Ndabdinax no Yaal oxe yoo, ndabdinax ne na yaq fee no Mbind ne ten.

¹²Yoɗyo o anddiloor o songir saŋe ke Babilon! Saƭkandyo a yetax ale, ndalin yeeyetax we, ƥengin goor, yaam o Yaal oxe a fi’a yuuƥ too xan a fadin ke ta layna took no we ngenna Babilon.

¹³Wo Babilon fee genna paam poofi maak ke too jeg kalal pagkatar, muukandoong of a fadiida, sor of a fag tak.

¹⁴O Yaal oxe Hupna fop a daaɓoortaan a xoox um ee: «Xam mayƭandong fo fañ nen tooroog, too xan a njibin took of xa ƈeel o ndam.»

¹⁵O Yaal oxe a sakta lanq ke katil um, a sinjit adna fee o and um soo a letnit asamaan fee o jeg-yiif um.

¹⁶A heblitangaa, poofi ke a ngitatir na asamaan. Kaa yoɗtaa a eel a maak ake no cat ke no lanq ke, a ƥalañnaa xa kiiñaand axe kam a teƥ ale soo a suqtitaa qeñ ke no keekand ke ten.

¹⁷No keene, o kiin oo kiin oxe ŋam yaam a ñak o and, o paal wurus oxuu refna a naag ɓot yaam nitaal roog ke ten, yaam ke ta muulna xa koɓong xa ƥor oo, too jegee na den o ñoow.

¹⁸Xa andand xa ƥor a ndefu, jale laa jalatna. Xan da mooc, yaa a qaw ale den a garkaa.

¹⁹Roog fee Yakoob koy nandee fa den, yaam o ten saku fop, moƴtaa sax xeet fee ta jegoodna. Gon um refu o Yaal oxe Hupna fop.

²⁰O Yaal oxe kaa tee: «Wo Babilon, kaa o reeƭu na mi o leede, ƥonax nqire’ir. Wo mokandtum a saax a mayu, yaqtong maat.

²¹Wo mokandtum pis fo o ŋaaŋaay um, a sareet-xire fo o ƈuuƴufin um.

²²Wo mokandtum o koor fo o tew, o nogoy fo o njaaƈ, o fes fo o toog.

²³Wo mokandtum o kaynaak fo o siir um, o qooxoox fo qoox um, gofornoor ke fo kelfa ke.

²⁴Xan nu nga ne um rabditkaa a Babilon, fop we ngenna Kalde, paaxeer ke da mbi’na a Siyoŋ. Mi o Yaal oxe layun.

²⁵Mi yoo wo oo, o joong o yaayaq ole. Wo Babilon fee yaqoogna lanq ke fop, xan o ɓay es a dal took of. Xam berengtiidong took-ee-took a ƥil ake, fi’ong o joong olaa doxeena riw. Mi o Yaal oxe layun.

²⁶Ɓil faraaj mbaat ɓil ferir xotitkataand me wo, yaam xan o refat o mbiñ o mbootu boo kili.» O Yaal oxe layun.

²⁷Yoɗyo o anddiloor o songir, ndax fop a nga’in, njibin a luuƥ a ndeer qeet ke! Mbapanyo qeet ke a Babilon, nqoy maat ne Araraat, ne Mini fo ne Askenaas,[87] ndalin a salma-koor akaa siiknoorna fo ten! Ƥakandiidyo pis, songin nen eel tooroog.

²⁸Mbapanyo qeet ke a Babilon, maad we Medi, gofornoor ke ten fo kelfa ke ten, saax le ta maadooxanaa fop.

²⁹Lanq ke kaa ngiiƈ-ngiiƈnaa, a yo’nooxaa, ye o Yaal oxe a fadnaa ke ta yuuɓanna a Babilon. Xan a fi a Babilon o mbiñ o mbootu, saax laa o leng a genateerna.

³⁰Xiixire we Babilon ñoxorataand, a ƥegelooxaa no saŋe cegu doole ke, njambaar den a fag tak, da nandtataa rew. A kinglir ake no begax ke na teeru fee a ƥole, pind ke ten a ndaaɓel.

³¹O yeeyegnit a ƴufa, a soƥik o yeeyegnit o kend um, ndax da ndaawin o maad oxe Babilon ee teeru fee ten a jaɓe o saax oo saax.

³²Cootand ke a njaɓe, xeet le a raaɓel, xiixire we a njaaxiɗ.

³³Keeke o Yaal oxe Roog fee Isra’el Hupna fop a layu: «Babilon kaa nand fo cukand, yaa ta duuteel. A yoqa o ndik rek, waxtu fee na saxad ale a gar no ten.»

³⁴We ngenna Yeerusaleem kaa layaa yee: «Nebukadnesaar fee o maad oxe Babilon a listaxam, a yaqaam pic. A fi’axam nen o ƥaxañ o ƥor. A ɗuudaxam salquƈ nen niŋki-naŋka. A mayƭandta o fud um ke moƴna o faax na mi soo a deɓaam.

³⁵Yaasam a ƭom-yedar ale fo pariƴ ke Babilon a fi’axama a yen took um! Yaasam fo’oy es a yen took we ngenna Kalde!» Xeet fee genna Siyoŋ layun.

³⁶Ten taxu keeke o Yaal oxe a layu: «Ga’angi, xam fartong, rabdinooxanong. Xam weerin o maag ole Babilon,[88] ŋiisin a cur um.

³⁷Babilon xan a refat juum kefatin, ngenand xa ƥox-a-koƥ. Xan a refat o njaaxɗataand fo qaadnooxel, too o leng genkatee teen.

³⁸A bug oo we ngenna Babilon a ŋuurandoor nen cogoy, a mbumbaa nen cogoy canglax,

³⁹ndaa ye da moƴna o ngañak, xam fexeyan a den mbumbaay, soo waynoor a den boo da naang nep. Xan a naang hanq a ƭaan, o ƭaan o yokooxkaand. Mi o Yaal oxe layun.

⁴⁰Xam ɗox a den no warand olaa nen fo mbaal, nen a suk paal fo a suk pambe.»

⁴¹Ndi nam Babilon[89] a jaɓte nene? Ndi nam a jangte, ten oxe adna fa muum a kañoogna? Babilon o mat a refat o mbiñ o mbootu a ndeer qeet ke! Keene waagee jeg!

⁴²O maag ole a riña took Babilon, a yag-ee-yag ake ten na palaƈaa, a muurin.[90]

⁴³Teeru ke ten a ndaadne, a ndefat lanq beeru koroŋ fo o tan maa o leng a genateerna, maa o mbindeef a reefateerna.

⁴⁴O Yaal oxe kaa tee: «Xam xaw a Bel, roog fee no Kaakalde we, huqnin ke ta ɗuudna, too qeet ke njaginkatee me ten. Saŋe ne Babilon sax xan a yen junjang.

⁴⁵Nuun xeet es, sutooxyo me ten, oxuu refna a mucil o ñis um, a daɗ fuux ɗomu le mi, mi o Yaal oxe.

⁴⁶Ba nu ñak njambaar, too ba nu saɗar xa nan axe na ndiiraa kam saax le. Saƭikyo, nu ndaawangaa o nan oluu ta waagna waag o ref, rend oo, mbaan oo, a ƭom-yedar ake a maadooxangaa sax oo, soo o keegetand a rondand o keegetand o kend um nen o maad.

⁴⁷Ñaal key a ngaraa, kaa um ɓekkaa o ɓay nitaal roog ke Babilon. Saax le fop xan a may fa gaci, qon ke a naang gañ muu refna.

⁴⁸Asamaan fee fo lanq ke fo fop ke refna na den xan a ƈeel, yaa yaayaq we a songkaa a Babilon. No ɓemb-roog o janoon a inoortiidkaa.» O Yaal oxe layun.

⁴⁹Babilon a warnoora wiin mayu kam adna fee fop. Ndiiki koy, ten yoqte no njom ne yaam xon we Isra’el ta warnoorna.

⁵⁰Nuun we ƥostooxna laƥ ne ten, ndetyo, ba nu ngeenoox! Ke nu ngoƭna fop oo, mbetandooxyo o Yaal oxe, too fat Yeerusaleem a ref na qeeñ nuun.

⁵¹Kaa nu layaa yee: «Kaa i sed’u, ye i nanna a ben ake, gaci fee a muur mukit in, ye wiin jan a maasandna o tedel ole no Mbind ne no Yaal oxe.»

⁵²O Yaal oxe kaa tee: «Ñaal key a ngaraa, kaa um ɓekkaa o ɓay nitaal roog ke Babilon, soo xa iin axe no we ngaañooxna a naang gañ kam saax le.

⁵³Babilon a yoɗoox’angaa boo na asamaan sax, a sip’angaa saŋe um took-ee-took boo waagaand o daaw, hebliidkoogaam yaayaq waa ndaawuuna.» O Yaal oxe layun.

⁵⁴Xa buuq a nannoorta Babilon, o njakad o maak a jibit kam saax le no Kaakalde we.

⁵⁵O Yaal oxe xe fiitnaa a Babilon, a riimnaa combol le na jibaa teen, le na yag-ee-yag ake ten na ndititaa nen poofi mayu kaa na mbangooxaa.

⁵⁶O yaayaq oxe xe garaa took um, kaam ee oxe garaa took Babilon. A salma-koor ake ten a naange nuus, a qali ke den a ƥolel calit, yaam o Yaal oxe kaa ref Roog faa na rabdaa, a ɓoxotaa oxuu refna ndabid um.

⁵⁷«Xam waynoor gelwaar we ten fo yaal-o-and we ten, gofornoor ke ten, kelfa ke ten fo a salma-koor ake ten. Xan a ƭaan o ƭaan o yokooxkaand.» O Maad oxe gon um a refna o Yaal oxe Hupna fop layun.

⁵⁸A ɓaata teen itam ee: «Saŋe ke na Babilon fa maak fee xan a njiƭtel, begax ciig ke ten a ndaaɓel. Neene, ke qeet ke a njalna, xan a ref kasaara, a saax ake a nqijan fiɗel le.»

⁵⁹Keeke refu ke o tuleer Yeremi a hebilna a Seraya fee o ƥiy Neriya too a ref o ndaan Mahseya, ye oxeene a retna Babilon, a yoon fa Sedekiya fee o maad Yudaa, no hiid o nahkandeer olaa no maat um. Seraya reeƭu o aa-adax oxe no cawdiin ke no mbind no maad ne.

⁶⁰Yeremi kaa bind’u no safe taamaala ke na ndalkaa a Babilon fop, fa lay fene fop bindeena took Babilon.

⁶¹Yeremi a laya a Seraya yee: «O fadangaa Babilon, fat o fi fop boo jang a maak fa lay fene fop.

⁶²Cinj kaaga, fat o lay ee: ‹O Yaal oxe, wo fa xoox of layu yee o mbiñ onqene xan a gefel tuƈ, too genkataand boo muk, ta ref wiin we mbaat cegel ke. Xan a refat a koƥ-a-ƥor boo kili.›

⁶³O jangangaa safe lene boo ƴut, fat o hum teen ɓil, deɓin kam Ofrat,

⁶⁴lay ee: ‹Neene Babilon a riimitkaa, too inooxatinkee na taamaala fee o Yaal oxe a ɓisiidkaa took um. Xan da yen, a mbagiɗ tak.› » Meeke fa lay fee Yeremi a fagtu.